СОДАЙ ЛОМАНЬ, м., СОДЫЦЯ, э. – воражья, колдун, эсь прянь шарфни ломань… Тятнень колга корхтайхть: "Аф штадонь кядень кундамат". Синь тевонь тиемаснон эса ули мифологическяй ушеткс, кона тушенды юронзон мархта первобытнай магияти. С. ёткса улихть содайхть, конат пчкафтыхть сярядемат (акша магиясь); ведутт, эсь прянь шарфни ломатть (равжа магиясь); покраса каяйхть (сяда сидеста покракс сявондихть сливань пакарьнят), конат содайхть покраса; сят, конат маштольхть тиемс саф (порча), колдубама.
Содамошись тя ломаттненди сашенды лама ширде: шачемста, Шяйтанть или кулы ломанть эзда, конань ули тяфтама усолоц. Сяс кулома ёткть тяфтама ломаттнень ваксса афольхть ащекшне. Кода азондсазь С., синь кой-коста аф эстокиге шарьхкодьсазь эсь прянь тяфтама усолснон и ушедыхть пчкафтома апак содак или жа мярясазь тяфтама вийснон, кона лезды ломаттненди.
Сяда пяк тевс нолдаф пчкафтомань ширесь (лездысь), конань тиенделезь сембе С., – мормацямась. Тя пингть синь ётафнельхть лама магическяй тефт: тиельхть крёст пеельса или узерьса суз сяряди вастть перьф; колмоксть уфальхть, сельгомок кержи лафтубрява и стак тов. Мормацялезь ярхцамбяльть (кшить, сахарть, ведть и ст. тов), щама пяльть (тя зависендась сянь эзда, кодамоль сярядемась, кальдяв тифсь). Но С. аф сембе сярядематнень пчкафтолезь.
С. ломаттне эняльдельхть лама тевонкса. Синь эздост пелельхть и тяка пингть ванолезь мяльснон. Рьвяяма-максома илань пингть тиелезь сембонь, штоба лац каванямс С., штоба сон афоль тие кальдяв оттненди, конат пяк лафчет сявомс тя пингть аф цебярь вийхненди.
Тяфтама С. ломаттне нолдальхть аф цебярь вийть мархта ломанть, кудонь жувататнень лангс сярядема, но синь маштольхть тяфта жа максомс и цебярь, лездомс тя или тона тевса; азомс аф цебярть саманц колга, валхтомс кельгомань пичефксть мормацямать мархта (кшить, ведть, щамть лангс). С. ломаттне аф кизефнихть сярядемать колга, синь синць азсазь ломанть сярядеманц и коста сась тя сярядемась. Повериять коряс, кда С. (равжа магиянь) недяляти весть кодамовок ломань аф "тии" (аф "нолдай" теенза кальдяв), сон юмафтсы эсь виенц, может сярятькстомс и куломс.
Лувондови, што синь эсост (потмосост) кочкави лама "равжа" вийда и сяс синь ащихть пяк оцю пичефксса. Кда тя пингть маласа аш ломань, С. нолдасы потмостонза кальдяв вийть вармати или ки рашкти. Сят, конатненди саль тяфтама нолдаф сярядема, пчкафтомс ульсть пяк стакат.
С. фкя-фкянь мархта аф ладяйхть и тя аф ладямаснон сидеста нолдалезь тевс лия содай ломанть вельде, кона ульсь сяда вии. Инь оцю аф цебярть синь тиелезь рьвяяма-максома илать ёткста, коса нолдальхть кальдяв и эсь шабаснондывок. Аф цебярь вий С. тиельхть ломанть мархта васедемста (кенкшть, ортатнень ваксса), токамок кяденц мархта ломанть лафтубрянц (контагиознай магия).
Быличкатнень коряс, С. веть кудста лисенди трубава (кой-коста – толонь куй лаца), а ронгоц иляды куду (уды). С. кой-кодама тевонзон колга няфневи "оражиямот ведундо", э. озолмаса (мормацяма ведунть эзда м.), коса сон таргай фкя минутаста кшнинь алхнень эзда кшнинь мешт, конат ащесть пачкалга лангса кевть потмоса (кевсь – морять-океанть потмаксса); дикай степста сиянь колодаста таргай золотань стреласа золотань яксярга, конань, кда сивсы сярядись – пчкяй урмац. Лувондозь, што шары бурясь – С., конань духоц лиенди вармать мархта и кда ёрдамс шары буряти пеель – печксак (токасак) С. Инь цебярь прянь ванфтыкс С. эзда лувондовихть салмокссь, булавкась, крёзсь, молитвась, палакссь, конатнень эряви каннемс мархтот; тянкса сташендыхть щамти аф фкя лаца пунят. С. вакска эряволь ётамс апак корхтак, путомок пяльхкять лемфтема сурти (тиемок суз), аф эряви отвечамс сонь кизефксонц лангс; мархтонза корхтамста курмошталезь кядьснон, тонгомок пяльхкять оцю и кучка сурть ёткс; кудса меколанкт путолезь коцькаргатнень, тяльмоть; кенкшти пезфтальхть пеель. С. шнамда меле эряволь инголдамс прять сельмода, сельгомок колмоксть кержи лафтубрява. Штоба афоль уле кальдяв С. эзда (сельмодема), эряволь сонь пяленза азомс визькс, сялдомань валхт, мярьгомс теенза "содыця" или жа каршезонза сяда маряйста, чем сон, вачкодемс лафтубрянц. Штоба маштоль С. виец, сонь щамонц пялендезь салмоксса; рьвяяма-максома иласа ляцендсть ружьяса, шавсть пянакуд седяфксть эса. Повериять коряс, С. кулыхть пяк мучендазь. Синь ваймосна кадсазь теласнон аньцек тяда меле, мзярда макссазь киндиге (или кадсазь) эсь содамошиснон (ванк: Кулома). Верондасть, што С.Л. ваймоц может лисендемс калмоста, сяс тоза пезфтальхть поювонь пяль. Лувондозь, што сонь ловажанц модась аф сявсы колма кизот.
Содай ломаттнень эсь прянь вятемаснон и эрямань усолснон эса улихть синцень приметасна. Сидеста синь кудсост улихть лама косьфтаф тишенят, косьфтаф куень прят, кевнят, содамань пакарьнят и стак тов. Мзярда корхтайхть ломанть мархта, синь аф ваныхть сельмозонза, а ваныхть ширьге или модати; синь корхтайхть сетьмоста (аф пяк корхтафкшут), ломаттнень мархта аф васетькшнихть, корхтайхть синць эсь мархтост; сельмосна сяда пяк эрьсихть коричневайхть, равжет, кой-коста – аф фкя тюсонь. Семьяса эрямасна синь аф пяк лисенди цебярьста (лядонкшнихть сяда сидеста ськамост); кой-коста синь корхтайхть ломаттнень мархта кудонь кенкшть апак панчк (аф няфнесазь пряснон); сидеста шить синь удыхть, веть якайхть (вирьге тожа). Кода корхтайхть ломаттне, кой-кона С. маштыхть корхтама куйхнень мархта, содасазь жуватань кяльхнень. Синь пяк лама содайхть, кой-конат маштыхть лувома лия ломанень арьсематнень, содасазь ётай, тяниень и сай пингть. Маштыхть мума юмаф вещать, азомс салайть, няфтемс сонь шаманц ведьса. Ульсть случайхть, мзярда тяфтама С. лангс врьгятькшнесть, крьвяснелезь кудснон. Арьсесть, што С. удольхть (кода миртть-рьват) аф цебярь вийхнень мархта.
Ведуттне марясазь одс шачихнень и лиендихть теест трубава. Повериять коряс, кда шачема ёткть аф пякстасак трубать, ведунць машты лиемс, пондамс од шабать или шокшемс шабать веронц. Штоба тяфтама шабатнень эреклафтомс, панчсезь кургснон и кайсесть аф лама сока палонь пярякатнень эзда. Юмаф шабатнень луволезь С. сивфокс. Кудть ванфтоманкса С. эзда перяфть лангс повфнесть карькс мархта карь; кудса, нешкепереса кирдсть офтонь или алашань пря пакарь. Быличкатнень коряс, С. маштыхть якама модать алга, лиендема шуфттнень прява, ётама стенать пачк, шужярть плхтама, тиендема лама полафтомань (шарфтомань) тефт (кепотьксонди, руцять – нумолкс).
С. – эсь прянь шарфтыхне арсельхть тувокс, пинекс, боранкс, катокс. Эрзянь мифологическяй образсь – прянь шарфтысь Тырынтай няфнезе эсь прянц нумолкс, сомкс калонь кундайхненди, охотникненди. Тырынтайть ёрасть кундамс, но ашезь пова. Инь цебярь пингсь эсь прянь шарфтыхненди – илять, пялеветь. Васьфтемок ломанть, синь афольхть кирде: сусколезь, эвфтелезь, озальхть лафтубрязонза и ст. тов. Велетнень эса тяфтама ломаттнень содазь и наказакшнезь: кошарякшнезь ярхцама катонь, алашань палда, пиксолезь, керолезь пилеснон, шалхкснон. Арамок меки ломанькс, тя С. сярядельхть, а штоба ломаттне афольхть шарьхкоде сонь сотксонц аф цебярь вийхнень мархта, сотнелезь пряснон, штоба кяшемс керф пилеть.
Повериять коряс, инголи велетнень эса ульсть лама эсь прянь шарфтыхть. Тя усолть максолезе аф аньцек аф цебярь вийсь, но и тонафнесть лия эсь прянь шарфтыхнень эзда или синць, кода кулелезь тя тевть.
Ёфксса, конань юронза тушендыхть мокшэрзянь мифологияти, тядясь-алясь макссазь цёраснон Юртайть тонафнема атяти-ведунти. Юртай кармась тонафтыенц коряс сяда цебярьста тиема эсь прянь шарфтомать, и сяс ведунть ашель мялец максомс Юртаень меки куду тядянцты-алянцты. Арамок кодама повсь жуватакс, цёрац мярьги алянцты сонь мимс (тяфта сон лезды алянцты эрямс). Повериять коряс, аф сембе маштольхть тонадомс колдубама и эсь прянь шарфтома, сяс мес аф сембонь вийсна сатоль кирдемс аф цебярь вийть тевонзон. Но меки ки ашель. Синь ушедыхть "коськома", пичедема и курок кулыхть, апак тонатт тя усолть (сяс мес ваймось ашезь тув аф цебярь вийти).
Штоба ломаттне афольхть шарьхкоде С. колга, синь старандакшнесть эсь пряснон аф няфтемс (якасть илас, церькаву).
Лит.: УПТМН. Т. 10. Легенды, предания, былички. Саранск, 1983; Т. 7. ч. 3. Календарно-обрядовые песни и заговоры. Саранск, 1981; Мордовские народные сказки. Саранск, 1978.