МАСТОРАВА, м., э. – сембе Масторть ваныец, кирдиец. Мокш-эрзянь мифологияса тя образть улихть лама тевонза. Сон аморфнай, но шары ломань шири. М. кирдьсы сембе Масторть стаканц, ули шачемань виец, кона тисы сембонь, мезе эряви ломаттненди, сембе эряйхненди Масторть лангса, кинь ули ваймоц. М. аф няеви, якай Масторть ланга и тяфта жа алганзовок. Кой-коста няфневи алянь ширец. М. мирдекс лувови Масторонь Кирдись (ванк: Масторонь Кирди). Мифологическяй моротнень эса М. аф мазы, равжа шама, кувака шалхка, эчке трва.

М. лемс тиендсть озондома илат. Озксонди печкольхть равжа сараз. Озондоматнень эса, конатнень ётафнезь паксянь видемда инголе, эняльдсть М. кядьста шачи киза, шумбраши; сёксенда М. азольхть сюкпря цебярь паксянь и перень шачеманкса. Тяда башка, М. эняльдсть ётафтомс сярядематнень, конат састь Масторть эзда: модати прафне, кельмоматне и ст. тов. Верондасть, што М. машты кучемс ломанти сярядема. Кда тя лисендсь, якасть ки рашкти пращенгас, коса воражиясь азоль озолма (мормацяма) сянь колга, штоба М. простиндалезе сяряди ломанть (тя пингть колмоксть палалезь модать, ёрдальхть меккятть кержи лафтубрять вельфке сотф котфс аф лама сура, комля и тяда меле тульхть куду меки апак ватт).

М. машты кошардомс, наказамс и нльне юмафтомс ломанть эряфонц. Аф эсь волянь примама христианизациять пингста ломаттнень прянь вятемасна М. полафты. Аф ламода лиякс арайхть (содержанияс коре) и кой-кона мифне Масторть лисеманц-шачеманц, сембе Масторонь ведьса юмамать колга; колма оцю калхнень колга, конат кирдьсазь Масторть и стак тов. Моротнень эса М. и лия сире пингонь шкайхне няфнесазь эсь кяжснон ломаттнень лангс, конат синь кадозь (ётасть лия верати). Тиемок М. эняльдеманц, эрзянь Нишкепазсь эсь нармоненц-лездыенц (ястребть) вельде азсы ломаттненди, што Шкайсь пяшкодьсы ведьта или плхтасы Масторть, юмафтсыне ломаттнень, конат юкстазь пароть, пяшкодьсы Масторть лия ломаньца. М. эняльди Шкайти, сонь лездыензонды, штоба синь нолдалезь кяжснон ломаттнень лангс, конат тусть лия верати и тяка жа пингть М. аварди ломаттнень инкса, синь цебярьснон инкса, конань юмафтозь, сяс мес од верать саманц мархта Масторсь кальдявста кармась максома шачема паксятненди и перетненди, жувататне кармасть аф цебярьста раштама.

Лит.: Harva U. Die religiosen Vorstellungen der Mordwinen. Helsinki, 1952; Маскаев А.И. Мордовская народная эпическая песня. Саранск, 1964; Мельников П.И. (Андрей Печерский). Очерки мордвы. Саранск, 1981.