ГАДАДОНДАМА, м., ГАДАЯМО, э., ОРОЖЕЯМО, э. – ила, кона тиендеви сянь инкса, штоба содамс инголень и ётай пингть мифическяй тона вийхнень мархта. Г. колга азондови моротнень, 18 веконь материалхнень эса (поминкань, рьвяямань-максомань, шачемань) и тяфта жа няфневи сире пингонь озондоматнень пингста. Г. ульсть фкя ломанень эзда и сяда шуроста – марстонь. Г. сяда лама тиендсть стирьхне и кржа – аватне. Сёрматфт и марстонь: цёрань и алянь Г. (шачемать-касомать колга).

Ульсть эрь шинь (кой-коста случайнай) Г. Тяфтама Г. ётафневольхть озксонь озондоматнень пингста, а сяда меле синь тиендезь инь оцю христианскяй (Роштувать, Кльхчянять, сире Од кизоть; шуроста – Пятруста) и семьянь илатнень (рьвяямань-максомань, помондамань, шачемань, од кудти ётама) пингста. Тя Г. лувондовсть сяда видекс, сотфт эрямать мархта. Арьсесть, кда сембонь тиемс лац, видеста: содамс пингть, вастть, путомс тевс эсь лацонь Г. предметтнень, то ломанць маштоль эсь юронь кулоф духнень и аф цебярь вийть мархта тиемс соткс тя и тона мирхнень мархта, содамс эрямать инголи. Штоба содамс анокс, мезе кармай улема инголи, эряволь тона шить мархта кирдемс соткс, кона, ломаттнень арьсемаса, лувондоволь кода пелемань тев, коса ульсь эсь лацонь салавань инголи эрямань содама. Тя соткссь лия Мирть мархта пяк пельксоль, сяс мес ульсь пелема Миронь-Масторонь порядкать срафтоманц-калафтоманц инкса. Тянь инкса аф стак тиендсть лама прянь ванфтомат: ётафнесть круг (кода арьсесть мокшэрзятне, аф цебярь вийть эзда), мадондсть кругть потмос Г., штоба афолезень понда тона вийсь; сембе тефнень тиенделезь курокста (кувака соткссь кардафоль). Сяс, няемок Г. пингста эсь васянц-поланц, стирсь эстокиге колалезе ваномать. Оцю иланди Г. лувондозь аф кальдявкс (аф грешнайкс), а коень илакс.

Оцю ила ётконь содамаста, штоба мумс соткст тона вийхнень мархта, тиендсть магическяй тефт: нолнелезь шяярьснон, валхтолезь эсь перьфстост карксснон, наряжамаснон (христианствать примамда меле – крёзснон, штоба лездоль теест аф цебярь вийсь). Г. афольхть корхта мезевок, гададондама вастти якальхть салаване, штоба кивок афолезь няе, сяс мес ломанть мархта васедемась няфтель аф удалама (кда тя ашезь сувсе Г. илати, сяс мес кой-коста гададондасть васеди ломань лангс, кепотьксонди, содамс, кодама ули стирть (сай пингонь) мирденц лемоц). Г. вешельхть шобда аф цебярь вастт (баня, калдаз) и тяфта жа туркс ётама васта (ортат, эши, ки рашка – конат лувондовсть магическяйкс). Цебярь Г. лувондолезь илядень пингть, пялеветь; сяда шуроста (кизонь Г.) – шинь стямда инголе пингть. Инь лама Г. тиендельхть Роштуваста. Сяда лама Г. венцямати, эрямати, куломати, козяшити, шачемати и аф шачемати. Ульсь лама Г. спосопт: кулуфнень мархта (кинь марняц срады шобдавати – тя кизоть кулы), солафтф оловать и свинецть мархта (кда арай круг – рьвакс лисят, крёз – куломати), кшить мархта (цюкорнятнень, паморькснень: конань шобдавати цюкорняц пялендеви – кизоти кулы), шяярьхнень (юмайхть вальмя пряста – куломати), ваномать (штоба няемс эсь васяцень-полацень) и стак тов.

Гададондамок мирденди, ёрасть содамс и сонь козяшинц (кда баня вяльдярьмати стирть тонкф кяденцты токаль мезевок ляпе, варяга мархта – козя ули мирдец), шяяренц тюсонц (кда калдазста стирсь сязель учать эзда акша пона пакш – мирдец акша ули, равжа – ули равжа).

Коза венцяй стирсь Г. чакамать вельде (чаказь куцюса ортатнень), пинень увамать (кона пяльде маряльхть увама – ся пяли и венцяй), ортатнень вельхкска ёрдаф мусорть; штоба содамс мзяра шачи шаба, Г. тяфта: таргальхть керф пенгя марть ёткста пенгя и ванолезь: мзяра сардоц, сняра шаба шачи. Г. юватькшнезь кулоф юронь ломаттнень духснон (сотнелезь книгать лентаса и кирделезь мархтонза). Тя духненди макссельхть кизефкст и кда ответсь виде – книгась шарфтоль.

Кой-кона Г. сотфт ёряматнень мархта (ёрдаф тяльмоть коряс, конань мархта парясть баняса, ванолезь кона пяли венцяй); павазти гададондасть тяфта: мадольхть копорь пяли ловть лангс и ванолезь, кда шобдавати кивок ёталь тя вастова – паваз аф ули.

Лама Г. урожаенди: сёра прять коряс (цёратне и алятне аральхть копорь пяльде сёра капати и таргальхть кургса сёра пря; мзяра эсонза сёрода – сняра мера сёра шачи эрь ломанть семьяса), лешафть (аватне веть путольхть кодама повсь пулф: суронь, розень, каньфонь и стак тов, кона пулфсь пяк лешафты, ся и пяк шачи сай кизоть; вайгяльть коряс (мадольхть тиф каймоса, тяльмоса кругти и кулхцондольхть: кда маряви пяшксе крандаз ардома – урожай кармай улема), алхнень коряс (ванк: Ал). Погодать Г. гульнятнень коряс, конатнень нолдалезь Кльхчяняста (кона пяли лийкстайхть, ся пяльде сайхть пизепне) и стак тов.

Пяк Г. велеса "кулхцондозь": пинень увамась, калмотнень пяльде шумсь азоль толса паломать колга; узерень калтыемась – куломать; крандазонь чикордомась – кить; морамась – рьвяямань-максомань илать, цебярть; авардемась – аф цебяренди. Тяда башка, сидеста якасть кулхцондома шабрань вальмятнень алу или сувсельхть куду, но афольхть корхта, кулхцондолезь, мезе корхтайхть лиятне. Мезе марясть, сянь и Г. (цебярьста корхтасть – цебяренди, кальдявста – кальдявонди).

Пяк ванонкшнелезь Г. ононь шарьхкодемань коряс. Штоба няемс содай он, стирьхне тоду алу путольхть магическяй предметт (панжема, замок, ванома, сюрьхцем). Штоба онцтот няелить цёрать, конанди венцят, "пякснелезь" эшить, панжемать путолезь тодуть алу. Тянь инкса каяльхть повозост пинем, пряснон алу путольхть замок и мярьгольхть: "Катк васязе-полазе онц шовори". Содафт Г. рьвяямань-максомань ёткть, конат пяк сотфт приметатнень мархта. Баняса Г. мирдть характеронц лангс: кефненди ведень ёрдамда меле пяк кармай парсь тжнама – характер мархта ули, аф пяк – ляпе ули мирдсь; мирдти Г. пярякатнень мархта, конатнень путолезь рьвяямань-максомань шиня эрзянь рьвянять инголи (кда сяволь комля мархта – сими ули, пона мархта – козя, сал – аф цебярь эрямати). Церькавса ванонкшнезь: кинь сяда курок палы штатолоц – ся сяда кржа эряй. Г. и шабань шачемати: ёрдальхть кши кочам, конань мархта лемделезь рьвянять цёрать пяле, и ванолезь: прай керфть лангс – васенцекс шачи стирня. Оттнень характерснон ванолезь Г. и природнай явлениятнень мельге: атямать, вармать (рьвяямань-максомань шиня пяк вии вармась – оттне характернайхть, кда атяма – кяжихть).

Аф кржа Г. – приметат тя пингс ванфтовсть калмамань иласта (ванк: Кулома), шабань шачемаста (ванк: Шачема), од куду сувамста. Г. и тиемок кудонь тефнень (кепотьксонди, мзярда озафтсть капстат, стирьхне кой-коста озафтольхть колма капста корятть, азомок колма цёрань лепт; кона корянць сяда цебярьста туй – сянди стирсь туй рьвакс); киге, молемок нормаленкса, ёрялезь кядьгоснон и кда праль потмаксонц лангс – пяшксе кочкасы кядькть, вяри потмаксоц – шава сай. Ульсть (тяниге) аф ила мархта сотфт Г. (озат фкя лемса кафта ломань ёткс и мезевок арьсят эстейть – лиси).

Лит.: Шахматов А.А. Мордовский этнографический сборник. СПб., 1910; Девяткина Т.П. Народные приметы мордвы (мокши и эрзи). Саранск, 1994.