РЬВЯЯФТОМАСЬ-МАКСОМАСЬ, м., УРЬВАКСТОМА, э. – ила, семьянь тиема, соткс, коса пяк лац няфневсть мокшэрзятнень мифологическяй шарьхкодемасна. Кельгомань Оцюнякс, лездыкс и ваныкс нижегородскяй эрзятне лувондозь Анге Патяйть. Од венцяйхне-рьвяяйхне озондомаса терделезь Анге Патяйть куроконе самс теест, морасть лемозонза шнамань морот, келуфнень перьфке ётафнесть хоровотт.
Ульсь лама Р.М. илат: вешезь, салазь (аф видекс – эсь ётковань ладямаса – стирть и цёрать; сяда шуроста – видекс; сонць стирсь туль цёрать пяли). Лама илатнень, моротнень эса, конат ульсть XX векть ушедомда инголе, корхтави рьвянять рамаманц и миманц колга, кона сувсесь мирденц куду кода уре; сяльде – рьвя, м., урьва, э. Сембе инь оцю смузьсонза Р.М. няфнесь рьвянянь сявома лия плямаста эсь плямазост. Пингонь ётазь Р.М. эса инь оцюкс арась велень (общинань) содамась сянь колга, што тисть тяфтама ила.
Инь ётафневикс ульсь вешема мархта Р.М., конань сотолезь рьвяямань иласа ломаттнень инголе: кудатне кундальхть кядьта; "тяштень путомась" (путольхть стирть мяштьс сюлгам – "тяштелезь" эсь тяштьсост); анальхть той и ст. тов. Пяк сире пингть (христианскяй верать примамда инголе) ульсь вешема "мельге панезь". Шкайхненди и атятненди эсь лацонь илань тиемда меле (цёрать аляц кероль кши кочам, таргалезе потмостонза ляпоть и каяль тоза медь), пялеветь, сембонь эзда салаване, сон туль алаша лангса стирть пяли; путолезе медь мархта кши кочамть орта столбанять лангс, чакаль вальмяти локшеса и ювадель, што сась вешема. Тяда меле куроконе туль ардозь меки куду. Кда стирть раднянза сонь сатолезь – рьвяяма-максома ила афоль уле (стирть афолезь макса).
Мифологическяй Р.М. юрса ули салавань арьсема Р.М. колга, што кельгомась тиевсь шкайхнень мяльснон коряс (цебярьгофтомс Мирть). Кучф вярде, теенза афоль эряв тядянь-алянь мяль, илань тефт. Сяда меле XVIII в. малава, кой-коста пяк отькорь цёра путоль кельгома стирть ортанц лангс кши и сяльде азолезе сонь алянцты, што сявсы стиренц рьвакс.Тяда меле теенза афольхть атказа. Апак вешк Р.М. сяда пяк тиендсть тядяфтоматне-аляфтоматне или ашу тядятне-алятне.
Р.М. ульсть пяк лама форманза. Христианскяй верать примамда инголе мокшэрзятне могли рьвяямс снярксть, мзяра синь маштольхть трямс рьвя (симдемс-андомс). Тя пингть кувалма ванфтовсть азондоматне ломаттнень поэзияса. Преданиятнень, моротнень эса няфневи Р.М. инцестонь формаса (мзярда дуганть рьвяяфтолезь акать лангс или алясь рьвяяль эсь стиренц лангс). Марстонь Р.М. няеви моротнень эса, коса морсеви шачемась, сонь символонза, конат морсевольхть рьвяяма-максома, календарнай илатнень эса. Лия пингста тяфтама моротнень афолезь мора, сяс мес тя лувондовсь аф цебярькс.
Р.М. ульсь эрь ломанти эрявиксокс. Мокшэрзятнень цёрасна, стирьсна пяк шуроста эсь пряснон кадолезь апак венцяк, рьвяяк (ульсть стирьхт, конат тульхть монастыри монашкакс). Ванолезь и кой-кодама аф мярьгоматнень рьвяямати-венцямати, кепотьксонди, малань радня мархта; кда лия верац (афольхть мярьге венцямсь, рьвяямс татаронди, сяда шуроста – русненди). Пяк ванолезь, штоба семьяса венцяльхть, рьвяяльхть фкя-фкянь мельге (оцюста сявомок). Повериять коряс, кда ёмлась (цёрась или стирсь) рьвяяй или венцяй сяда инголи – сявсы оцюфнень павазснон.
Коень Р.М. башка, ульсть и стамот, мзярда овть сяволезь рьвять пяли (содамокс совамо, э. – овкс сувама). Тя тиендевсь снярда, кда кудса ульсть аньцек стирьхт (сувафтольхть ов сяда сидеста оцю, ёмла, но аф кучка шачф стирти). Овкс сувальхть тяфта жа тядяфтопне-аляфтопне, ашу ломаттнень ёмла цёрасна. Овкс сувальхть синь эсток или рьвяяма-максома ила ёткть, кона тиеволь стирть алянц пяльде.
Моронь поэзияса няфневи венцямда, рьвяямда инголе стирьхнень-цёратнень эсь прянь вятемасна. Пингта ётамок тянь колга корхтальхть кальдявста: рьвяямась стирть лангс, кона шачфтсь, лувондовсь аф павазукс. Тяфтама пингста рьвяяма-максома илат афольхть тиенде. Атянь-авань кудста од рьвянять нолдалезь аф ортава, а фталга перяфть туркс, конань яжселезь рьвяяма-максома илань кудатне. Повериять коряс, кда стирсь, кона шачфтсь, лиси кудста ортатнень пачк или пере кенкшка, то сембе аф цебярьхне, конатне теенза састь юмафтомок стирьксшинц венцямда инголе, илядыхть тядянц-алянц кудс и сяс куду сай лама аф цебярь. Кда сон туль переть пачка, то сембе аф цебярьхнень сон сяволезень мархтонза.
Омбоцеда Р.М. тиелезь алятне, конат илядсть рьвафтома и сяда шуроста – аватне. Сятнень, кит тушендсть лия аля мархта удома, наказалезь. Мирдть и рьвять ёткса явома ашель. Тяфтама случайхть, мзярда рьвясь туль мирденц эзда, ульсть пяк кржат. Туф рьвять атятне меки мрдафтолезь мирденцты куду.
Р.М. ульсть лама символонза. Инь васедевикс – кружамась: ётафтолезь оттнень пряснон вельфке лентать (ванк: Венцяма); оттне (мокшетне и эрзятне) ётальхть шрать вакска колмоксть кержи ширде сявомок види ширети венцямда-рьвяямда инголе; предметонь символхт: суркс, копша, м. (покаряв кши), онава, (рьвянянь сявома вельхтерда, конань потмоса усколезь алашаса рьвянять). Р.М. символикац няеви и шяярень лиякс сендемаса (причёскань полафтомаса: васенце или омбоце рьвяяма-максома шиня од рьвянять озафтолезь мокорь лангс и од стирнясь явфтолезень сонь шяярензон авакс – кафта пяли), прянь щамаса, лангонь щамаса-наряжамаса, якафса, лама илань тевса, конат няфтсть мезеньге стакань ётама и сотфоль сисем числать мархта, кона няфнесь пяк ичкозе васта (сисем кит, паксят, вирьхт, велет, ляйнят); тапамань иласа (сяканянь коламась, рьвяма-максома кшить пачк явомац кафта плямань ёткова: стирть и цёрать). Р.М. символизировандай цёрать и стирть сотксснон (нардамаса сотомась, симомась, ярхцамась фкя яндаваста, фкя пярякада), од кудти тонафтомась (од рьвянять лемдемац пянакуд инголе, сонь андомац илань ярхцамбяльда авозенц кядьста).
Символическяй Р.М. ванфтовсь фольклоронь тексттнень (ёфкснень, преданиятнень) эса. Содафт Р.М. азондомат салаф авать и офтть колга; стирть-локстить и охотникть, кона салазе сонь локстиень щамонц. Мифологическяй моротнень эса няфневи пяк сире пингонь рьвяяфтома-максома Пурьгинепазть, э. (Атямшкайть) и Масторонь стирть – мокшень Васальгять и эрзянь Литовать ёткса.
Р.М. ванфтовсь апак венцяк стирть калмамста: рьвяямань-максомань щамонь наряжамась, символическяй стирень максомань илань ётафтомась поминкаста (мзярда кулоф стирть налхколезе стирь ялгац), приметатнень эса (кда онцтот няят рьвяяма-максома ила – аф паронди), содамаса. Кой-кона велетнень эса Р.М. пингсь тиеволь снярда, мзярда цёратне тонадольхть кодамовок эрямань тевонь тиема. Кепотьксонди, цёрати мярьгольхть рьвяямс аньцек снярда, мзярда тонадоль медень кочкама (борти) тиема.
Мифологическяй ушеткс ули лама рьвяяма-максома иласа. Кой-кона илатне – кушакса шрать ункстамац, оттнень шятямасна меколанкт шарфтф орть лангс, синь почердамасна сёроса, комляса, од рьвянять плманжанзон лангс цёрашабань озафтомась и ст. тов тиендевсть магическяй целенкса (лувондозь, што тя кармай лездома шачфтомати), хозяйствать касфтоманцты. Пяк сире мифическяй цебярень, павазувонь, а тяфта жа цёрань, стирень символкс лувондовсть иланди пидеф пярякатне (ванк: Пярякат), копшатне, салсь.
Мордватнень-шокшетнень "сериямо" иласна (серемс – кайгиста ювадемс), кона ётафтоволь марнек рьвяяма-максома илада меле васенце тунданя Великай Постста, няфнесь оттнень цебярь люпштамаснон природать стяфтоманцты. Сериямаса моральхть морот оттненди, коса синь шналезь. Стирьхне якальхть кудта кудс, моральхть, анальхть каваняма; оттне синь каванязь (кда серияма ломаттнень мяльс афоль ту ярхцамбяльсь, синь апрякалезь оттнень).
Р.М., кода стирень эрямань полафтома, кода символическяй кулома и мельганза – шачема, няфтьф иласа, конань тиендезе стирсь. Рьвяяма-максома илада инголе, атёкшнень васенце кукорямда меле, сон лама шит арсель ортатнень фталу чистай васту (ванькс таркав э.) и, кеподемок кядензон вяри, ваномок шинь стяма ширети, эняльдель стямс Нишкепазти, Кардо Сяркти, э. (кардаз ваныти), Касторгати (Нишкепазть стиренцты). Сяльде колмоксть ёталезе эшить кержи ширде сявомок види ширети молемс. Эрь ётамда меле, тиемок модати сюконяма, сон мрдаль "чистай" вастти, "стяфтолезень" кулоф атятнень, "терделезень" синь рьвяяма-максома илатненди. Сяльде туль куду, моралезе шобдавань зарять, стяфтолезень кудонь эряйхнень, мадоль ингольце эземть лангс, явсель, юваделезень стирь ялганзон явсемс сонь стирьксшинц ся вастти, коса ульсь символическяй куломац и шачемац.
Рьвакс моли стирть ванфтолезь шкайхне. Сон эняльдель Кардо Сяркти, э. вельхтямс, крёстамс крёзса, качаптомс кадиласа. Кудть луволезь кода оцю Миронь-Масторонь модель: киякссь – кшнинь (модась), поталаксь – сиянь (менельсь), кафта вальмат (Шись и Ковсь).
Рьвакс моли стирть илань штамакс (чистендамакс) ульсь банянь илась, коса тяфта жа тиендсть содама стирть мирденц характеронц, синь эрямаснон колга.
Оцю васта Р.М. занцесть эсь прянь ванфтоматне (аф цебярь вийда, ведунда). Илать коряс, рьвяяма-максома алашатнень лувкссна ульсь аф чётнай (колма, вете, сисем); синь ардсть пяк вишкста, штоба аф цебярь вийсь афоль кенере шорямс илань тефнень. Торонь кандысь локшеса, пеельса (торса) крёсталезень оттнень алашаснон; "офтсь" (ава или аля, кона лангозонза щаль меколанкт ор, вазь, варягат) вачкоделезень тяльмоса сувай инжихнень копорьснон; симделезь содай ломанть (колдунть) винада, шоряф кулуса, пинень вацьса; вяри кенкшти путнельхть пеель и ст.тов. Мокшетне и эрзятне прянь ванфтоманкса сидеста тиендсть шумонь эффект: ляцендельхть ружьяста, чакальхть байдекса ведаркатнень, стенать ланга; тапалезь сяканятнень. Эрзятнень ульсь эсь башка иласна "кудань ливтема" (кудань лихтема), кона тиендеволь рьвяяма-максома мекольце шиня сянкса, штоба панемс кудста аф цебярь вийть, кона сувась тов лия ломаттнень мархта. Повериять коряс, кда аф ётафтомс тя илать – кудса аф кармат цебярьста эряма – духне кармайхть веть кштима-морама.
Ванфтолезь кудонь яндаватнень, щапнень, удома вастонь ацапнень, илань кшитнень, пярякатнень и ст. тов (колмоксть види ширде сявомок кержити ётафтолезь палы шявть шапакс парьнять перьф). Мокшетнень ульсь башка иласна: качаптолезь ("плхталезь") рьвакс моли стирть щамонзон; рьвяяма-максома илада инголе од рьвяяйхнень-венцяйхнень щамснонды пезфнельхть салмокст, булавкат; вастснон алу путнельхть оржа предметт (васоньбеельхть, узерь и ст. тов). Васенце удома веня торонь кандысь и кудавась прважалезь оттнень утому, коса поталакса ашель мода. Оттнень прважамста морсельхть визькс морот, конат, кода арьсесть, лездольхть цебярь Р.М. и тяка жа пингть аф цебярь виень эзда ванфтомс эсь прять.
Тяфтама илатнень эса, кода "лемдемась" (од рьвяняти максольхть од лем мирденц кудса; илась тиеволь пянакуд инголе), "эши лангс лихтемась", од рьвянянь пачань пидемась (мзярда теенза колендезь шоряльхть: салалезь пачатнень, шашнелезь ведарканзон, пяярькшнелезь веденц), "цестень сявомась", м. (стирькс шинь сявома) няфневихть од рьвянять мифологическяй сувафтомац, тонафтомац од кудти.
Мифологическяй арьсематне, конат сотфт тяфтама шарьхкодематнень мархта кода вярьсь, алсь, няевихть мокшень "куцьфнема" иласа, кона тиендеволь рьвяямань-максомань омбоце шиня. Од рьвяняти эряволь мумс мирденц маластонь эсь юронь ломаттнень, конат, илать коряс, куцельхть калдаз пряти, шуфта лангс (кда сяда вяри – сяда пара – мала менельти) и каземс синь. Эрзянь рьвяяма-максома шумордамань "органь сявордома", э. (органь пяярдема, м.) иласа терделезь мифическяй лездыхнень и кулоф атятнень мекольце рьвяяма-максома илань ярхцамати и тяда меле пяярделезь оргатнень позань кядьгоста чистай вастти.
Лит.: Евсевьев М.Е. Мордовская свадьба. М., 1931; Девяткина Т.П. Мокшанские свадебные обряды и песни. Саранск, 1992.