ПИНГЕ, м., ШКА, э. – Миронь-Масторонь мифологическяй шарьхкодема. П. лувондсазь сотксокс ётай, сай, тяниень пинкнень мархта. Ломаттнень эрямаса П. явсазь "тя шикс" (тя пинге, ши или эрямань пинге) и "тона шикс" (тона пинге, ши или тона шинь эрямань пинге). Тона П. аф явови, сонь аш пец. Сянь коряс, кодама ульсь ломанть прянь вятемац тя пингса, азолезь, мезе кармай улема тона эрямаса (кальдяв или цебярь). Приметакшнезь, кда кие аф кельгсы ваноманц толть лангс, тона шиса кармай эряма шобдаса.

Ломаттнень арьсемаснон коряс, П. пяк курокста моли, сяс мярьгондихть: "Пингсь ётай – афи фатят". Эрямань пингть явсазь кафта пяльксокс: васенце пялькссь моли пяк стаста, омбоцесь – сяда курок. Тяфта жа аф фкакс лувондовсь шить П.: шиньгучкада меле сон моли сяда курокста. Повериять коряс, "шись шобдава моли пеккедь лангса, шиньгучкать – врьгаз, илять – нумол лангса". Калмамань илань койть коряс кулофть лихтелезь (тяниге) кудста шиньгучкада меле, но якамс тя пингть калмалангс афольхть мярьге – повериять коряс, кулофне аф няйсазь сайхнень.

Мокшэрзятнень верованияснон коряс, ули ушедома и шумордама П. Ушедома П. – тя мифическяй П., мзярда тиевсь вечностсь. Тя няеви мифнень эса, коса корхтави Мирть-Масторть шачеманц, шкайхнень колга. П. шумордамац (пец) сотф синь юмамаснон мархта (ванк: Тюштя). Сяда меле П. пенц (Шить) кой-коста сотнелезь ковонь валдонь юмамать мархта. Шинь П. ванолезь Шить, Ковть коряс. Тяфтама шарьхкодема, кода "сутка", ашель. Ульсь ши и ве. Шись сувафнель шинь валдонь пингонь шарьхкодема (ши валдть и Шить – фкя лемсна: ши, м., чи, э.). Шобдавань зарясь (шинь пингть азыец) – Марья – мифологияса няфневи лездыкс. Илядень зарясь (илядень пингть азыец) – Дарья. Теест эняльдсть лездоманкса лама сярядемада (пяк лама мормацямаса).

Илядень П. мархта сотнефт лама аф мярьгомат: ушедомс од тев (аф лиси), керомс шяярьхнень (аф кармайхть касома), тяемс киякс (сялондомати), лихтемс кудста сорхнень (няфтьсак кудть шяйтаттненди, кармайхть шоряма эрямаса), максомс ярмак (юмайхть) и стак тов. Повериять коряс, илядень пайгонь морамста аф эряви озондомс, сяс мес аньцек тя пингть озондыхть и анайхть прощения кулофне, конат юмафтозь эсь пряснон аф эсь куломасост.

Шинь, ковонь, кизонь П. явондсазь цебярькс и аф цебярькс (ару и аф ару). Пельксокс лувондовсь шиньгучкась, кона, ломаттнень шарьхкодемаснон коряс, аф цебярь П. Тянкса ванолезь лама аф мярьгоматнень: аф эряви лисемс кудста, ушедомс мезевок тиема. Колдунонь или аф цебярь виень пингокс лувондолезь пингть пялевеста ушедомок и мяк атёкшень морама пингть самс. Повериять коряс, атёкшне морайхть пялеветь – араласазь ломанть ваймонц аф цебярь вийда, кона тя пингть мучендай эсонза.

Илядень П. лувондолезь сяда цебярькс, штоба тиемс лама магическяй тефт: пчкафтомань, воражиямань, гададондамань. Илять (сяда сидеста пялеветь) лисендсть ки рашкти "пращенгас", штоба панемс сельмодемать, тифть. Синцень пингсна ули и лия магическяй тефнень тиемаса. Оцю христианскяй иласта (Очижиста, Кльхчяняста, Роштуваста) тиендсть прянь ванфтомань тефт. Кльхчяня веня вальмяпрятнень лангс тиендсть крёскат (аф цебярь вийсь афоль сува куду). Очижинь сама шида инголе эшеляльхть, штоба афольхть сяряде китнемаса. Цебярь П. лувондовсть илань шитне. Ульсть лама аф мярьгомат фкя илань ёткста сявомок омбоцети. Кепотьксонди, Очижиста сявомок Вознесенияти молемс вальмава мезевок афольхть ёря; Очижиста сявомок сёронь видемати молемс афольхть крьвясне тол (ванк: Очижи); Роштуваста сявомок Кльхчяняти молемс сюцельхть кштирдемс (Спасительть щамонза-ризанза пулияйхть).

Илань тефнень тиемста путнельхть П. (афолезь ётафне рьвяяма-максома илатнень Постста и ст. тов). Ломаттнень арьсемаснон коряс, тевонь тиемась (кальдявста или цебярьста) ульсь сотф сянь мархта, кодама пингоня тиелезь тевть, сяс вешельхть цебярь П. (шинь, недялянь, ковонь), штоба ушедомс тевть (рьвянянь вешема, видема, кудонь путома, эшиень шувома и ст. тов). Вержиста, пяденцяста, недляшиста од тев афольхть ушеда, шавшиста афольхть виде (аф шачи сёрось), но шись лувондовсь тёждякс – тя шись Ведявать, кона штай и кяляцяй ломаттнень эса. Лама аф мярьгомат ульсть сотфт "чистай понедельникть" мархта (сире пингть мярьгольхть "пильгонь синдема ши"). Тя шиня афольхть крьвястя тол, афольхть мора; сюцельхть максомс мезевок фкя кудста омбоцети; каземс, мезевок максомс пандомда. Кие тя аф мярьгоматнень афолезень кулхцонда, синь могли юмафтомс эсь хозяйстваснон, паршиснон и тиемс кальдяв сембе юрти, велети. Но кда тя шиня кивок саль азорть пяли, кудазорсь колмоксть токалезень коцькаргаса сувайть пильгонзон, штоба афоль уле кудса мезеньге кальдяв или жа ёфсикс киньге афолезь нолне куду (штоба афоль сува "стака" пильге ломань). Марнек, понедельникти мярьгольхть "Од Ковонь ши" и лувондовсь цебярькс: од ковсь валдоптолезе тевть.

Недялянь кучка шить лемоц – вержись, шять, ульсь сотф эсь лацонь илань тиемать (иланди печкомать) мархта Шкайть (Пингть и Шить) лемс.

Инь цебярькс и аф стакакс луволезь шуваланять, кона ульсь вирень мешнень шкайснон-ваныснон шикс (сон кельгсы покодеманц). Тя шиня вешелезь рьвянятнень, ушедкшнесть од тефт, тиендельхть сире пингонь илат-озкст (ванк: Бабань озкс, Анге Патяй). Очижида ингольдень шуваланясь лувондовсь очищениянь шикс. Мокшэрзятнень арьсемаснон коряс, тя шиня тундань солаф эй ведсь лезды штамс ронгонь сярядематнень, сяс и эшелякшнесть ляйса, шудерьксса, муськольхть, шталезь кудть Очижити.

Пяденцять луволезь Норовавать шикс (ванк: Норовава). Тя шить мархта ульсть сотфт лама аф мярьгомат: афольхть ушта баня, афольхть озафта нарвай – лефксне ламос аф лисихть (сяда пяк – Очижида инголе); афольхть кштирде – сокоргодат, афольхть муське – пожар ули.

Ёткшись – тона шинь Шкайть шиц. Сокаень-видиень и покодемань ши. Тя шись лувондовсь цебярькс. Недляшись (недлячись, э.) – инь чистай шись, жуватань ваныть-лездыть шиц. Тя шиня афольхть тие тефт – грех.

Ломаттнень верованияснон коряс, шачемань П. тиелезе сембе ломанть эряфонц. Пяк павазукс лувондовсть сят, конат шачсть ковть ушеткста, шуваланяста, ёткшиста и оцю христианскяй илань шиня. Верондасть, што сят, конат шачсть сяда инголи: сисем, кафкса ковда меле – аф цебярь ломатть (стакат): ванфсна, кядьсна, пильгсна.

Сембе кизонь пингть луволезь кизоть кувалма, сяс тяниень валхне "киза" и "кизонь пинге" азовихть фкакс: "Киза". Повериять коряс, високоснай кизось пяк стака ломаттнень шумбрашиснонды, жуватань раштамати; цебярькс лувондозь кизоть ушедома пингонц.

Миронь-Масторонь пингокс, кона няфтелезе модать лангса покодемать, жувататнень мархта тиемань тефнень, мастор лангонь пингть, погодать лувондозь ниле кизонь пинкнень: киза, м., кизэ, э.; тяла, м., теле, э.; тунда, м., тундо, э.; сёксе, м., э., конатнень яволезь Ковть коряс. Тяниень синь лемсна сяда мекольдень пингонь (сявфт рузонь кяльста). Ковть и пяле Ковть лемсна фкя – ков, м., э.

Лит.: Mainof W. Les restes de la mythologie Mordvine // Journal de la Societe Finno-Ougrienne. Helsingissä, 1889.