ПОМИНКАТ, м., э. Тиендезь кулоф ломаттнень лемс сянкса, штоба няфтемс теенза цебярь арьсемать и тяфта жа сюконямс кулофненди паронкса. П. эса вановихть мокшэрзятнень верасна тона шити, шиса эряень мяльхне, мифическяй сотксне кулофнень и эряйхнень ёткса. Сире пингонь илатнень коряс, куломда меле П. тиенделезь котоксть эрь ёткшиня. Христианствать примамда меле кармасть ётафнема помондама шит рузонь илатнень коряс (3-це, 6-це, 40-це шитнень). Но эрь вастса, коса эрясть мокшетне и эрзятне, ванфтовсть и сире пингонь койхне. Тяфта, христианскяй лаца П. башка Тамбовскяй губернияса тиендсть П. и ветеце шиня куломда меле. Саратовскяй губернияса П. инголе афольхть уда (тяфтамоль койсь). Лама велетнень эса П. колмоце шиня путнельхть вальмялангс кулофти ярхцамбяль.

Инь оцюкс лувондовсь П. нильгемонце шись, конань эрзятне лемдезь "кулынь пора". Арьсесть, што ломанть ваймоц нильгемонь шит ащи кудса, ярхцай и сими сембе раднянзон мархта и аньцек тяда меле туй лия эряфти. Явсематнень эса корхтави, што ломанть ваймонц инкса сашендсь Шкайть фкя ангелоц и эстокиге сявозе менельти, коса теенза максыхть васта. Нильгемонь шити самс ванольхть пяк лама аф мярьгомань тефт: афольхть тяе киякс, штоба аф токамс кулофть пильгонзон; аф эряви вельхтямс мезьсовок шабань нюрямнять, штоба нюрямонь нюряфтомста аф токамс нюрямонь вельхтердаса кулофть. Городищенскяй уездса 40 шити самс шра лангса кирдельхть яндава, куцю и ванфтолезь кулофть вастонц шрать ваксса. Нильгемонь шинь помондаматнень ётафнелезь тяфта жа, кода ингольцетнень, аньцек тя шиня прважалезь кулофть кудста. Сяс тянь инкса тиендсть лама илань тефт, конат мокшетнень и эрзятнень ёткса ётафневольхть аф фкакс.

Тамбовскяй губерниянь мокшетне П. инголе якасть кулоф ломанть алашанц мархта вири, штоба керомс шуфта, конань инголи лоткаль алашась. Кудса тя шуфтста керольхть "вастозама мокорь", штоба П. шиня озафтомс лангозонза Вастозайть (ванк: Вастозай), кона налхколезе кулоф ломанть. Саратовскяй губернияса П. инголе якальхть алашаса калмалангс кулоф ломанть тердема (тяфта жа и ингольдень кулоф юронь ломаттнень) куду; теенза ацальхть васта и озафтолезь тоза Вастозайть. Кой-коста П. инголе ушнесть баня, тердемок кулоф ломанть штама (тяфта жа терделезь кулоф юронь атятнень); тя пингть крксесть монета и эрь монетань сявомста азолезь кулофть лемонц. Азф тефнень тиелезь сяс, штоба штамс куломать, цебярьгофтомс атятнень мяльснон, эняльдемок синь лац примамс од кулоф ломанть.

Койть коряс, нильгемонце шити печкольхть жувата: кулоф аляти – боран или бука, авати – тракс или уча; тянь мархта, кода арьсесть, лездольхть кулофнень эрямаснонды тона шиса. Кой-коста иланди печколезь кулоф ломанть алашанц, но аф эрь пингоня, сяс мес сонь лангсонза васеделезь и прважалезь кулоф ломанть. Кепотьксонди, Пензенскяй губернияса Инсарскяй уездса, кода и лама лия васттнень эса, кона налхколезе кулоф ломанть, алашанц (кулофть) лангса ардоль калмоти, кероль сонь пулостонза шяярь пакшкя и ёрдалезе кулофть калмонц лангс, азомок тяфтама валхт: "На, тейть, алаша, путк тевс, тят макса киндиге".

Илань печкомать тиемда инголе ётафнельхть лама магическяй тефт: цебярьста андомок жуватать, эрзятне ашкодолезь сонь ронгонц нардамаса (мокшетне сотолезь сонь сюронзон лангс), анальхть кядьстонза прощения и максольхть вал максомс тона эряфса сондеенза лама тише, почф; жуватать явселезь, палалезь, мярьгольхть сондеенза анамс эсь азоронц кядьста (тона шиса) пара шумбраши тя масторонь эряйхненди.

Жуватать веронц кочкалезь башка яндавас, штоба сяльде сонь каямс эрь илань шаваняти. Прянц, пильгонзон калмалезь (кулофть духонц кудста калмозонза прважамста), а кеденц повфталезь шуфтти. Илань ярхцамста корхтамс афольхть мярьге. Инголи, крксемок кулофть шаванянц и куцювонц, щамонц, кочкалезь сембе илядыкс ярхцамбялень сускопнень и ёрялезь синь шукша лоткти. Омбоце шиня тя илань тефнень тиелезь тага весть.

Мзярда прважалезь кулофть, толть мархта, конань тиелезь ломаттне шявнянь шовазь, крьвястельхть толмар (пенгятнень тянди аноклалезь тяка жа шуфтста, конань эзда тиельхть мокорь Вастозайти). Тя толть, конань туркс, рахазь и морамок илань морот, кядьсост крьвястьф штатол мархта, комотнельхть помондай ломаттне, лемделезь "од толкс", м., э. или "пращама толкс".

Помондайхне фкя-фкянь прява ётафнесть штатолхт и сязельхть аф лама шяярь прястост или сакалстот, конат, повериять коряс, эрявихть кулофти, штоба путомс седь, кда сонь кинц кувалма васьфтеви "море". Кулоф ломанть прважама кой-коста якальхть сире аватне, конатнень кядьса ульсть шокшеф пакарьхть. Ваномок калмоти, синь прощандальхть кулофть мархта, ёряльхть пакарьхть и ласькозь тульхть куду помондайхненди. Повериять коряс, кие илядоль фталу, ся кулоль сяда курок. 1876 кизонь материалхнень коряс, пакарень ёрямда и ласькомда башка, мокшень илати сувсесь кафта авань сяськомась (кда помондалезь авать) или кафта алянь (кда помондалезь алять). Кие илядоль сяськф, ся, кода арьсесть, кулоль сяда инголи.

Краснослободскяй уездса 40-це шиня илять якальхть раднянь кудга кулоф ломанть помондама; кулофть прважамда меле моральхть сире морот и Вастозайть вельде, кона налхкозе кулоф ломанть, эняльдсть, штоба кулоф ломанць афоль са меки эряйхнень ёткс.

П., конатнень ётафнелезь пяле кизода и кизода меле, аф пяк явфневсть П. эзда, конатнень тиелезь нильгемонь шити. Кулоф азорть лемс мокшэрзятне кадондсть васенце кизоть апак нук сёра пакш (кить крайса); азоравать лемс – каньф или иляназ пакш. П., конатнень эса нулезь кулоф ломанть урожаенц, печкольхть бука, сёлгомок сонь сельмонзон акша руцяса. Помондай ломаттне тульхть паксяв, коса нулезь кулоф ломанти катф сёра пакшть и сотнелезь пулфнень (ветеда лама афольхть тие) и кадолезь паксяв тарвазть мархта. Мокшэрзятнень арьсемаснон коряс, кие токалезень тя пулфнень, ся, шять, кулоль. Кой-кона васттнень эса шужярьста кодальхть каркс, конань удавась каннелезе шиньберьф. Мзярда нульхть кулоф ломанть вастонц эса, эрзятне тарвазть кирдезь оржа пяльда, а керф сёротнень ёрялезь пряснон вельф фталу. Нума пачк, коса ульсть сембе юронь ломаттне, кафксть ярхцасть илань ярхцамбяльда. Саратовскяй губернияса ульсь тяфтама кой: кулофть лемс кадольхть сембе паксянь шачихнень эзда пакшкя.

Тяда башка кулоф ломаттнень помондакшнелезь и оцю юронь илатнень пингста (рьвяяма-максома иласта, кстиндамаса и ст. тов).

Лит.: Примеров А. Религиозные обряды и суеверные обычаи мордвы Краснослободского уезда // Пенз. епарх. вед., 1870, №16; Орлов Н.П. Мордва – мокша // Пенз. губ. вед., 1876, №107–108; Милькович. Быт и верования мордвы в конце XVIII столетия // Тамб. епарх. вед., 1905, № 18.