КУЛОМА, м., э. – сембе Масторонь эряйхнень песна. Мокш-эрзятнень арьсемаснон коряс, пинге, мзярда ломанць ётай эряень мирста "тона шити" (светти), тона мирти. К. и куломада меле эрямась ульсть сире пингста инь оцю идеякс. Повериять коряс, К. и ангелсь якайхть най марса.

Аф ваномок сянь лангс, что К. пингсь ломанти апак макст содамс (сон сашенды апак учт), ломаттне сяка ёрасть содамс К. пингонц кодама повсь приметатнень, гададондаматнень коряс. Кепотьксонди, гададондасть Роштувада, Од кизода инголе: тевс нолдалезь кши пакшкятнень, шяярьхнень, конатнень путолезь вальмя лангс (кинь лемс кши пакшкясь или шяярьсь юмай – ся кулы тя кизоть). Приметакшнезь нармоттнень, кудонь жувататнень аф эрь шинь пряснон вятемаснон коряс. К. кулякс лувондозь эрь нармонть, кона суваль вальмава куду, или куд пряса равжа каркнай варсить; ямсь, кона лисель цюгуннять вельхтяманц алда; венцяма суркссь, кона праль венцямста и стак тов. Аф кода эрь шинь сараснень прянь вятемсна (лийкстазеви вяльдярьмава, атёкшекс юватькшни), пяк кувакаста суви пинесь и сонь шалхкоц кельме; катось ащи видептьф пильгт (и тяфта жа пулоц) кенкш шири, омбоцеда панжихть кой-кона шуфтонятне (марлюсь, вишнясь) тяфта жа сотневольхть К. мархта. Марямок кудазоравать куфцеманц – лувондозь К.

К. азолезь и удомста няемань оттне: пеень прамась (ингольце – шабань К., вер мархта – мала юронь ломань), бохарямонь шувомась, кудонь путомась, модамарень путомась, акша нумолсь, букась, ёндолсь; атякшень печкомась, од ковсь и ст. тов.

Ломаттнень арьсемаснон коряс, К. можна "шаштомс", "таргамс" пингонц лама кодама повсь магическяй тиемаса или ёжушиса: кепотьксонди, кукоряй саразть эряволь печкомс, таргамс кргапаренц, плхтамс, кулуть ёрямс паксява; ононь няемда меле, кона азоль куломать колга, ломаттне тонгондолезь лемфтема сурснон вальмя лазфнень ёткс и мярьгольхть: "Катк туй эздон". Ёфксонь сюжеттнень эса ломанць кяльготнесы К. и тянь мархта сон кувакафтсы эряфонц.

Информаттнень азондомаснон коряс, инголи кой-кона ломаттне, сяда пяк сиретне, сярядихне марязь эсь К. и теенза анокласть: рамсесть куломань щамат, "соборендафтолезь пряснон" (церькавса), кой-кит "няелезь", што теест састь кулофне (инксонза), сяда сидеста кулоф тядяц, аляц или маластонь ломаттне, конат юваделезь мархтост тона шити. К. инголе пращасть малань юронь ломаттнень мархта. Штоба кулыть ваймоц аф стакаста лисель, кайсесть ведь, крьвяснесть штатол, ащесть вакссонза апак корхтак.

К. фольклорса няфтьф лама образса, явленияса: пяк кяжи ава или атя акша щамса, кона таргасы ваймоть кургста сурса. Лия материалхнень эса аш кодамовок К. образ. Сон аньцек аф цебярь, пелькс, равжа, кядьсонза пеелем, конань мархта керсыне пильгста и сембе теласта саттнень. Эрзянь кулыень явсематнень эса (лайшематнень) К. сашенды колма сюролда лаца: сянгяря, равжа, акша и сявсыне пильге и кядь вийхнень. Или К. вастс Шкайсь менельста нолни пикскяняса нюрямня и кучи колма святойхть: васенцесь сявсы мялямть, омбоцесь – пильгонь вийть, колмоцесь – ваймоть, ашкодсы акша руцяс, путсы меднай нюрямти, вельхтясы парьхциень нардамаса и кандсы берякти штама. Тяда меле кеподьсы ваймоть Нишкепазти и сон арьси, коза тиемс ваймоть, кодама вастти путомс. Тяда башка, мокшэрзятнень арьсемаснон коряс, К. ваймоц туль менельти шяярень вельде, кда ломанць эрямаса ашезь тие кальдяв.

Тяниге лувондсазь, што сяда тёждяста кулсихть праведникне, а стакаста – грешникне, сяда пяк – колдуттне. Колдуттне (конат тисть лама кальдяв ломаттненди), кода арьсесть мокшетне и эрзятне, кулольхть аньцек снярда, мзярда киндивок макссазь эсь колдубамань содамаснон. Штоба сяда тёждяста колдуттненди куломс, тиендельхть кой-кодама магическяй тефт: юксолезь щамснон, панжелезь вальмять, кенкшть, кеподелезь кудста маткать (коса ащесь кулома лангса колдунць), штоба сонь ваймоц лисель; штоба аф эйфтемс ваймонц, маластонь ломаттне ащельхть апак корхтак. Повериять коряс, кулома пингть менельста праль или мадоль тяштсь. Эрзятне кулыть трванзон ваделезь медьса, сяс мес арьсесть, тя пингть сонь кургсонза пяк сяполь. Вайме лисемда меле кулоф ломанть эстокиге сёлголезь сельмонзон и шаманц руцяса, сяс мес арьсесть, што кинь лангс сон мекольцеда варжаксты, ся кулы сай кизоть. Тяда башка, койть коряс, куломда меле куроконе керолезь саразть прянц, ёрдалезь ульцяв и мярьгольхть: "Вага тейть сараз тона шиса эрямати".

Штоба К. афоль мрда меки куду, тиендсть лама эсь прянь ванфтомань тефт (ванк: Ловажа).

Лит.: УПТМН, Т. 7. ч. 1. Эрзянские причитания-плачи. Саранск, 1972; Т. 7. ч. 2. Мокшанские причитания. Саранск, 1979; Harva U. Die religiosen Vorstellungen der Mordwinen. Helsinki, 1952.