ПЯШЕ, м., ПЕКШЕ, э. – илань шуфта, конанди мокшэрзятне озондсть и анасть пара. М.Е. Евсевьев сёрмадсь Наровчатовскяй уездонь Вечкенино велень "пращёнай пяшетнень" колга. Повериять коряс, тя пяшетне шачсть кафта акань верста, конатнень сязендезь врьгасне. Легендать коряс, пяшетнень ёразь керомс, но васенце токамста синь эздост лиссь вер. Пекшепазти (Пяшепазти) озондомста эрзятне анасть кядьстонза сёронь шачема. Мокшэрзятнень арьсемаснон коряс, эрь сярядемась саль ломанти кода наказама кяжияф шкайхнень эзда, и штоба пчкафтомс сярядемать, эряви ваномс синь мяльснон. Повериять коряс, пращёнай пяшетне лездольхть пчкамс. Синдеест эняльдсть лездомс сембе сярядематнень эзда, но сяда пяк аватне, конат афольхть шачфта и кинь кулольхть шабасна. П. кандольхть кодама повсь каваняма, озондсть ниле пильге лангса, анамок лездома. Сембе тя кантф казнятнень (котфтнень, руцятнень, од панархнень и стак тов) повфнезь шуфта лангс; сяряди шабатнень кргаста валхнелезь крёзснон, панарснон, карксснон и кадондозь П. алу. Синь арьсесть, што кадомок щамть-карямть – туй сярядемась. П. якасть и озондсть снярда, мзярда эрявсь молемс, но сяда сидеста тянь тиендезь кизонда, сёксенда.

Лит.: Евсевьев М.Е. Мордовская свадьба. Саранск, 1990.