МОДА, м., э. – инь оцю шачфтыень вий, эряйхнень и кулофнень вастсна. Сяс М. ванолезь мяленц и пельсть эздонза. Фкя мифнень коряс М. покаряв, омбонцнень – ниле ужеса. Эрь ужети калмаф боцькя, коса эряйхть Вармавать цёранза (ванк: Вармава). Арьсематне ниле Масторонь ужетнень колга, шять, пяк сотфт светть ниле ширензон мархта: шинь стяма, мадома, лямбе и якшама ширетнень.

Мифнень коряс, М. кучкаса кассь аф сембонь лаца келуня, конань колма тарадонза тиезь ронгонц, колма пяли рашкне – юронц. Келуть музе оцю нармонць (Шкайть кучфоц), тись ронгонц лангс пиза, алыясь колма алхт, нарвазень синь и эздост лиссть колма акат-сазорхт – Шкаень лездыхть: Норовава (ванк: Паксява), Вармава (ванк: Вармава), Вирява (ванк: Вирява).

Фкя мифологическяй сюжеттнень эса М. тиезе морянь илста Шкайсь (ванк: Шкай), Чипазсь Шяйтанть мархта; лиятнень эса – Шкайсь, уендемок оцю ведьга уткань образса, чёпафтсь оцю ведть потмаксс (инголи марнек ульсь аньцек ведь), лихтсь нярьсонза моданя, сельгозе и модась кармась касома.

М. колма ушетксонза, колма пяк крхка вастонза. Сонь ужензон вакска уихть колма калхт, кирдемок лангсост колма сталмот: оцю калсь – содай калсь – шинь стяма ширеть, кучка калсь – шить пяленц (кучкать), ёмлась – шинь мадома ширеть. Лувондозь, што М. лангса улихть цебярь и аф цебярь (наксада) вастт, конат пяк люпштайхть юрть, семьять, кудонь жувататнень, паксянь и перень шачемать лангс. Содай ломаттне мярьгольхть тиемда озондома ила тяфтама аф цебярь васттнень эса, печкомок сараз, тува или жа марнек кадомс кудть, кона путф тяфтама аф цебярь вастти.

Рьвяяма-максома шиня афольхть мярьге кочкамс рьвянять арзянц кудса, кда поталакть лангса ульсь мода (лувондовсь аф павазу эрямати), сяс мес арзясь ащесь кафта М. ёткса (поталакса и кияксть ала). Рьвянять явсемаса М. – куломань, аф цебярень символ. Няемс онцтот М. – аф паронди.

М. путнелезь тевс и колдубамаста (магическяй илань тиемста): кучемс сярядема, аф цебярь вий. Кальдявонди ломанть пильгокинзон эзда сявф М. пакшть калмалезь калмоти. Верондасть, што тя магическяй тевсь куломшка пелькс. Сяс и путолезь тевс М., конань кандолезь калмалангста.

Повериять коряс, кда ломанть сидеста пупоряй пильгоц, прашенды – то сон тись пяк лама кальдяв и сяс "модась аф кирди эсонза". Христианскяй койть коряс кулофть понданц "ётафтсазь" (макссазь) М.

Тя пингс лувондсазь, што колдунть понданц М. аф примасы колма кизот и сяс сонь ваймоц якай пичедезь ков повсь тя шиса сембе вастова, апак содак покой. Пяк оцю грехокс лувондовсь покодемась модать лангса васенце понедельникста Тройцяда меле (рузкс: Духов день).

М. лемс тиендсть (эрь пингть) башка озондома ила, коса печкольхть равжа сараз и анасть М. эзда цебярень сама: шумбраши, сёронь шачема. Кда ломанць праль М. лангс, эряволь колмоксть сельгомс тя вастти и азомс: "Ётаза-потаза токафсь".

Лит.: Harva U. Die religiosen Vorstellungen der Mordwinen. Helsinki, 1952; УПТМН. Т. 1. Эпические и лиро-эпические песни. Саранск, 1963; Т. 10. Легенды, предания, былички. Саранск, 1983.