КУД, м., КУДО, э. – ломаттнень эрямаса няфнесы Мирть-Масторть моделенц: ниле К. ужетне ваныхть ниле светть ширьге; куд прясь м., кудо пря, э., куд потмось м., кудо потмо, э., седялсь м., масторалкс, э., ассоциировандайхть колма Мирть-Масторть уровенензон мархта: менельть, модать и тона светть. Обрядовай поэзияса К. потмоц няфневи оцюста, кода Мирсь-Масторсь. Оттне сравниндавихть Ковть и Шить мархта. Мифнень коряс, инголи менельсь ульсь пяк мала модать эзда (ванк: Менель), вальмятнень вельхксса.

К. – юронь-семьянь эряма васта, сяс сотф или карань-каршек путф авань и алянь ушеткссь ащи сембе эрямань-ащемань символикаса. Тянь инкса К. образоц эряви шарьхкодемс кафта пяльде. К. пряц олицетворядондасы менельть – алять, а куд потмось (срубсь) – авать.

Сакральнай элементокс К. лувондовихть пянакудсь, шкай ужесь (шинь стяма пяли види ширесь), шрась, кенкш туркссь. К. кучкакс лувондовсь шкай ужеть ширец, коза путневоль шрась и коза озсесть вешема илань кудатне, штоба теест арьсельхть цебярь кудазорсь и кудазоравась, мифическяй Кудавась. Кой-кона эрямань-ащемань предметтнень и К. васттнень ульсть синцень шкай лаца ванысна-лездысна: Керень-Шочконьпазсь, э., Пянакудавась, м., Каштомавась, э. К. трубанц вельде и вальмава тиендсть соткст тона Мирть, Шкайть лездыензон-ваныензон, кулыхнень мархта. Венцямда инголе стирть явсеманзон (лайшеманзон, э.) эса цёрать (мирдть) кудоц сравниндави тона светть, куломать мархта; куломань явсематнень эса, меколанкт, лазкссь азови кудкс, коза куломда меле туй эряма ломанть ловажац, сяс тоза, кода и К. тиендельхть вальмянят и кенкш (ванк: Лазкст).

К. путомста тиендсть лама коень илат. Васенце кудонь шочкнень путомста инголи стяфтольхть од ёмла тумоня, штоба К. улель сяда кеме, улель козяши К.; колмоце кудонь венецть путомда меле ушу пирьфти путольхть шра (лангозонза – кши-сал, ярмак); тянкса (паронкса) шкай ужа ширети путнельхть ярмак, модать потмос калмосельхть вирьста кантф понжафкст. Ульсть лама магическяй тефт, конатнень тиендезь К. ванфтоманц кальдявть эзда, Шяйтанда, колдунда: седялу калмосесть юр мархта аф оцю пизелкскя.; К. кирдсть офтонь пря пакарь; ульця шири перяфть лангс путнельхть карь карькс мархта; пянакудть ваксс меколанкт стяфнелезь фатуннять; стенать лангс повфнесть тише пусмоня, конань сязелезь Купальняда инголе; Кльхчяняда инголе (илять) содняса тиендсть крёскат вальмя вельхкссть и кенкшнень лангс. Штоба афоль уле кальдяв К., кудазорсь васенце К. сувай ломанть (Масланцяда меле понедельникста) пильгонзонды токаль коцькаргать мархта.

Мзярда ётальхть од куду, мархтост "сяволезь" (юваделезь) Кудавать. Сонь лемозонда пидельхть "од кудонь поза". Од К. сувамста васенцекс нолдальхть ката. Повериять коряс, сон сяволезе васенце куломать од К. Тяфта жа тя катонь сувама ёткть приметакшнезь: коза сон мадоль, тоза путнельхть удома васта. Аф цебяренди лувондолезь сянь, кда катось К. сувафтомста поталь меки, афоль ёра сувамс К. Кда сон юмаль кудста, арьсесть, што катось ванфтозе кудазорть аф цебярьда. Од куду сувамста инголи нолясть и атёкш, седялу ёрясть сараз (кудонь ваныти – Кудавати). Штоба кудонь ванысь – Кудавась лездоль козякодомс, од К. ётамста кудазорсь пирьфти путоль шра, лангозонза – кши-сал; шра пилькненди казне вастс сотнель котф пакшкат.

Ульсть аф мярьгомат, конатнень вельде ёрасть ванфтомс павазть, козяшить К.: шинь мадомда меле афольхть макссе пандомда ярмак (ашушись сай), ёрямс мусорть (няфтьсак шяйтаттненди кудть), тиендемс К. стенатненди лазфкат (сялондоматненди), вяшкондемс (ярмакне юмайхть) и стак тов. Кядьста шумбракстомась кенкшть туркс лувондовсь явомати; кенкш туркс ащемась – кирьфтамс эсь эряфцень. Афольхть мярьге якамда фкя-фкянь шири чистай понедельникста (жувататне юмайхть-арайхть). Повериять коряс, кда нармонць тии кудбрять алу пиза – цебяренди; ласточкась озай К. лангс – сярядись пчкяй.

Сире-Од кизонь (14 январьста) шиня васенце куду сувайть озафнелезь орть лангс, штоба жуватась рашталь, тя кизоть кудса улель нарвай. Арьсесть, кда сире Од кизонь шиня К. сувай васенцекс "стака пильге" ломань – сембе кизось ули кальдяв, сяс кой-койста Од кизонь шиня кудазорхне (кинь "теждя пильгоц") васенцекс сувальхть К. синць.

Ононь шарьхкодемаса лувондозь куломати, кда онцтот няйсак, што К. сувайхть мешт, ляци атямсь, К. ужец калады, няят сруб, поталакфтома К., поталакти марайхть начка мода; К. строяйхть – тожа аф паронди.

Лит.: Mordwinische Volksdichtung. Bd. 4. Helsinki, 1947; УПТМН. Т. 6. ч. 2. Мокшанская свадебная поэзия. Саранск, 1975; УПТМН. Т. 6. ч. 1. Эрзянская свадебная поэзия. Саранск, 1972; Девяткина Т.П. Тайны снов. Саранск, 1995.