ВАЙМЕ, м., ОЙМЕ, э. – васенда шарьхкодеволь кода ваймонь таргама, сембе эряйхненди эряма. Нижегородскяй эрзятне луволезь, што апак шачфтф ломаттнень В. ульсть Анге Патяйть кудса коволхнень фтала. Арьсесть, што В. ули шуфттнень, сембе Мастор лангонь шачихнень эса. В. ломанць сявсы шачемста тядять эзда. Лия арьсематне (сяда мекольдень) – В. сай Шкайть эзда и эряй ломанть седиса. Ульсь и тяфтама арьсема, што В. онцтонза ломанть эзда лисендель и сяльде суваль меки (сргоземати). Тя пингть ведуттнень ваймосна тиельхть кальдяв (повериять коряс, ведуттнень ваймосна сотф шяйтаттнень мархта).

Кода арьсесть мокшэрзятне, В. тушенды ломанть эзда куломстонза и арай акша, сенемаза коволнякс. Калмамань и поминкань явсематнень эса В. няфневи кой-коста сянгяря мелавнякс, кона символизировандась сянь, што В. аш телац, ащи кожфокс. Мзярда ломанць кулы, корхтайхть: "Ваймоц лиссь", м., "Оймензэ нолдызе" э., (ваймонц лихтезе).

Койть коряс, кулы ломанть ваксс путнихть стакан ведь, конанди мярьгихть "вайме ведь" и конань мархта, кода арьсесть мокшэрзятне, В. штай; ведть лангс путольхть шявня – седня тона эряфти. Тя ведти нолдальхть ярмак (монета) В. лемс, штоба ётамс сонь кувалманза.

Стакан ведть ваксс путольхть кши пакш или пачалка. Эрзятнень кулофнень явсемасост колмоце святойсь, конань кучсезе вярде нюрямса Шкайсь, сяволезе ломанть ваймонц и кандолезе ляйти штамс (ванк: Кулома). Верондальхть, што куломда меле В. может ётамс од шачиенди (шабати) или авать шабань шачема вастозонза (тяда меле сон пекияль). Кулофнень ваймосна тушендсть тона шити, кона ульсь коса-бди шинь стяма ширеса Масторть ала.

Нижегородскяй эрзятне арьсесть, што сембе кулофнень ваймоснон сявсыне эсь ширезонза колмоце Анге Патяйть цёрац – Назаромпазсь, кона цебярь В. кучсезе эсь оцю дуганонцты Нишкепазти, а кяжи, аф цебярь В. панелезе Шяйтанти.

Повериять коряс, кда кулофть ронгоц (ловажась) араль пяк понавукс, то сонь Шкайсь аф примасы, и сон якай велева, аф мувок эстеенза васта. Кда ломанць эряфса ульсь цебярь, кулофть В. ётай менельти сюреня и шяярь ланга. Верондасть, што куломда меле В. няйсыне сембонь: кие явсесы ловажанц, кода калмасазь и марясы, мезе корхтайхть сонь колганза (сяс кулофть колга аф корхнихть кальдяв).

Христианствать примамда меле кармасть арьсема, што кулофть В. нильгемонь шити ащи кудса. Тяда меле сонь прважасазь тона шити: тиихть поминкат (тяниге), якайхть калмалангс и кандыхть тоза ярхцамбяль. Фольклорнай материалхнень коряс грешникне мучендайхть адса. Верондальхть, што кулофнень ваймосна сашендыхть куду Очижис.

Эрзятне приметакшнезь: кда В. пичедезеви – куломати.

Лит.: Harva U. Die religiosen Vorstellungen der Mordwinen. Helsinki, 1952; Мельников П.И. (Андрей Печерский). Очерки мордвы. Саранск, 1981; УПТМН, Т.7, ч. 1. Эрзянские причитания – плачи. Саранск, 1972; Т.7, ч. 2. Мокшанские причитания. Саранск, 1979.