КУЙ, м., ГУЙ, э. ломаттнень арьсемаса – паронь и кальдявонь символ. Пензенскяй областень эрзя велетнень эса тяниге "гигерь пря гуй" (ужсь) лувондови калдазонь ваныкс, лездыкс. Эрзянь Чипазть цёрац – Нишкепазсь сембе животнай мирть эзда Г. тиезе инь мекольцекс (кядьфтома, пильгфтома) и шаштыкс пеккедь лангса. К. эряй вирьса, шяйса, модать ала, пирьфса, ляйса, крхка эшиса, кардазса. Фольклоронь традициять коряс сон няфневи кой-коста ломанькс, паця мархта, толмаркс, ломанень сивикс. Мормацяматнень эса К. (равжа, уле, колода алдонь) лиенди; эрьгаскотф К. лийксты назёмть алда или бугорть пряста. К. лии марявиста (оцю шумса), вяшкозь. Рьвяямань-максомань поэзияса К. няфти пяк курок алашань ардома. Сембе К. оцюнясна – Инекуйсь, м., Инегуйсь, э.

К., мзярда-бди инголи, шять, ульсь тотемкс, сяда меле – куд юронь, сокамань-видемань Оцюня. Мифнень эса К. кучсы охотникть куду и кошардсы сонь арамс модать лангса покодикс. Сокамать-видемать саманц мархта тотемонь К. полафты и арай кяжи художественнай (моронь) образкс, кона лезды ётамс од сокаень-видиень эрямати и нльне максы сокай-види ломанти рьвя.

Кой-кона мифнень эса К. няфневи вийфтома: сонь ули оцю виец, а аф туви палы шуфтста, аф лисеви ведь мархта лоткста или эшиста. Сон ащи палы шуфта или мокорь лангса, конатнень перьфке ащи ведь, палы тол, и эняльди ломанень вайгяльса лездомс. Сон максы вал каземс или арамс стирькс и лисемс лездыти рьвакс. Но сидеста сон васькафнесы ломанть, панды кяж цебярь тевть инкса – сивсы эсь лездыенц. К. аральхть ся стирьхне, конатнень сюдолезь тядясна-алясна, но синь арайхть меки стирькс, мзярда охотникне вятелезь меки куду. Фкя мифса К., кона сурксокс шаромок цёрать крганц перьфке, прай пяк вииста кияксть лангс и арай мазы стирькс. Тядятненди-алятненди афольхть мярьге азондомс эсь корхтафсост визькс сотомань валхт, сяс мес К. кармайхть шашнема шабатнень ваксса. Апак фатяк шятямок К. лангс, анальхть прощения, штоба К. афолезе наказа.

Лувондозь, что К. ули ёнец, шарьхкодьсы ломанень кяльть. Повериять коряс, Купальня веня (сисемце июльста) можна тонадомс К. кяльть (ванк: Купальня). Арьсельхть, што К. кяльть шарьхкоделезь и нолдалезь тевс кой-кона ведуттне колдубамста; ведуттне маштольхть арама толонь К. Кулоф ломаттне тяфта жа лиендсть куду пянакуд трубава толонь К. лаца. Эрзятнень верондамаснон коряс толонь К. или кяжи духокс лувондовсть метеориттне, конат кяшелезь шить, валдть.

К. сускфнень пчкафтолезь мормацямаса. К. пряса панцелезь лихоманкать, нолдалезь тевс кельгомань эждемати; К. прят ульсть аватнень, стирьхнень наряжамаснон эса (ванк: кшни). Лувондовсь: аф пелькс К. сускомась ся ломанти, кона эсь прянц штакшнесы якстерь траксонь лофцса. Ломаттнень арьсемаса кой-кона К. ярхцальхть траксонь лофцта. Штоба К. лоткаль лофцонь потямда, траксть потялезь морга варява.

К. образоц нолневи тевс сюдомаса (куйсь пупалензе), мзярда ломанть ширес кальдявста ванольхть (сяда сидеста-ават). Няемс К. онцтот – аф цебяренди.

Тя пингс приметакшнесазь: кда вирьса лама К. – шачи киза ули Повериять коряс, сембе К. кочксевихть весть (сёксенда) пуромксс, конанди мярьгихть "куень кетьмафкс".

Лит.: Mordwinische Volksdichtung. Bd. 4. Helsinki, 1947; УПТМН. Т. 3. ч. 1. Мокшанские сказки. Саранск, 1966; Т. 3. ч. 2. Эрзянские сказки. Саранск, 1967; Маскаев А.И. Мордовская народная эпическая песня. Саранск, 1964.