ШАЧЕМА, м., ЧАЧОМА, э. – сотф лама магическяй илань тев мархта. Кой-кона илатнень эса, конат ульсть сотнефт пеки аватнень, шабань шачемать и сонь васенце эряма шинзон мархта, ванфтовсть мифологическяй эсь ширет. Лама эсь прянь ванфтомат, озолмат и башка илань тефт тиендсть сянкса, штоба ванфтомс шачф ломанть и шачфты авать. Фольклорса, кой-кона моротнень эса, кепотьксонди, Тюштянь колга (ванк: Тюштя), тя пингс ванфтовсть пяк сире арьсемат аф эсь лацонь (чудеснай) пекиямать колга. Пекиямать ашезь лувонда аньцек алять и авать марса маласа удомаснон эзда. Мокшетнень и эрзятнень поверияснон коряс, эряволь нинге нолдамс тевти и цебярь, а кой-коста и аф цебярь вийхнень. Кепотьксонди, мокшень мороса "Васальгя" тядясь и алясь эняльдьсазь фкя стирняснон, кона сяльде арай Шкабавазти рьвянякс, Пурьгинепазти рьвакс. Штоба аф шачфтови авати пекиямс, тиендсь лама илань тефт. Кепотьксонди, воражиясь тиель шапаксста няка и пялеветь аф шачфтови авать мархта молель ляй трвати. Авась, валхтомок карксонц, крёзонц, нолдамок шяярензон, праль ниле пильге лангс. Воражиясь салаване азоль молитва, уфаль и корхталь: на, вага, тянь тейть, а теенк макск тонценнеть.
Мокшень и эрзянь шачемда инголень повериятнень и приметатнень юрса ащи мифологическяй принцип, конань вельде эсь ширесь анай (тии) эсь ширень эняльдема. Пеки авати ульсть пяк лама аф мярьгомат: афольхть мярьге ваномс пожарть (пексот пидесак шабать шаманц), кулоф ломанть, калекатнень лангс (штоба афоль кула шабась и афоль шача калекакс), якамс калмалангс, пиксомс тувоть (шабась может шачемс щетина мархта); аськолямс коромысла, кувака байдекнень, дугань туркс (штоба авать пекса шабась ащель лац эсь вастсонза); ярхцамс нумолонь сивольда (шабась может шачемс нумолонь трва мархта) и ст. тов. Лувондовсь оцю грехокс обжамс пеки авать, сяс мес, мокшэрзятнень арьсемаснон коряс, пеки авать (шабать) ванфтсы Кудавась (ванк: Кудава). Афольхть атказакшне пеки авати ярхцамбяльса (конанди сон шочась), сяс мес тя атказамась, кода арьсесть, аф лац молель шабать лангс и шачемда меле сон кармаль маряма тя аф сатыксть. Кой-коста афольхть атказа шочай авати ярхцамбяльса сяс, мес тя пингть пелельхть сонь эздонза кода пелькс ломанень эзда.
Ломаттнень приметаснон коряс, конатнень эса ащи фкя лацонь принцип, ёрасть содамс кие шачи: стирь или цёра (кда пеки авать пекоц покаряв – шачфты стирь, оржа – цёра) пеки авась муй пуня – стирня шачи; кда семьяса мекольце цёранять шяяренза алгапулосонза ащихть пулонякс – стирня шачи. Мокшетне приметакшнезь: кда пеки авась, няфтемок кядензон, кядьлапшензон няфтьсыне вяри – стирня ули, алу – цёра. Эрзянь рьвяяма-максома иласа омбоце шиня ёрдальхть вяри кши кочам и кда сон праль вяри кувонц лангс – цёра шачи, ляпоц вяри – стирь.
Койть коряс, шачфтомста авати эряви сембе соткснень, каркснень ёрдамс. Мокшэрзятнень, кода и лия нароттнень, ульсь повериясна магическяй вийть колга, кона эрясь соткснень эса и синь эсь лацонь ширеснон колга эрявикс пингста. Сяс, штоба лац шачфтоль авась, юксолезь сонь щамстонза сембе соткснень и тяфта жа – кудста. Аватнень, конат шачфтольхть васенда или шачфтольхть кальдявста, нолдалезь шяярьснон, ётафтолезь шачфтыть перьфке венцяма штатолть, ляцельхть ружьяста, панжелезь церькавонь ортатнень, гайкфтелезь церькавонь пайкнень; эрзятне эняльдельхть Анге Патяйти (ванк: Анге Патяй), кона лездоль шачфтыхненди, ванфтолезе шачфтыть и шабать шумбрашиснон.
Материалхнень коряс, мокшетне и эрзятне кяшелезь, сеполезь сай шачфтомать и шачфтома пингть, кона сидеста ётнесь баняса, калдазса или голландка фтала. Шачфтома пингть эрзятне афолезь аза нльне эсь тядяснонды, сяс мес верондасть, што тяфта сяда лац шачфтыхть и сембось ули пара. Тяда башка, ульсь поверия, што авась и шабась тя пингть ульсть пяк лафчет сельмодемати, порчати. Сяс шачфтома пингть сёлголезь пянакудонь трубать, вальмятнень, штоба ведунць афоль сував тя пингть и афолезе тие шабать. Шачфтыть ваксс сельмода путольхть кши.
Шачфтомда меле (илать коряс) мирдти максольхть симомс нярьхкамазонь салу, перецень ведь и корхтальхть: "Кода ульсь рьвяцти стака, тяфта и тонга мучендак".
Иденьбабась лездоль шачфтыти, ванфтолезе шабать аф цебярь вийда; павазу эрямати стирьшабать ашкодолезь алянь панарс (кельгомань магия). Мзярда иденьбабась шталезе шабать, сон нолдаль ведти сиянь монетат (тянь мархта арьсельхть козя эряма), сал и тумонь лопат, штоба шабась улель кеме, шумбраши мархта и ламос эряль. Стирняти ведти нолдальхть келувонь лопат, штоба сон улель мазы. Тянкса шабать ашкодолезь сянгяря или сенем котфса (менелень и масторса шачиень тюс) и корхтальхть: кода касы тишесь модать лангса, кодама мазы сянгяря сон, стане жа и тон каст-кепотть. Кда шачфтыть аф эстокиге лисель идень тодуц (шабать вастоц), сондеенза максольхть симомс позаста или квазста тустт. Ульсь тяфтама ила: штамда меле калмамс идень тодуть и бокон вядьмоть седялу, мезсь сотф повериять мархта, што аф шачфтови, шабафтома аватне могут синь саламс и тиемс кальдяв шачфтыти. Штоба тага шачель цёра, идень тодуть калмалезь куд шкай ужеть алу, кда стирь – ломанень паксяти. Кда авась афоль ёра шачфтомс колма и сяда лама киза, идень тодуть калмалезь колмоце, нилеце ветеце (и стак тов) шиня шачфтомда меле. А кда афольхть ёра шачфтомс шабат, идень тодуть путолезь каннеф карьти и пезфталезь поювонь петькольса шяйти. Повериять коряс, кда сивомс фкя лисьф "кядь" тише юрста (юронц эзда мольсть вете лисьфт) – аф шачфтат киза.
Магическяй целенкса тиенделезь тяфтама тефнень: сотолезь идень тодуть шачфтыть шяярензон мархта, штоба шабась улель пяк сотф тядянцты и инксонза арьсель, лездоль; штоба стирнясь араль цебярь котфонь кодайкс, керолезь идень тодуть пакшенц и тонголезь синь кодвастти или кштирдема вастти. Приметакшнезь, кда ванфтомс шабать васенце пеенц кемгафксува кизозонза, то сон мзярдовок аф кадсы эсь тядянц-алянц.
Пингозонза апак каннек шабать (ашкодомок нуланяса) колмоксть каймоса тонголезь лямбе пянакудти, коста тяда инголе таргалезь пидеф кшить. Тя пингть "шачфтыти" эряволь кизефтемс, мезе пидихть. Сондеенза отвечальхть: пидеса пингонц самс эряма-ащема. Тянкса тиендельхть и од Ш. Шачфтысь мадоль ся вастти, коса ётась шачфтомась, и сонь повозонза путолезь шабать (тоста иденьбабась таргалезе шабать).
Штама-нардама илатне, конат сотфольхть баняса штама илать мархта, лувондовсть пяк эрявиксокс, сяс мес авась и шабась, кода арьсесть мокшэрзятне, шачфтомда меле ащихть аф цебярь вийть ала. Сяс аф стак шачфты авать шталезь колма банянь уштомаса. Но нильгемонь шити молемс сон сяка лувондовсь аф чистайкс и афольхть мярьге теенза якамс церькаву, калмалангс, кудс, коса ульсь кулоф ломань и ст. тов.
Шабать Ш. меле маткати повфтальхть ленгянь карень каркс. Повериять коряс, кда карькссь курок наксады или сязеви – кудса курок кулы ломань.
Алять и инжихнень баняв самдост инголе иденьбабась сяволезе шабать кядезонза, путолезе столбанять лангс пянакудть инголи, штоба няфтемс сонь Юрхтавати (ванк: Юрхтава).
Васенце шиня шабать шачемда меле тиендсть "кши озондома", коза тернелезь сембе малань юронь ломаттнень. Озондома ёткть иденьбабась лувсь молитва, анамок шкайхнень-ваныхнень кядьста паваз, шумбраши. Шачфтомда меле шачфты авати киньге афольхть нолда, мзярс сон афоль пиде туста каша и пачат. Койть коряс, шабать шачемда меле вальмялангть почердалезь кулуса, вальмятнень крёсталезь, од шачить перьфке ётальхть келувонь тяльмоса и эняльдезь илань шуфтть (сяда сидеста – акша келуть) ванфтомс шабать аф цебярь ломаньда, сельмода (тяфта ванфтолезь кодгемонь шит). Эрзянь мифнень коряс, од шачить эряманц (судьбанц) тиелезе Нишкенде-тейтерь, э. (стирь) – Анге Патяйть (ванк: Анге Патяй) и Чипазть (ванк: Шкай) стирец.
Шачемда меле приметакшнезь шабать эряманц. Лувондозь павазукс ся шабатнень, конатнень ульсть оцю касомсна, кувака шяярьсна, тяште и шачема васта мархтот, "панарса" (конань шачемда меле косьфталезь и пинге ётазь сявонделезь мархтост оцю тевс), "пильге лангса" (инголи пилькт), шачфт идень тоду пакш мархта. Кда стирнять шамац шароль алянц пяли, цёранять – тядянц – тяфта жа луволезь павазукс. Шабатнень характерснон приметакшнезь шяярьснон тюсснон коряс: шинь тюссотне (рыжайхне) – пяк отькорьхть, равжет акша шяярь пакш мархта – ведутт; шабатне, конат шачфт пей или лама пей мархта – улихть содай ломанькс. Оцю мяль шарфнесть шабать эряма шинцты: эряй шабать кочкярянза лисьфт, оцюфт пиленза; кда шабать кеподелезь вяри пилькта – и сон кеподелезе прянц вяри. Луволезь аф эряйкс кафкса ковса шачихнень; кда шабась афоль юваде эсток шачемда меле; кда сельме ужетне ульсть шавот или ламос аф пякстави пря кучкац, кавлала оцю лотконят и ст. тов.
Эрзятнень эрямаса шачемда меле колмоце шиня тиендсть башка нюрямти шабань путома ила. Нюрямть повфталезь поталакти куд кучкати и вельхтялезь котфса, конань мархта ульсь вельхтяф од рьвянять цёрать пяли ускомань онавац. Тя илань шиня пидельхть пярякат, повфталезь нюрямть и колмоксть крёсталезь сонь пеельса, путольхть тодуть алу пяряка, васоньбеельхть. Люкштядемок стастоне нюрямть, бабась мярьголь: "Люкштядян пильге пяли – катк пилькне улихть кемот; пря пев люкштядян – ёню ульхть". Тяда меле шарфтолезе копоренц нюрямти и, люкштядемок сонь, корхталь сянь колга, штоба шабась лама удоль, афоль аварде. Штоба тага шачель цёраня, нюрямти путольхть алянь щапт.
Шабать васенце кизонь эрямстонза оцю мяль шарфнесть ванфтоматненди аф цебярь вийть эзда, сяда пяк ведуттнень, конат маштольхть, повериять коряс, полафтомс шабать. Кой-коста шабать ванфтоманкса крксесть пеельса ташта монета шачема вастонц вельхксса. Мокшэрзятнень арьсемаснон коряс, шабань нулатнень повфнемс пелькс, сяс мес мархтост налхколь Шяйтанць или ведунць и шабась кармаль удома кальдявста или сярятькстоль. Штоба панемс аф цебярь вийть, кона маштоль сувамс шабать потмос, ведуттнень эзда лувфтольхть озолма (заговор).
Кда шабась сидеста авардель, то шинь мадомда меле или стяма пингстонза кандолезь сонь ортатненди, сюконяльхть кенкш касякненди и анальхть максомс шабати шинь и вень удома. Пяк аварди шабать шталезь тинголангса шобдавань расаса. Штоба афольхть уле шабать понда лангса сярядеманза, штамда меле ведть пяярделезь чистай вастти.
Шумбрашинкса ванолезь башка илатнень, аф мярьгоматнень. Шабать лихтелезь васенце тундань атяму пиземть алу, штоба сярядематне афольхть педе понданц лангс; эшелялезь страстной недяляста (Великай постонь мекольце недяляня Очижида инголе) рана тунда, вержиста, солаф лов ведьса; афольхть мярьге нюряфтомс шава нюрямть (шабат аф кармайхть шачема, шабась кальдявста ушеды удома). Штоба аф эвфтемс шабать, сонь афолезь няфне ваномати.
Лац касомати, эрямати шяярьхнень афолезь нара кизоти топодемс; афольхть мярьге сялондомс шабань андомста (аф цебярь ули шабати). Сельмода путнельхть шабатнень повс ведень панчфт, палакс. Сяряди шабань кргас повфнесть замок, штоба сярядемась афоль ёта лиятненди; пчкафтоманкса синь ётафтолезь кафту явф шуфтть пачка или кафта маласа ащи шуфтонь ёткова (тумоть, келуть – цёранять, поють – стирнять); шабать, кона ламос афоль ту якама, матолезь порогть ваксс шуфтонь сюма алу. Содай ломанць "керолезе" сонь сярядеманц узерьса и корхталь: "Сярядемать керса, аф цебярь ломанть керса, якама нолдаса (азсы лемонц), пилькненди вий максан". Афольхть мярьге сявомс нюрямть ся семьяста, коса кулсесть шабатне. Семьятнень эса, коса шабатне ламос афольхть эря, синь "мишендезь" вальмава нищайхненди или васенце васетьф ломанти. Шабать венептелезь (максолезь) вальмава кши кочамть мархта и тяда меле тядяц лисель ортатненди и рамалезе эсь иденц. Повериять коряс, тя илань тевсь васькафтолезе аф цебярь вийть, конанди тяни афоль тиев кальдяв шабати. Кой-коста иденьбабась ашкодолезе шабать рдазу тряпкатненди, конатнень мархта баняса пяксталезь вяльдярьмать, и максолезе сонь вальмава лия авати. Тянди мярьгольхть "саламс шабатнень" Ведявать (ванк: Ведява) кядьста. Кда шабась ламос афоль корхта, сонь лихтелезь васенце церькавонь пайгонь гайкфтемати Очижинь васенце шиня.
Штоба пчкафтомс шабать, сонь тядяц содай ломанть мархта пялеветь якаль баняв и тоса пидель солянка. Сяльде синь лисельхть, кенкшть кадолезь панжада. Авась кайселезень щамонзон, араль ниле пильге лангс и, шаштомок фталу, суваль баняти (ётамок пачкалгонь вельхкска). Тяда меле сон ушедоль ярхцама пинекс. Тя пингть воражиясь юваделезень ярхцама мифологическяй духнень и эняльдель лездомс.
Афольхть мярьге тядяти сюдомс эсь шабанц: шабась мог куломс, арамс мокнайкс или сяволезе сонь аф цебярь вийсь. Тяда башка, луволезь, што сюдоф шабатне аф эряйхть ламос. Шабатнень эвфтемс путолезь тевс мифическяй обраснень. Кепотьксонди, эрзятне эвфнелезь Руцьк-Пецькть образонц мархта, кона якай веть и эвфнесыне шабатнень. Мокшетне эвфнелезь шабатнень Бобо образть, офтть, врьгазть мархта.
Лит.: Беляева Н.Ф. (см. с. 286–287). Родильные обряды мордвы-мокши Атюрьевского района Мордовской АССР (конец XIX – начало XX вв.) // Этнокультурные процессы в Мордовии. Саранск, 1982. с. 51–63; Kuzebai Gerd. Etnographica. Helsinki, 1993; Девяткина Т.П. Народные приметы мордвы (мокши и эрзи). Саранск, 1994.