ШКАЙ, ШКАЙБАВАЗ, м., ШИПАЗ, м., ОЦЮ ШКАЙ, ВЯРЕ ШКАЙ, м., ЧИПАЗ, э., ШКИПАЗ, э., ВЕРЕПАЗ, э. (чи, э. – ши; шка, э, – пинге; баваз, м. – паваз; вере, э. – вяре) – Шинь, Пингонь Шкай, Вярдень Шкай. Эрзятнень мифологияса Вярде Шкайкс лувондсазь нинге Нишкепазть (ванк: Нишкепаз).

Ломаттнень арьсемаснон коряс, Ш. оцю сельмоса, няйсыне семботь, мезе тиеви Масторть лангса. Сонь ванфсонза ули шачфтомань вий. Ш. аф аля, аф ава, сон Миронь-Масторонь тии, конань кядьса няеви и аф няеви Мирсь, сембе эряйхне. Сонь лездыенза аватне – масторонь шкайхне.

Мифнень эса Ш. эстеенза лездыкс кочкасыне аватнень, сяс мес синь, повериять коряс, марясазь сянь, мезть аф няйсазь, няйсазь сянь, мезть аф марясазь. Синдеест эряволь азондомс Ш. семботь колга, мезе тиеви Масторть лангса. Эрь шинь кшинь явома оцюнякс Ш. путозе Норовавать (тяда башка сон урожайть ваныец, оцюнянц). Тя вастть максозе теенза Ш. сяс, мес Ш. мяльс тусь сонь прянь вятемац: пяденцяста Норовавась сась аф эсь пингстонза Ш., сяс мес явондсь вачеда ломаттненди кши. Тя туфталсь тусь Ш. мяльсь и сяс Ш. ашезь мярьге ломаттненди пяденцяста тиемс тефт.

Легендать коряс, авась, кона ашезе кулхцонда Ш. аф мярьгоманц пяденцяста тевонь тиемс (шорясь шапакс), ульсь кепотьф Ш. кядьса вяри шити и ёрась авать кулофтомс. Авась илядсь шис сяс, мес мекольце пингть, куломда инголе, арьсесь аляфтома-тядяфтома шабатнень колга. Тянь инкса Ш. нолдазе милостенц и авать ашезе шава нинге сянкса, штоба сон азолезе тя аф мярьгомать ломаттненди. Ш. путсь конязонза якстерь-сенем тюсса покаряв тяштькс сянь инкса, што сон ульсь Ш. пяле. Повериять коряс, тя шиста сявомок аватне афольхть иче шапакс Норовавать шиста.

Ш. эряма вастоц – Шись, коса сон уды покаряв васта лангса. Ломаттненди аф няеви, сонь эздонза моли аньцек пара, но кда кяжияфтсак кальдяв тевса – наказатанза. Мокшень устнай народнай творчествань материалхнень коряс, Ш. арсель нумолкс, тувокс, татаронь кумбаравкс. Верондасть, што Ш. якай веть ломаттнень вальмалга кулхцондома (кие мезень колга корхтай, арьси; кие мезьса аф пяк мялю, мезе анай; кинди мезе аф саты).

Мифологияса Ш. рьвяяй масторонь стирь лангс. Легендатнень коряс, Ш. тисы Масторть, ломанть, а штоба ломаттне афолезь юкста эсь пряснон, Ш. мярьгсь Шяйтанти тиемс кяжи духнень и путомс синь шяйхненди и ведень томба васттненди.

Тиемок Масторть, Чипазсь уды колмогемонь кизот шуфта ала, колмогемонь кизот – шуфта лангса. Сон стяй сярядемать эзда (види пильгонц санонзон), тапасы пильгонц мархта алть, коста лиси пяк мазы стирь, кона арай (Чипазть мяленц коряс) теенза рьвакс (эрзятне теенза мярьгихть Анге Патяй: ванк: Анге Патяй).

Мокшэрзятнень арьсемаснон коряс, кда ломанць тись кальдяв, Ш. наказасы сонь аф цебярь вийхнень вельде. Но кда Ш. эняльдельхть сянь колга, штоба сон тя кальдявть сяволезе меки, Ш. кардалезе аф цебярь вийть (мярьги Шяйтанти ащемс ведьса). Луволезь, што Ш. кяжияф мяленц эряволь солафтомс аф аньцек фкя ломанень молитваса (велень, кудонь озондомат Масторонь Шкайть лездыензонды: Кудазоравати, Кардазавати и ст. тов). Сяс Ш. эняльдельхть эрь озондома ушедомста, кодама ба Масторонь шкайти озондомась афоль уле. Аньцек Ш. эняльдельхть цебяренкса пяк шуроста.

Ш. культоц ульсь пяк вии. Ломаттне афольхть ёта шинь сюрелдатнень туркс, конат ётальхть вальмава, сяс мес пелельхть шятямс Ш. пильгонц. Тяфта жа афольхть уе ведть лангса шинь сюрелдатнень туркс, штоба, повериять коряс, аф токамс венч каймоса Ш. сакалонзон. Кода ни азфоль, Ш. эряма вастоц Шись, сяс сон религиозно-магическяй илатнень эса лемдеви кода Ш. или кода сонь символоц.

Озксста (кудонь) Ш. лемс печкольхть вашеня, ёмла кудонь жувата, нармонь, тиельхть пярякат, поза. Тянь ётафтолезь кизоти кафксть: тундать ушедомста, мзярда виделезь сёроть; сёксенда, анамок цебярь тяла. Кизонь тефнень пингста анальхть Ш. эзда бславама тевонь тиемс, азольхть сюкпря сянь инкса, штоба шиньберьф покодемс шумбрашиса. Христианствать примамда меле мифологическяй Ш. образсь ётась христианскяй Ш.

Ш. лемоц тя пингс сидеста азови эсь прянь ваномаса, тонафтомаса "Шкайсь вяре, сельмонза алот". Луволезь, што Ш. менельста нолни пикскя колма святой мархта кулыть ваймонц инкса.

Лит.: Mainof W. Les restes de la mythologie Mordvine // Journal de la Societe Finno-Ougrienne. Helsingissä, 1889; Милькович К.С. Быт и верования мордвы конца 18 столетия // Тамб. епарх. вед. Часть неофиц., 1905, №18; Мельников П.И. (Андрей Печерский). Очерки мордвы. Саранск, 1981; УПТМН. Т. 10. Легенды, предания, былички. Саранск, 1983.