ЛИТОВА, э. – масторонь стирь, конань образоц сотф мифологиять мархта. Л. лемоц аф фкя. Кой-кона велетнень эса мярьгольхть тя мифологическяй образти Витова, Литува, Литума, Литюва и стак тов. Шять, кода арьсесь профессорсь А.И. Маскаев, "Лифти" (ливти, э.) ава валсь – тя лиенди ава. Преданиятнень эса, коса корхтави мокшэрзятнень колга (коста синь шачсть), Лифта лемть каннесы эрзятнень шачфтысна; тяса, шять, ули и марстонь финонь шире (ушеткс), кона няфти аф аньцек "лиенди", но и "соткс" (сравниндак эстонскяй Литума лемть мархта).

Маластонь мифт ульсть аф фкя лем мархта: мокшетнень – Васальгя, эрзятнень – Сыржа, Азравка и ст. тов. Мифнень эса Л. (аф содави мес) – аф кельгома (тядянь – алянь пяльде) стирь (или кельгома, но шачсь аф кода сембе ломаттне – чудеснайста). Тя тядянь аф кельгомась эсь стиренцты няфнесы посвятительнай илатнень, аф мярьгоматнень эсь ширдень од ломаттнень мялень турксокс, конатнень кирделезь башка куттнень эса (мзярда оттнень саль стирень и алянь пингсна). Л тяфта жа сяськи эсь тядянц-алянц мархта. Аф ваномок Л. мазышинц лангс, сонь маштоманц сёрмань тиемста, Л. кивок аф ёрай сявомс рьвакс. Тяфта жа Сыржа мифть эса стирть вешсы равжа ломань, конань сельмонза палсть тол лаца и кона сась кати-коста, аф содаф Масторста (ванк: Пурьгинепаз).

Фкя мифологическяй сюжеттнень эса Л. арай Ёндолти рьвакс, Нишкепазти рьвянякс (ванк: Нишкепаз); лия мифнень эса – мокшень Шкабавазти рьвянякс, или Шкабавазсь саласы Л. и сявсы менельти, но аф содави кинди. Сидеста Л. саласы Пурьгинепазсь, фатямок сонь ульцяста стирень тундань хороводста или илань нюрямста, кеподемок сонь эсь нюрямсонза менельти. Л. саламанц пингста ушедоль давол или пизем, конат кучевольхть менельста тя салама пингти. Саласазь Л. обедъёткть, мзярда ушедоль атям или саль туця, сетьме шинь пизем. Кой-коста Л. сонць эняльди нолдамс теенза менельста или туцяста серень цинзерса сиянь нюрям, штоба куцемс тянь вельде менельти.

Менелень семьяса Л. ёфксонь паршиц (козяшиц), но сон аф сембонь лаца рьвяня (аф сембонь лаца праванза). Максомок Л. кудонь тев, теенза путольхть аф мярьгомат: аф эряви ваномс види лафтубрява, ваномс волшебнай вальмава, сувамс утому (сисемцети). Сембе сонь эрямац менельса, кода и Масторса, сотф подчинениять мархта (эрь пильге аськолксонц теенза эряволь азомс кудонь оцюфненди). Но Л. кой-кона аф мярьгоматнень аф кулхцондсыне (сон панчсы сисемце утомть и няйсы Масторть лангса эсь тядянц-алянц кудонц).

Л. моли мялец менельса эрямста и лажады масторонь эрямати, алянцты, тядянцты; сидеста аварди, эсь прянц марясы аф павазукс, эняльди нолдамс сонь инжикс тядянц-алянц куду. Мирдец, авозец Л. нолдасазь, но путыхть условия: Л. эряви ащемс тядянц-алянц пяле аньцек фкя част (и пяк шуроста – колма частт); аф эряви мархтост пращамс, аф эряви прважамс, штоба кивок афолезе сода, ков туй Л., кода сон куци вяри. Фкя моронь вариантса Шкабавазсь наказасы сянь, кие тя аф мярьгомать шорясы (шавсы ёмла дуганть, кона прважасы Л. кенкшти молемс). Л. якай эсь тядянц-алянц пяли ськамонза, конат сидеста ашельхть кудса. Сон кады эсь колганза тяштькст (што ульсь кудса) шрать лангс, стенати. Аньцек кой-кона моротнень эса Л. сай менелень мирденц мархта тядянц-алянц пяли.

Л. колга моротне морсевихть тяниге; сонь лемонц каннесы Саранск ошень моронь ансамблясь.

Лит.: Йаков. О мордвах, находящихся в Нижегородском уезде Нижегородской губернии. СПб., 1848; Маскаев А.И. Мордовская народная эпическая песня. Саранск, 1964.