Vakapäev [6782-7589]

 

	Taadsi õks sis imme helläkeist,
	Taadsi maamat mar´akõist -
	tull´ õks tä üles hummogulla,
6785	varra inne valgõt,
	astõ õks tä Taadsi asõmõllõ,
	kabokõnõ kat´mõllõ.
	Olõ-s õks imp Taadsit asõmõl,
	kabokõist kat´mõl -
6790	pad´aq olliq õks jo jäänüq pahatsõst,
	linnu tekiq leinälitsest.
	Ime näkk´ õks sis päävä nõsõvat,
	virve ao veretävät -
	Taadsi mõtõl´ õks tä kodo tulõvat,
6795	arma tütre astvat,
	Taadsikõnõ ka õks pälgäs´ kui päiv,
	olli ausa kui ago!
	Ime õks sis lausi meelestäni,
	meelest, meele poolõstani:
6800	”Õga tulõ-i õks imp kodo mu Taadsi,
	kambrõhõ kallis lats -
	Taadsikõnõ õks jo kaldo kavvõndõhõ,
	pardsi pall´o maa taadõ.
	Vaja minnäq õks meil umma ots´mahe,
6805	kallist perrä kaemahe -
	agu om õks täl sääl ikäv elläq,
	kammõlik kasvuda?”
	Imekene õks kõõ arvas´ andit,
	köüt´ kimpo kindit,
6810	ime sääd´ õks kõõ parke paklit,
	rõivakerri kirsto pand´.
	Imel saivaq õks kui andõq arvatost,
	kindaq kimpo köüdetöst,
	esekene õks jal sääd´ hobõsit,
6815	ravits´ ummi ratsokõise.
	Hobõsõq õks sis saivaq ehitedüst,
	kaarasüüjäq kabistõdust,
	ette naate õks jo säädmä hobõsit,
	pandma padi ruunakõise.
6820	Kolm pante õks küll hobõst kirstu ette,
	vidäjäq veerätediq -
	kirst oll´ õks täl täüs kui kivi,
	kimmähe kindit,
	Taadsil oll´ õks küll siseh siidirõivas,
6825	ala kaanõ kalõvunõ.
	Ime ehe ka õks hinnäst ilosahe,
	paks mamma parebehe.
	Ime õks ehe, esi ikk´,
	maama nuudsõ nobõhõhõ.
6830	Ese kostõ õks sõna kurval meelel,
	haard´ hallõstõ üldäq:
	”No haarat õks jo vaja, imekene,
	kaihopõlvõ, kandjakõnõ -
	kiäke tuu-i õks imp sullõ kuldakoste,
6835	mitond mesileeväkeist!”
	Vaka- saivaq õks sis -rahvas valmest,
	kinäq kirstupoisikõsõq,
	nõstiq õks nääq pääle kimmä kirstu,
	vaodeq vasõnäolitse.
6840	Läts õks sis vakk valamahe,
	kirst perrä kiir´mähe.
	Ese jäi õks küll koto hoitmahe,
	umma varra vaht´mahe.
	Sõidiq õks nääq, sõidiq tükü tiid,
6845	palakõsõ pall´o maad.
	Kiä tull´ õks sis vasta vakalõ,
	keerät kirstu kottallõ?
	Vasta õks sis tull´ vana miiss,
	vana miiss, puhas poiss.
6850	Oll´ õks täl käeh kuldakepp,
	oll´ vüül hõpõvüü,
	umma õks tä keppe keerätelli,
	kuldanuia kukutõlli.
	Kolm jäi õks sis hobõst saismahe,
6855	viis kirstuverevät.
	Kepp õks sis lausi meelestäni,
	nui meele poolõstani,
	kepp õks sis ütel´: ”Kehv ime!”,
	leelot´ maamat leinälisest:
6860	”Innep viiq õks ar kodo kehvä kirst,
	ikukast ese majja!
	Kohe viit õks sa kalleq kalõvoq,
	vagivahtsõq rõivaq?
	Kaadsilõ õks sa viit viina pääle,
6865	oiutada ollõ pääle,
	uma viit õks sa kirsto ikmahe,
	kuldakaste kuukmahe!”
	Kiäke saa-s õks joht nätäq vanna miist,
	vanna miist, puhast poissi,
6870	muudku kuuliq õks nääq timä helükeist,
	vaga vere vaimukõist.
	Suur jäi õks kõik vakk vaht´mahe,
	kalleq poisiq kaemahe:
	”Kagoh om õks no imeh, mis mi näi,
6875	om kummõt´, mis mi kuuli,
	kinni peetäs õks et kirstuhobõsit,
	vaht´vaq vakaratsokõsõq!”
	Kirstu-õks-sis-veleq vitso anniq,
	rutto näile ruuska näütseq.
6880	Ime tull´ õks jo mano ikkõh,
	kandja mano kahitõh,
	hobõsõq õks et pill'vaq pistö,
	üles linnuq lindo lääväq.
	Vana õks jal miiss, puhas poiss
6885	umma õks jal keppe kergütelli,
	kuldanuia kukutõlli.
	Kepp õks jal ütel´: ”Naakõq kiirdmä,
	vereväq vidämähe!”
	Nii õks sis lätsiq minemähe,
6890	tulitsõhõ tulõmahe:
	kuhvreq
	kast pääl sääl kahisi.
	Tahtsõq õks ar kaste kaotõlla,
	kirsto jättäq kivestikku.
6895	Peiväq õks sis kinni mitmõkeske,
	tulliq külge kümnekese.
	Sis sõidiq õks nääq läbi suurõ mõtsa,
	läbi vahadsõ varigo.
	Sääl õks jal lauliq kummõq kuusõq,
6900	laanõ ladvolda pedäjäq,
	lepäq õks kõik näile leelotivaq,
	hüäq puuq hähksiväq:
	”Ime-õks-sa-kene helläkene,
	Taadsi maama, mar´akõnõ,
6905	innep viiq õks ar kirst kivestikko,
	annivakk varikohe,
	innep jaaq õks sa hammõq jänesille,
	oiutõllõq oravillõ!
	Repän om õks küll näide ristesä,
6910	mõtskits kitupoiss,
	repän ka õks taht andit,
	mõtskits kindit!”
	Imekene õks joht kullõ-s näide jutto,
	laanõ ladva laulmist.
6915	Ime õks sis lausi meelestäni,
	memme meele poolõstani:
	”Jäägeq õks ti, mõts, umma paika,
	kuusõq umma kottallõ!
	Meil õks om vaja sinnä minnäq,
6920	vakal rutto vallaq -
	sinnä õks mul uut tütrekene,
	kaes imme kanakõnõ,
	uut õks jo imme huulitsal,
	vaht´ maamat vanijal!”
6925	Õga õks imp lää-s pall´ond aigo,
	tuvi, mitond tunnikõist -
	kulla saivaq õks jo krundi kottallõ,
	mar´a Kaadsi maa pääle.
	Nuuq õks kõik kiviq kõnõlivaq,
6930	mullatüküq murõhtivaq:
	”Ime-õks-jal-kene helläkene,
	kaiholine kandjakõnõ,
	kohe õks sa kirstu keerätellet,
	annivaka vaotõllõt?
6935	Innep tuuq õks ar kirst kivi mano,
	muudsaq hammõq mulla sisse -
	s´oo om õks taa kivi Taadsi tarõ,
	mullapala murõhtaja!”
	Kivi õks sis lausi meelestäni,
6940	muld meele poolõstani:
	”Peio nakas õks kui Taadsit pess´mähe,
	kasa karri andmahe,
	kivi pakõ õks sis kirivä külele,
	kannu valgõ var´olõ!
6945	Sis saasõ õks taa kivi Taadsi tarõ,
	kand leinäkambrõkõnõ!”
	Imekene õks sis pall´o jo pahase,
	maama viländ ar vihase.
	Esi õks tä keelilä kõnõli,
6950	umal suul sorahõlli:
	”Kas om õks no õigõ vai võlss,
	koor´alitseq kummõdekõsõq?
	Kui ma õks küll elä, sis ma näe,
	taha kaiaq naid kaiha -
6955	kaiho- saa-i õks ma -kapla lõigada,
	oho-uhjo arotõlla!”
	Imel sai õks tuu jutt aetost,
	kehvä sõna keerätedüst,
	ime kai õks sis silmil selgil,
6960	silmäkolmal korgil -
	kirstu- naksiq õks jo -poisiq kiuhkmahe,
	kastiveleq kargamma.
	Kaadsi sõidiq õks jo kotost naaq kasagoq,
	naaseq, tennöq nal´amehist:
6965	sälgä olliq õks näil aedoq moodorõivaq,
	kummõdeq kuubakõsõq,
	viina- olli õks näil -putel puusa pääl,
	kalleq ollõq karmaneh.
	Inne anniq õks nääq viina imele,
6970	kallist olut kandjallõ,
	sis keereq õks nääq Taadsi kirstu mano,
	astõq annivaka mano,
	viina anniq õks sis kirstu kitjille,
	auvaka valajillõ.
6975	Pääle kõrrast õks kõigilõ annivaq,
	olut näile oiutivaq.
	Sis miildö õks taa ime meelekene,
	süttö maama süämekene,
	imel lätsiq õks ar meelest kivi jutuq,
6980	mulla murrõsõnakõsõq.
	Kasagoq õks kõik ümbre kalduvaq,
	ümbre vaka nääq valivaq.
	Kasagoq õks jal iih kalduvaq,
	veereq iih viina-andjaq,
6985	vakk läts õks kõik takah naardõh,
	kirstupoisiq kiuhkoh.
	Kaadsilõ õks kõik naaseq kadsatõlliq,
	sõsarõq sõiratõlliq:
	”Kaadsi õks, sa veerüs velekene,
6990	mi korgõ kosilanõ,
	no sääq õks sa höste särgisiiloq,
	panõq höste palt´o-nulgaq!
	Sisse õks küll tulõ sugu suur,
	sugu suur, võsa võrgas -
6995	vasta mingu-i õks sa pii-pindsakol,
	tükk´kü-i tüü-rõivil!
	Sinno ka õks kaes tuu miiss,
	vaht´ sinno vana poiss,
	kiä tahtsõ õks küll Alelõ andaq,
7000	sundõq umma sugulaist.
	Kuulõq õks, meil korgõ kosilanõ,
	virve rikas velekene:
	mineq õks sa vasta ilosahe,
	kirstu pääle kibõhõhõ!
7005	Näile õks sa viiq makõt mamma,
	liidäq näile likerit!”
	Sis õks jo sisse vakk vali,
	vakk vali, kirst kiirdö.
	Kaadsi juusk´ õks sis vällä kaemahe,
7010	kirstu viirde virgastõ.
	Sis õks naaq naaseq nal´atõlliq,
	inemiseq ilotõlliq:
	”Hillä õks ti, hillä, helläq languq,
	tassa, targaq ti umadsõq!
7015	Hot´ ommaq õks teil iih sõasõnniq,
	sõasõnniq, roodsi ruunaq,
	hobõsõq õks teil ommaq siibaga,
	linalakaq lindajaq,
	siske õks ti ajagu-i üle aido,
7020	üle katustõ karaku-i!
	Maalõ jovva-i õks ti aiaq mi aido,
	kakko mi katusit!
	Vahtsõq õks ti languq, mi umadsõq,
	meilä meelimar´akõsõq,
7025	õga õks meil olõ-i Ale aiaq,
	seto poisi meil seenidseq!
	Alel olliq õks sääl armõdoq aiaq,
	sainaq saviga paigadoq,
	Ale võinuq õks ti aiaq laotõllaq,
7030	saibapaariq maalõ saataq.
	Kaadsil ommaq õks kõik karradsõq katusõq,
	tugõvaq aiatulbaq.
	Tüüd jovva-i õks mi esele tetäq,
	aoviidet mi velele!”
7035	Kaadsi and´ õks jal näile kallist viina,
	keerät´ kirstunõstjillõ.
	Vaka- õks jal -naaseq nal´atõlliq,
	kirstuimändäq ilodeq:
	”Taadsi-õks-sa-kõnõ, näiokõnõ,
7040	illos imelatsõkõnõ,
	koh sa õks no olõt, uikaq vasta,
	koh hingät, tiiq hellü,
	uikaq õks sa vasta ummilõ,
	tiiq hellü sa hõimulõ!
7045	Kaadsil ommaq õks kõik klaasidsõq kambrõq,
	pääle kividseq keldreq,
	kohe om õks taa aet mi näio,
	kallutõt kabokõnõ.
	No angõq õks ti nätäq mi näio,
7050	toogõq kaijaq kallis kabo!”
	Sis viide õks näid aita mäele,
	pääle aida päälikohe.
	Sääl olli õks taa tark Taadsikõnõ,
	nuur noorigõkõnõ,
7055	vilä- oll´ õks tä -salve veereh,
	kaarasalve kaalal.
	Sis lätsiq õks nääq mano teretämmä,
	käveq kätt andmahe.
	Imekene õks sis teret´ kõkõ inne,
7060	maama and´ õks jal suud magusahe,
	ümbre võtt´ õks küll kaala kallehe:
	”No tere õks, mu kullanõ tütär,
	kalõvunõ kanakõnõ!
	No sinolt õks ma künnü küüsümähe,
7065	nõsõ, ime, nõudmahe:
	kas oodit õks sa siiä imekeist,
	vahet vanna maamakõist?”
	Taadsikõnõ õks sis ikk´ ne naard´,
	pääle õks tä naaru nal´atõlli,
7070	silmäviil veerätelli:
	”No kuulõq õks, mu kuku maamakõnõ,
	kallis latsõ kasvataja:
	ma sai õks kui kullaga kokko,
	hõbõhõtsõ hõlma mano,
7075	ma õks jo väega teid oodi,
	vahe umma vakakõist!”
	Taadsi õks sis lausi meelestäni,
	meelest, meele poolõstani:
	”Hot´ minno õks siin väega hoietigi,
7080	pehmehe peetigi -
	n´ooq ommaq ka õks siin naaseq nal´alitseq,
	Kaadsi hõim kargaja -
	ma olli õks küll võõras vaihõl,
	tuudokõnõ tooli pääl,
7085	ma tihka-s õks, kabo, siin karada,
	nuur, nalja nal´atõlla!”
	Sis lätsiq õks nääq tassa tarrõ,
	hillä hellä huunõhõ.
	Tävveq olliq õks sääl lavvaq, tävveq livvaq,
7090	all olliq õks sääl rahadsõq lavvaq,
	pääl rätiq präänikatsõq.
	Kõik olliq õks sääl vajaq vastatsõlla,
	kuldahanguq korgõh,
	kohe õks naaq heidiq herrä lindiq,
7095	säksa kübäräq künnüdiq.
	Palt´oq õks nääq kõrvalõ pannivaq,
	kalõvutsõq kallutõlliq.
	Armuga õks näid aete lavva taadõ,
	linnu meelel livva mano.
7100	Ime istõ õks sis ala aknidõ,
	kuvvõ kruudi kottallõ,
	kõik istõ õks sis hõim hõõlahe,
	rikas hõim ristikohe.
	Kaadsi tull´ õks sis mano krahankaga
7105	vigurine õks täl oll´ viinaputel.
	Lavva saisi õks kõõ otsah, olu käeh,
	lavva veereh, viin peoh,
	ütte õks tä and´, tõist vali,
	kolmandat kummutõlli:
7110	Kaadsi tahtsõ õks näid viinal vetütelläq,
	umal ollõl uputõllaq.
	Imel olliq õks jal soradsõq pudruq,
	memmel mesidseq leeväq.
	Nuuq õks jal naaseq nal´atõlliq,
7115	inemiseq ilotõlliq,
	kiä olliq õks küll tulnoq nal´atarõst,
	lasknoq laululavva takast:
	”Ime-õks-sa-kene helläkene,
	mesimarja maamakõnõ,
7120	kull´a õks jal languq, kuku languq,
	mi languq, meeli languq,
	sünn´ke õks no ti mi söögele,
	lepp´ke ti mi leeväle!
	Pelä-õks-ti-ku-ieq süvveneni,
7125	süvveneni, juvvõnõni:
	mi ommaq ka õks imel piimä peoq,
	piimä peoq, sõira sõrmõq!
	Hot´ ommaq õks meil imel väikoq lehmäq,
	maamal madalaq vasigõq,
7130	väikol om õks küll lehmäl väkev piim,
	madalal makus´ piim!
	Ime mõist õks meil karja kasvatõllaq,
	mõist hoitaq vasikit:
	imel saasõ õks meil katõsta katõsa,
7135	saa ütestä ütesä.
	Vahtsõq õks ti languq, mi umadsõq,
	meilä meelimar´akõsõq,
	küll ommaq õks teil hobõsõq hoiedoq,
	kaarasüüjäq kaedoq!
7140	Esel om õks meil küün kümme süld,
	om sarraj sada süld,
	õga jää-s õks teil vehmreq vihma kätte,
	sadulaq sao kätte.
	Kuulkõq õks jal, uhkõq umadsõq,
7145	mi suurõq sugulasõq!
	Ti ka õks küll olõt kohvi-kotost,
	olõt piitnä-perrest,
	teele õks mi kohve annaseq,
	teele piitnät peesütäsiq -
7150	teele õks mi ütle umma ohto,
	teele kaiho kaibõllõ:
	Kaadsi- õks-meil-kõist velekeist,
	pikkä peiopoisikõist -
	hoit´ õks tä hüvvi hobõsit,
7155	kasvat´ kaarasüüjit,
	tekk´ õks tä üül ütsäq rokaq,
	pääväl katsaq kaaraq.
	Kui naksi õks meil saja saamahe,
	aulauda astumahe,
7160	Kaadsi pand´ õks sis ette hobõsõ,
	verevä vehmrehe,
	vell´o sõit´ õks sis suurõ liina sisse,
	ausahe alõvohe,
	kohvi- ost´ õks tä -katla kuurmahe,
7165	piitnä- pand´ õks tä -katla perä pääle.
	Vell´o nakas´ õks sis kodo veerümähe,
	Kaadsi liinast kaldumma.
	Hopõn läts´ õks sis mäkke mängeh,
	kallaspuuldõ karõldõh -
7170	piitnä- sattõ õks sis -katla perä päält,
	kukko maalõ kohvikatla.
	Läts õks sis katske kohvikatla,
	piitnä pada pirabinna.
	Selle saa-i õks mi kohve kiitäq,
7175	saa-i piitnät peesütelläq.
	Vahtsõq õks jal languq, mi umadsõq,
	meillä meelimar´akõsõq,
	las ku õks ti tulõt tõõsõ kõrra,
	astut tõõsõla aola,
7180	teele panõ õks sis tsäi kiimähe,
	samavarra
	Söögeq õks ti, languq, joogõq, languq!”
	Ime käve õks küll mano käbehehe,
	linnas´ mano libõhõhõ.
7185	Taadsi õks jal imme helläkeist,
	Taadsi maamat mar´akõist -
	imele õks sis and´ andit:
	tiidse õks tä anda suurõ teki,
	valgõ lina liigutõlli,
7190	üskä and´ õks tä suurõ üsätävve,
	käe pääle käetävve.
	Kaadsi nakas´ õks sis ime kargamma,
	vana naane nal´atamma.
	Esi õks tä karas´ ne kadsade,
7195	pill´ jalgo, pidi illo:
	”S´oo sai õks mul puja hoitmast,
	kalle latsõ kasvatammast!”
	Sis õks jal esele and´,
	pääle õks jal sõirat´ sõsarillõ,
7200	veerät liina-tä-velile.
	Kõik õks sis tehnseq andjat,
	kulla andõ kudajit.
	Söögi- sai õks kui -kõrd süüdüst,
	joogikõrd juudust,
7205	ime katt´ õks sis lavva laadnahe,
	lavvaräti laotõlli.
	Oo õks tuud tarka Taadsi imme,
	kavalat kandjakõist -
	liudõ pand´ õks tä pääle lillelitse,
7210	kaussõ pääle õks pand´ katsa nitsega,
	vak´o käänd´ õks tä pääle käterätiq,
	tiidse anda tiranikiq
	hanga-õks-liisi, kongaliisi,
	tsõõr´aliisi, pööreliisi.
7215	Ime astõ õks sis auga mant,
	tiidse tullaq tehnäteh.
	Oo õks noid valgit vakanaisi,
	kinn´o kirstu-imändit!
	Esi õks nääq naariq ne nal´adeq,
7220	pääle karkseq ne kadsadeq:
	”Söögi- sai õks meil -kõrd süüdüst,
	joogikõrd juudust -
	no seime õks mi säksa lavva takah,
	kaubamehe kambrõh -
7225	laulu- jäi õks meil -kõrd laulõmalda,
	ilokõrd iskimäldä!
	Katõlt olliq õks siin kõrralt kalalivvaq,
	nelält-viielt lihalivvaq.
	Siin õks mi härä häötelli,
7230	seime origo otsani.
	Vahtsõq õks ti languq, mi umadsõq,
	meilä meelimar´akõsõq,
	kui õks ti eelä meillä ollit,
	meillä ollit, sääl kävet,
7235	agu olli õks meil vägi väikene,
	oll´ pido peen´okõnõ?
	Teele keedi õks mi kirbu külekese,
	paisti parmu poolõkõsõ:
	kirbust õks saasõ kipõ ruug,
7240	parmust paks pudrukõnõ.
	Vahtsõq õks jal languq, linnukõsõq,
	madalikuq meelimar´aq,
	selle olli õks vaest pido peen´okõnõ,
	rahva ravi väikene:
7245	ese and´ õks meil siiä ikkõh,
	kasvataja kahitõh!
	Ese tahtsõ õks meil Alelõ,
	anda suurõlõ sulasõllõ,
	kiä oll´ õks taa koolih kullus miiss,
7250	kõkõ kallep kallis poiss.
	Esekene õks meil otsõ usulist,
	tahtsõ veljä viielist,
	imekene õks jal himots´ hiitrat,
	tahtsõ Kaadsit kavalat.
7255	Ime and´ õks küll umala meelelä,
	pääsö umala päälä,
	Taadsi tull´ õks meil memme miilt piti,
	taadõ tahetot piti.
	Näio oll´ õks meil kuulus üle kolga,
7260	oll´ veerüs üle veere:
	Taadsit õks meil kutsäreq kosõvaq,
	timmä tahtsõq tallipoisiq,
	pääle timmä ka õks möldreq kosõvaq,
	kivipoisiq kihlsivaq.
7265	Kõik õks küll tahtsõq mi Taadsit,
	tundsõq Tuula tütrekeist,
	Taadsi oll´ õks et tahe
	Tuul tugõva jutuga.
	Ese tahtsõ ka õks andaq möldrelle,
7270	kihladaq õks küll kivipidäjälle.
	Selle tahtsõ õks tä andaq möldrelle,
	keertäq kivipidäjälle!
	Tuud ka õks küll ütel´ mi ese,
	toet´ sõnna vana Tuul,
7275	möldrel saasõ õks et matt maatõh,
	külümüt küle pääle:
	esi õks tä maka, matt tulõ,
	lesätäs, leibä saasõ.
	Taadsi õks jal imme helläkeist,
7280	maamat meelimar´akõist -
	ime õks küll esele ütel´,
	maama tätäle manits´:
	”Taadsi taha-i õks meil minnäq möldrelle,
	keertäq kivipidäjälle -
7285	agu lätt õks meil muna musta sisse,
	tuvikõnõ tursti mano,
	sis õks meil muna mustast lätt,
	tuvi turstil tolmus!
	Sääl saasõ õks tä tsia söötijäst,
7290	imise ilestäjäst -
	möldre õks hoit pall´o tsiko,
	toit tugõva origo,
	liina om õks tä liha viijäni,
	kalle väe kandjani.
7295	Selle õks anna-s imekene,
	taha-s minnäq Taadsikõnõ.
	Ese õks jal armast´ Alekõist,
	virve Virkse pujakõist;
	ime õks jal kai Kaadsikõist,
7300	Taadsi tundsõ Toomõ poiga -
	ime õks kallut´, Taadsi tull´,
	maama tougas´, tuvi läts.
	Kaadsi-õks-sa-kõnõ, velekene,
	mi suur sugulanõ,
7305	hoitma nakaq õks sa mi näiokõist,
	elämä ilosahe!
	Kuulõq õks sa, hüä tsõdsõ ülä,
	kaharpää näio kasa:
	sald´ma naaku-i õks imp liina lihavit,
7310	tahtma turu tugõvit!
	Kuulõq õks jal, hüä tsõdsõ ülä,
	väega hüä väümiis:
	söögeq õks küll muna ti poolildõ,
	kanamuna katõkese!
7315	Pessku-i õks sa naist perre näteh,
	muidõ tiideh teotagu-i!
	Sis saasõ õks küll kolgalõ kõnõldaq,
	veerele veerätelläq,
	kolk and õks jal kur´alõ kuuldaq,
7320	viir tiidäq tigõhõllõ.
	Kuri õks jal ütles: ”Kuaq naist!”,
	tikõ ütles: ”Tiiq kurja!”
	Ülä-õks-sa-kene, väükene,
	niidine õks sa tiiq roosakõnõ,
7325	olõkõrrõst varrõkõnõ,
	tuuga õks sa naist hirmutõllõq,
	mi kapo karistõllõq!
	Noomiq õks sa naane nulga takah,
	oppaq univuutil,
7330	angu-i õks sa naist külä naarda,
	kapo muidõ kadsatõlla!
	Kui õks ti elät ilosahe,
	katõkeske kallehe,
	teid õks sis kost´ma kutsutas,
7335	sagõhõhõ sõna saasõ.
	Kui õks ti elät ilotohe,
	katõkeske kammõlikko,
	kui õks sis tulõt kost´mahe,
	astut aigo viitmähe,
7340	Taadsikõnõ õks sis tarrõ tulõ,
	tugõvahe Tuula poolõ -
	sis jätä õks mi väü värehte taadõ,
	poisi puuriida mano.!
	Sullõ veese õks sis Kirep kergokõsõ,
7345	veese Tuks toolikõsõ;
	sis õks sa tihka-i tarrõ tullaq,
	ilosahe ese majja.
	Kui elät õks sa, Kaadsi, ilosahe,
	Taadsiga tahehehe,
7350	hüä om õks sis sullõ ne muilõ,
	illos õgalõ-ütele,
	tuu eläs õks et paar parebehe,
	laulatõduq laadusahe!”
	Kaadsi õks kullõl´, kohrut´ hinnäst,
7355	mõtõl´ mõrro meelekeist.
	Esi õks tä hinele kõnõli,
	umal suul sorahõlli:
	”Lüü-i õks ma suuhtõ sorijallõ,
	pessä-i päähä petjälle -
7360	esi õks ma tiiä, mis ma tii,
	mõista umala meelelä:
	Taadsi om õks mul peoh kui piirak,
	om käeh kui kägo!
	Esi õks ma peti, esi võti,
7365	esi kiti, kisi siiä.
	Ime saa-i õks imp olla peremiiss,
	kandja Taadsi kaejani -
	kui ma õks taha, sis ma pessä,
	kae pääle, anna karri.”
7370	Kaadsi õks ütel´ kuuldmalda,
	Taadsi kandja kaemalda.
	Tuud õks jal ütliq vakanaaseq,
	kinä kirstu kitjäni:
	”Näio õks meil esse helläkeist,
7375	Taadsi tätät tähekeist!
	Esel oll´ õks meil üts tütrekene,
	kalõvunõ kabokõnõ,
	ese ost´ õks kõõ kurstõ kumakit,
	ost´ matsa maagõlanga.
7380	Kudi õks sis kangast, kodo kumas´,
	tekk´ langa, tarõ tiras´.
	Õga pelgä-s õks täl kangas kadõhuist,
	illos rõivas imehüist -
	rõivas oll´ õks täl illos kui iä,
7385	tasanõ kui talvõ tii.
	Taadsil olliq õks kõõ peeleq perre tarõh,
	oll´ ala aknidõ.
	Õga kutsu-s õks tä küläst köütjät,
	üle aia alostajat -
7390	miä õks tä kuuli, tuu kudi,
	miä arvas´, tuu alost´.
	Ese anna-s õks meil punda poolikot,
	villanakla narritot -
	ese and´ õks kõõ punnaq plootnahe
7395	villanaglaq veernahe
	selle om õks meil siseh siidirõivast,
	alla kaanõ kalõvunõ.
	Taadsil om õks meil kivi kirstu pääl,
	vaotus vaka pääl,
7400	Taadsil saasõ õks küll pitäq umast iäst,
	saa kakkoq kaugõst!”
	Mõni õks sis ütel´ hill´okõitsi,
	tahtsõ üldäq tassakõtsi:
	”Üläle õks vaest saa kõrtse kandaq,
7405	Kaadsil viiäq viina pääle!”
	Sis jäiväq õks jo vaiki vakanaaseq,
	uma laulu lõpõtõlliq.
	Sis õks jal lauli Kaadsi sugu,
	vele umadsõq veerädiq:
7410	”Ti õks no kitiq umma tsõtsõ,
	umma armast avvustõlli.
	Mi om ka õks küll vell´o kitetäv,
	armas au-antav:
	meil om õks ehk vell´o mitmõst parep,
7415	katõst-kolmõst kallep!
	Meelüq õks sa, meelüq, memmekene,
	tasahuq, taadõkõnõ!
	Hot´ ülti õks meil veljä joodikõst,
	ülti kõrdsi-kõnnikõst,
7420	teno õks meil noorõlõ velele,
	kats tenno kallellõ -
	pikäh olõ-i õks vil olnoq pingi pääl,
	kõrdsi veereh kõvõrehe!
	Oll´ õks meil vell´o proostat jako,
7425	kallis proostat kalenjat:
	miä õks ante, ar jei,
	pakutigi, panõ-s vasta.
	Vell´o lää-s õks meil kõrtse ütsindä,
	kallu-s katõla jalala -
7430	kõrtse läts õks kõõ ummi umastõga,
	tougas´ ummi truukõga.
	Rikkal om õks küll pall´o ristiveljo,
	uhkõl poisil unopoigõ.”
	Kaadsi õks jal imme helläkeist,
7435	vanna maamat mar´akõist -
	viirde heit´ õks tä sõna viguritse,
	kolm sõnna kongulist:
	”Selle õks mi olõ juujat suku,
	olõ seemend serbäjät:
7440	kui hoiji õks ma Kaadsit väikost,
	kasvatõlli kanasõst,
	ese läts õks sis kõrtse, mina kõrval,
	ime, lätsi õks ma liina, Kaadsi ligi.”
	Kaadsi õks jal lausi meelestäni,
7445	meelest, meele poolõstani:
	”Ese jei õks sis toobi, ma tõõsõ,
	ime kanni, ma katsi!”
	Näile õks sis ütel´ mito naist,
	viis veljä veerätelliq:
7450	”Mis ti õks no haarat hangu-sõnno,
	korjat sõnno kongoliisi?
	Joodikil olõ-i õks joht korgõ kodo,
	olõ-i mõisa maja!
	No ajagõq õks ti hauda hangu-sõnaq,
7455	pangõq kotte kongo-jutuq:
	õga olõ-s õks meil näio ängätäv,
	olõ-s pall´o pakutav -
	vell´o õks võtt´, näio tull´,
	Tuum kosõ, Tuul tull´.
7460	Näist sai õks no paras paarikõnõ:
	üte- ommaq õks nääq -ilosaq mõlõmbaq,
	üteveerüsä verega.
	Võivaq õks nääq elläq, võivaq ollaq,
	võivaq kavva kasvuda!
7465	Taadsi või ka õks siin säädäq ime sängö,
	pandaq tätä pad´akõist -
	õga olõ-i õks siin kotoh sõsarit,
	kallist imekanasit!
	Taadsi-õks-sa-kõnõ, näiokõnõ,
7470	pääle veerüs velenaane,
	kutsma nakaq õks sa kodo sõsarit,
	hõikamma hõimlaisi!
	Õga siiä õks nääq tulõ-i söögi läbi,
	joosõ-i siiä joogi läbi -
7475	süämekene õks näil kuts kodopaika,
	miil hälge hällüpaika,
	koh om õks näid ime imetänü,
	om maama maatanu.
	Tuud õks siin sõsarõq pelkseq,
7480	imekanaq kahitsõlliq:
	Kaadsikõnõ õks vaest usu unõhtõllõs,
	uma muu muilõ and?
	Tuud õks nääq ikiq ilma-väega,
	kado-väega kahitsõlliq:
7485	”Ese tekk´ õks ar Kaadsi peremehest,
	kulla krundiesändäst -
	kui mi õks no kuna kodo tulõ,
	ilosahe ese majja,
	velekene õks vaest tarõ tappa pand,
7490	ussõ lukko oiutõllõs?
	Kodo- sis õks meil -tii koobitõdas [=kopitõdas],
	hallõ tii hainatõdas!
	No oll´ õks kõõ veli sõsarõllõ,
	illos imekanasõllõ,
7495	no sõki õks mi suvõl suurõ tii,
	talvõl lumõ tasatsõst,
	ese sõki õks mi moro muatsõst,
	vell´o haina harvakost.
	Agu nakas õks no moro muhetamma,
7500	vell´o hain haletamma?””
	Sis vaio õks jo mano vana ese,
	kallis Kaadsi kasvataja:
	”Kuri om õks jo nulgah mul kullõldaq,
	vana esel vaiki ollaq!
7505	No jätkeq õks jo jutto vähäbälle,
	hanklõmist harvõndagõq -
	miä õks jo saasõ, tuu saa,
	koor´a
	Kuulkõq õks ti, valgõ vakarahvas,
7510	kinäq kirstu-ti-imändäq:
	joogõq õks ti viina, löögeq laulo!
	Mi võidõq õks ti kotoh kul´atõllaq,
	mino tarõh tandso lüvväq.!”
	Taadsi õks sis ime, helläkene,
7515	Taadsi maama, mar´akõnõ:
	”Meil tulõ õks ar kohus kodo minnäq,
	marsseq s´oost majakõsõst.”
	Taadsikõnõ õks jo nakas´ ikmahe,
	noorik väega nuutsk´mahe -
7520	hallõ oll´ õks täl umma imekeist,
	kallis umma kandjakõist.
	Timmä õks kõik sõsarõq meelüdiq,
	hüä Kaadsi häälitselliq:
	”Ikku-i õks sa, ikku-i, Taadsikõnõ,
7525	mino puhas pruudikõnõ!
	Õga õks sul imme iäst saa-i,
	kasvatajat kaugõst -
	küll õks sul üllä iäst saasõ,
	saa õks ma, kasa, kaugõst!
7530	Tuu tulõ õks jo ime unõhtõllaq,
	tuu kandja kaotõllaq!”
	Vaka- saivaq õks sis -rahvas valmest,
	kalleq veleq kabistõdust.
	Kui lätsiq õks sis nimäq minemähe,
7535	vakapoisiq valamahe,
	õga lasta-s õks Taadsit saatmahe,
	vakapoissa vaht´mahe -
	Taadsi viide õks ar taadõ-tarrõ,
	kallehe kambrõhõ.
7540	Tälle õks kõik naaseq nalatõlliq,
	inemiseq ilotõlliq.
	Sedä õks taa ütel´ sada suud,
	kümme kiilt keerätelliq:
	”Nuur kuulõq õks sa noorigõkõnõ,
7545	eeläne ehitedükene!
	Kui lännöq õks sa imme saatmahe,
	läve taadõ lähätämmä,
	ime annoq õks vaest sullõ igävüse,
	heitnöq kaala helikusõ,
7550	sis saanuq õks sul, Taadsil, ikäv elläq,
	hanil saanuq õks vaest halva haridaq!
	Ime and õks no muilõ igävüse,
	heit kelle helikusõ:
	läbi om õks täl mõtsa minemine.
7555	läbi laanõ laskmine,
	heit õks tä mõtsa mõtusõllõ,
	jätt jalgo jäneselle!”
	Läts õks sis kodo vakarahvas,
	kaldo ummi kaartehe.
7560	Ese õks sis kündö küüsümähe,
	tätä nõsse nõudmahe:
	”Kui õks sääl teid hoietigi,
	söödetigi, joodõtigi?”
	Kõik õks sääl esele kitiq,
7565	armahe avvustõlliq:
	”Hüä olli õks sääl pereh, hüä pido,
	hüä rahvas, hüä ravi -
	pido oll´ õks sääl mi pereht piti,
	ravi mi rahvast piti!
7570	Muud ku sääl õks kõõ olliq sõimusõnaq,
	olliq lõimulõigahusõq.
	Mi õks kiti umma näiot,
	nimä kitiq umma veljä -
	oll´ õks sääl kats kitetävvä,
7575	armaq au antavvaq.
	Õga õks sääl mi tüllö tüki-s,
	taha-s minnäq taplõmma!
	Mi õks sääl olli oigõhõ,
	pido- olli õks meil -rahvas pehmehe:
7580	jeiväq õks nääq viina, leiväq laulo,
	hõim tandsõ tahehehe,
	Kaadsi ka õks Taadsiga tandsõvaq,
	mõlõbaq mõrs´aga.”
	Ese õks sis ütel´: “Sis oll´ illos,
7585	kul´anja väega kullus!”
	Kaadsi õks sääl oigit umatsit,
	kosilasõ kullast hõimo -
	pääle õks nääq vaka suigahuvaq,
	veid´okõsõ viibähüväq.

Pulmadeks valmistumine. Sajapäev

Hõimupäev