КОВ, м., э. Мифологиянь азондоматнень коряс, К. мархта (сяда пяк од ков прять, м., э., пешксе ковть, э., пяшксе ковть, м.) сотф лама сюцема, аф мярьгома, илань магическяй тефт. Мокшэрзятнень арьсемаснон коряс, К. – цёра, Шись-стирь. Фольклорса синь няфневихть марса. Васенда ломаттне эняльдсть Чипазти и сяльде – Ковпазти). Мифологическяй сюжеттнень коряс, К. валги Миронь шуфта пряти – келути и валдоптсы Мирть-Масторть; няфневи мифологическяй геройхнень соткссна менелень светилатнень мархта; рьвяямань-максомань поэзияса рьвяяй цёрать касомонц ала К., конясонза – палы Шись. Моротнень эса, коса максови ононь шарьхкодемат, кда К. няйсак бока ширде – рьвяяма-максома илати.

К. культоц няеви и эрямань-ащемань койхнень эса. Эрзянь аватне сёрмадольхть од ков лаца сёрма авань фталксти, конань сотнелезь ингольде. Штоба К., Шись ванолезень аватнень аф цебярьда, каннельхть акша и мазы тюсонь руцят; мазы тюста ульсь сяда лама сёрматф авань панархнень эса.

Мокшетнень поверияснон коряс, К. лангс ламос ваномс афольхть мярьге. Иван Предтеча тянь ашезе кулхцонда и Шкайсь валхтозе сонь прянц. Тя пингс сон няеви К. лангса и ащи Шкайть шранц ваксса пряфтома.

Машты К. афольхть ушеда видема, перень озафтома тефнень, од тевфт (аф цебяренди); афольхть нарсе шяярьхть (мокшэрзятнень арьсемаснон коряс, К. может сявомс эрямань вийть и ушедыхть прянь сярядематне). Машты К. лувондовсь пяк цебярь пингокс сяряди пеень пчкафтома, цильгонь ётафтома мормацямаса (сярядемась ёталь машты К. мархта). Цебярь приметась – няемс Од ковть (тя лувондовсь паронь самати эрь ушедомаса), а кда няйсак Од ковть онцтот – курок кулат, лафтубрява няйсак – дива ули; няят оцю К. – аф цебяренди. К. мархта приметатнень сотнелезь общественнай явлениятнень мархта (кда Очижинь веня К. – тя аф паронди или войнати).

Содаматнень эса оцю васта занцесь К. няемац "види" и "кержи" ширеть эса (ванк: Анголь), конатнень мокшетне и эрзятне шарьхкоделезь и азондолезь аф фкакс.

Мокшетне приметакшнезь: кда ингольде или кержи ширде няйсак К. – аф цебяренди, аф удаламати и, меколанкт, од К. няйсак види ширде, сембе ковсь ули павазу. Эрзятнень приметаснон коряс, кда К. няйсак види ширде или инголет – аф цебяренди, кержи ширде – кельгомати.

Погодать приметакшнезь К. ащеманц коряс: од К. няят (мзярда пезонза можна повфтамс ведарка) – мани шити; пиземти, буряти – К. перьфке крукт и К. лофтана; К. тарвазоц алу ащи, копоренц лангса – аф мани шити, вармати – К. лангса няеви тобда пакшт. К. ваксса сенемаза крукнень или пяльнянятнень коряс азольхть якшама погода. Приметазь, што васенце ловсь прашенды од ков пингста.

Повериять коряс, аньцек К. валдонц вельде ваяй ломаттне (кинь ульсь тяфтама эряма шиц) няйсазь Ведявать, кона лисенди каршезост акша щамса. К. путнелезь тевс гададондамаста ведуттне, содай ломаттне, конат содамаснон кирделезь эсь потмосост. К. юмамать (затмениять) лувондозь Масторонь юмамать мархта (сиретне анокласть куломати).

Лит.: УПТМН. Т. 6. ч. 2. Мокшанская свадебная поэзия. Саранск, 1975; Народные приметы / Сост. Девяткина Т.П. Саранск, 1992.