КУПАЛЬНЯ, м., ВАЛНОМА ЧИ, э. – ётафневи Иван Купалань (сисемце июльста), Иоанн Крестителень шачема шиня. Тя К. шись мокшэрзятнень эрямаса христианизацияда меле кармась ётафневома аф ламода полафтфокс (сотовсть кафта верованиянь илат).

Тя пингс лама мокшень и эрзянь велетнень эса К. инь оцю илань тев – фкя-фкянь валондомась ведьса. Арьсесть, кда сяда пяк валондыхть фкя-фкянь, сяда пара ули. Сяс сидеста валондсть ведаркаста (прянек-пильгонек). Ломаттнень арьсемаснон коряс, тя илась тиендевсь сянкса, штоба цебярьгофтомс шумбрашить, панемс аф цебярь вийть. Верондасть, што К. веня ведсь, сембе модаса шачись сявонди волшебнай вий. Илать коряс, К. илядня кочкальхть панчфт (купальня панчфт, конатнень косьфнезь и ванфтолезь синь кудса сай илати). Мокшетнень поверияснон коряс, К. веня сембе тишетнень лангса палыхть штатолхт. Фкя панчфть лангса палы кемгафтува штатолхт, конат няевихть аньцек видешинь ломаттненди. Кда кивок сязи аньцек ёмла лопаня тя панчфста – кармай содама вирень жуватань, куень, нармонень кяльхнень.

Тяфта жа верондасть, што К. веня калмаф паршись (кладсь) лисенди лангу сиянь алаша лаца золотань ашкса и золотань пайгоняса, кона маряви аньцек сянди, кинди мярьги Шкайсь мумс тя паршить. Штоба пчкафтомс эсь пряснон, К., шинь стямда инголе, сярядихне якасть ляи. Тяда инголи тиендсть эсь лацонь магическяй тефт: колмоксть озондсть, лисендсть кудста копорь пяльде; молемок ляйти киге афоль эряв корхтамс (аф удалай). Ляйса колмоксть сувальхть ведти и анальхть К. эзда шумбраши. Куду сашендольхть тяфта жа апак корхтак и мадольхть удома.

К. шиня афольхть мярьге максомс (пандомда) кудста мезевок (макссак шумбрашицень и вийцень); афоль эряв покодемс, кочкомс переса (аф ули шачема). К. приметакшнезь и погодать: цебярь шись – цебярь кизоти, пизем – аф манити.