ВЕРМАВА, м., э. – вермань, шумбрашинь, курок касомань, эрямань виень, шачемань лездысь-ванысь. Илать коряс, В. лемс Вермада инголе (недляшиста, мзярда илядоль фкя недяля Очижинь самати, од стирьхне и цёратне тиендсть башка озондома, озкс, конань лемдезь "вербань салмат", м. Стирьхне илять аноклальхть илань ярхцамбяль (каша, калонь пярякат, салмат). Пялевети кочкальхть шрат, путнелезь ярхцамбяльть, крьвяснесть шкайнятнень инголи штатолнят. Сире бабанясь, конань тернезь тя илати, азоль пазмора, аналь В. эзда стирьхненди шумбраши, ванфтомс стирьшиснон, аф цебярь корхтамада; максоль цебярь шачема, жуватань раштама. Тя илати инжикс сашендсть рьвяяф алятне, конатнень ярхцамда меле ётафтолезь кафта стирень и цёрань ряд ёткова. Инжихнень вачкиелезь верма тараткаса, штоба В. максоль шумбраши, шабань шачема.

Варьхмодема ёткть верма тараткятнень мархта од стирьхне и цёратне якасть велева, кудга, коста ульсть тя озксса-иласа, вачкиелезь удыхнень, морасть вермань морот, коса арьсесть шумбраши, цебярь паксянь и перень шачема. Тяда меле вачкиелезь верма илиняса кардса жувататнень и мярьгольхть, штоба синь лац раштальхть (кафтонь вазня эрь тялоть), улельхть лофцукс траксне; алашатнень – цебярь пильгсна, лац покодельхть.

Кода арьсесть мокшэрзятне, вермань тараттнень эса ульсь магическяй вий, кона максоволь (вачкодемок) тя вермать мархта ломанти, жуватати. Мзярда примазь христианствать, вермань тараттнень кармасть светямост церькавса. Тя светяф Вермань недляшиня верматнень ванфтолезь сай илати кудса шкай ужеса. Повериять коряс, тя тараткятне ванфтсазь ломаттнень и жувататнень аф цебярьда (ёндолда, даволда).

Койть коряс, светяф тараткаса кудазорхне вачкиелезь жувататнень и стадань панема шиня (тунда), штоба ванфтомс синь аф цебярьда, штоба лац раштальхть. Вермась лувондовсь сярядиенди лездыкс (колмоксть вачкиелезь мархтонза сяряди шабатнень, вазнятнень, вашенятнень). Кда шабатне кассть кальдявста, то тодуснон алу путольхть верма тараткя. Вермать алу ёряльхть сюрет, конатнень мархта сотнелезь цилькнень (ётальхть, мзярда наксадольхть сюретне).

Лит.: Евсевьев М.Е. Избр. тр. Т. 5. Мордовская свадьба. Саранск, 1966.