Мокшетне и эрзятне (мордватне) – финно-угорскяй нароттнень ёткса оцю народ (эряй ломаттнень коряс колмоцесь венгратнень, финтнень меле), кона эряй Россиянь Федерацияса. Сембоц 1989 кизонь сёрмадомать (переписть) коряс мокшэрзяда 1 млн. 154 тёжянь ломань. Российскяй Федерацияса – 1 млн. 73 тёжянь ломань, Мордовия Республикаса – 313420 ломань. 800 тёжянь ломань эряй диаспораса ингольдень Советскяй Союзть 40 республикаса, крайса, областьса: Самарскяй областьса – 116475 ломань, Пензенскяй – 86 тёжянь, Оренбургскяй – 69 тёжянь, Ульяновскяй – 67 тёжянь, Нижегородскяй 37 тёжянь, Челябинскяй – 27 тёжянь, Саратовскяйса – 23 тёжянь, Свердловскяйса – 15 тёжянь, Кемеровскяй – 14 тёжянь, Туркменияса – 2568 и стак тов.
Мекольдень 20 кизоть (переписть эзда сявомок) Мордовияса мокшэрзянь национальностень ломаньда арась 51 тёжяньда сяда кржа. Москуса, меколанкт, 1989 кизоти мокшэрзяда эрясь 13 тёжяньда сяда лама или кафксть сяда лама. Тяфта жа касы эряйхнень лувксcна Московскяй (28328), Рязанскяй (8528), Владимирскяй (8528), Ростовскяй (4657), Мурманскяй (4214) областтнень эса, Краснодарскяй крайса (7367), Коми Республикаса (3927), Украинаса (19332). Статистикань материалхнень коряс лия крайхнень, областтнень эса кармась кирема мокшэрзянь эряйхнень лувксcна.
Мордватне-эрзятне Республика Мордовияса эряйхть сяда лама шинь стяма ширеса, мокшетне – шинь валгома ширеса. Мокшэрзятнень этногенезсна ётась Волго-Окскяй междуречьяса городецкяй (археологическяй культураса) племенатнень ёткса. Сире мокшэрзянь пляматне минь эрань 1 тёжянь кизотнень эрясть Окать, Волгать (средняй теченияса), Цнать, Мокшеть, Сурать ваксса (Вихляев, 1974: 27–28).
Арьсесть, што пяк кунара мордватне явсть (минь эрань 1 тёжянь кизотнень пялеста) кафта плямас: мокшет и эрзят (Степанов, 1968: 263; 1970: 31, 43, 55). Туфталкс, мес явсь сире мокшэрзянь общностсь, учёнайхне лувондсазь оцю эряма вастть, конань инкса ульсь стака кирдемс соткст плямань группатнень ёткса (Мокшин, 1977: 43). Тяка пингть мокшетнень и эрзятнень кяльснон, антропологическяй обликснон, кудонь и культурань эрямаснон лангс люпштасть лама лия наротт. Этническяй полафтомань лия туфталкс лувондовихть миграционнай тефне, народть эряма вастонь полафтомац (минь эрань 1 тёжянь кизотнень васенце пялеста), булгархнень Средняй Поволжьяв самасна (минь эрань 1 тёжянь кизотнень), коса синь тисть государства – Волжскяй Булгария. Сяда меле оцю полафтома ульсь монголо-татархнень врьгятемаснон пингста.
VIII–IX минь эрань векнень малава марстонь мокшэрзянь кяльсь кармась явома. Сире мокшэрзянь кяльть эзда лиссть диалектт и марстонь мокшэрзянь кялень системась (кода фкя кяль) юмась. Од лисьф кяльхне, конатнень ульсть соткссна лия кяльхнень мархта, тиезь эсь малань кялень ширеснон (Цыганкин, 1991: 94).
Мокшень и эрзянь кяльхне сувсихть волжскяй подгруппати уральскяй семьяти и явфтовихть фкя-фкянь эзда фонетикань, грамматикань, лексикань ширде. Кяльхнень потмоса улихть диалектт, конат явфт оцю эряма вастонь ширева (регионга). Эрзянь диалекттнень эса вете типт, основной мокшень – колма. Эрзянь литературнай кяльть основакс арась Республика Мордовиянь козловско-ардатовскяй, мокшень – краснослободско-темниковскяй эсь лацонь кяльхне.
Мокшэрзянь кяльхнень сёрмадомасна васендакиге кармась тиевома рузонь графикать (кириллицать) коряс. Васенце мокшэрзянь сёрмадомань памятникне лиссть XVIII векста (Феоктистов, 1976: 161–162). Синь эвондамасна сотфт христианствань пропагандать мархта. Тя пингть кармасть ётафтома мокшень и эрзянь кяльхнень лангс Од Заветонь текстт (Библияста) и лия миссионерскяй литература. XX в. ушедоманцты мокшэрзянь кяльхнень коряс ульсь тиф 300 произведения, конатнень эзда пцтай пялесна нолдафт; тиф ведьгемоньшка валкс, печатлаф фольклоронь произведеният.
Антропологиянь ширде мокшэрзятнень эса ули шоряф лама тип и сяда пяк европеоиднай расань (беломорскяй, понтийскяй, восточно-балтийскяй). Монголоиднай шаромасна мокшэрзятнень сяда кржа лия восточнофинскяй нароттнень коряс.
Мокшэрзятнень и руснень (сяда пяк восточнайхнень) антропологиянь фкя ширесна – тя марстонь сире антропо-логическяй типнень сатомасна, конатнень эзда мольсь синь касомасна и сяда тов мала арамасна и шорявомасна. Эрзятнень ёткса сяда лама акша тюсонь, мокшетнень – равжа тюсонь шяярьхть (Марк, 1960: 33–35).
Мекольдень пингть кой-кона учёнайхне (Цыганкин, 1991: 92–112; Надькин, 1992: 3–8) арьсихть, што мокшэрзятне, конатнень инголи лувондозь фкя народкс, (ащи кафта этническяй общностьста: мокша и эрзя) – шять, аф фкя этнос. Мокшетнень и эрзятнень улихть синцень ширесна антропологиянь каршеса, кяльса, эрьшинь эряфса, материальнай и духовнай культураса.
Интеллигенциять ёткса улихть мяльхть сянь колга, што эрзятне и мокшетне – тя кафта башка наротт ("Эрзянь мастор" газетась, 1994, 1995). С.Г. Гурьяновонь тонафнеманзон коряс, тячи мокшэрзятне – тя метаэтническяй общность, кона ащи кафта этносста (Гурьянов, 1993: 24).
Мокшеда и эрзяда башка тя пингс ванфтовсть кафта этнографическяй мордвань группат: шокша (эряйхть Республика Мордовия Теньгушевскяй и Торбеевскяй райоттнень эса; сембоц эряй ломаньда 15 тёжянь), каратайхть (эряйхть Татарияса Камско-Устьинскяй районца), конатнень улихть эсь ширесна кяльса (шокшетнень ули мокша – эрзянь пяльде сама, каратайхнень – татаронь), илатнень, щама-каряматнень эса.
Преданиять коряс, каратайхне ворьгодсть тя васттненди монголо-татархнень врьгятемаснон пингста. "Каратаи" лемсь ётафтомок татаронь кяльста –"равжа вашеня" (лиссь, шять, сяс, мес иланди печкольхть равжа вашеня). Синць эсь пряснонды каратайхне мярьгихть "мукша" (УПТМН, 1983: 229).
XIX векть омбоце пяльксстонза корхтави тага фкя этнографическяй мордвань группань колга – терюхаттнень, конат инголи эрясть Нижегородскяй губернияса Нижегородскяй уездса Терюшевскяй волостьса (тяни – Нижегородскяй областьса Дальнеконстантиновскяй районца). Рузонь исследовательсь-этнологсь В. Майнов лувозень синь эрзякс. XX векть ушедомста терюхаттне, корхтамок рузонь кяльса, лувозь эсь пряснон мордвакс. Тяниень пингть синь юмафтозь эсь мордовскяй этническяй арьсемаснон и лувсазь эсь пряснон рузкс.
"Мордва" этнонимсь мокшетнень и эрзятнень ёткса пцтай аф азондови (синь эсь ётковаст азондсазь эсь лемснон: мокшет и эрзят).
Васенцеда тя этнонимсь ульсь сёрматф минь эрань VI векста византийскяй епископть Иорданонь "De origine actibus que Getarum" (Геттнень шачемаснон и тевснон колга) работаса, коса сон азозе Восточнай Европань "mordens" народть колга. Лия источниксь, коса азф – mord этноним валсь, тя – 10 веконь Византиянь императорть Константин VII (Konstantinos Porphyroqennеtos) работац "De administrando imperio" (Империять управлениянц колга). Тяса корхтави Mordia странать колга, кона ащи печенегонь странать эзда кемонь шит ялга молема (Harva, 1952: 4). Рузонь летописьса ("Повесть временных лет") мордватнень колга корхтави XII векста. Официальнай докуметтнень эса "мордовскяй народ" (мордовскяй народность) вал сюлмось кармась тяшневома 1921 кизода меле.
Васенце сёрматф материалхне эрзя (arisa) этнонимть колга теенк пачкодсть хазарскяй каганть Иосифть сёрмаса, кона тяштьфоль еврейскяй сановникти Хасдайти (Коковцев, 1932: 98–99). Тяда меле арабскяй учёнайсь Ибн-Хаукаль, кона эрясь Х векста, эсь книгасонза "Книга путей" корхтай arsaya плямать колга.
Мокша (мохеl) этнонимть колга васенцеда тяштсь фламандскяй путешественниксь Гильом Рубрук (Ruysbrieck), кона 1253 кизоста Святой Людвигть посольстванц мархта мольсь Азияв Южнай Россиять пачк (Путешествия, 88–111). Мокша валть XV векста азозе венецианецсь Иосафат Барбаро (Барбаро, 1971: 133–134, 159). Но тя пингс "мокша" и "эрзя" валхнень этимологиясна нинге апак содакт.
Оцю васта мокшэрзятнень эрямаса занци Россиять мархта шоворемась, кона ушедсь ся пингть, мзярда Руссь нинге сонць ульсь аф фкя государства и кона шумордавсь марнек аньцек XV векть песта, мзярда ульсь пуроптф фкя Российскяй государства (Мокшин, 1989: 46). Мзярда мокшэрзятне кармасть шоворема Россиять мархта, ушедсь синь кстиндамасна, кона шумордавсь, шять, XVIII в. Языческяй мокшэрзятне арасть православнайкс.
Сире пингть мокшэрзянь ярхцамбяльсь сяда пяк ульсь вирень жувата шавомать (охотать), калонь кундамать, медень кочкамать пяльде. Сяда тов инь оцю васта мокшэрзятнень эрямаса занцесь сокамась-видемась и жуватань кирдемась. Нинге сире пингста содазь тувоть, м., э.; учать, м., реветь, э.; букать, м., э.; сявать, м., сеять, э.; скалть, э., траксть, м.; алашать, м., э. Пяк кунара мокшэрзятне содазь и кшнинь тевть (кшнить эзда тиендсть тевонь покодемат). Кшнить тиендезь шяень и дерновай рудаста, мезьда ульсь пяк лама синь эряма вастсост (Петербургский, 1995: 120).
Ярмак вастс ульсть уронь кедть (урт, ур, м., э.), урхт (Иожеф, 1968: 25). Кшнинь ярмакне – ярмакт, м., э. кармасть якама Х векста (тюркскяй кяльса "ярмак" валть смузец керф, полафтф). Тя пингть мокшэрзятнень мишендемаса-рамамаса оцю васта занцесь арапнень мархта сотксне, конат арасть сяда кемот снярда, мзярда тиевсь Волжскяй Булгариясь. Мокшэрзятнень эзда ламоцне эрясть тя государстваса (Мокшин, 1989: 38). Ламоц термиттне и ярмаконь лувомась эвондасть Поволжьяса сяда инголи, мзярда монголхне (джучидскяй династиянь хаттне) ушедсть тиема монетат.
Рузонь летописнень эса сёрмадсть: "Мордватнень ульсть велесна, погостсна, тялонь пингста эряма вастсна (зимницасна) и твердьсна". Васенце колма азф эряма васттнень ашель эсь прянь араламасна врьгяти ломаттнень (лия пляматнень) эзда. Тверттнень тиендезь вирьса эсь прянь араламанди – городища лаца, коса кяшендсть снярда, мзярда ульсь пелема врьгяти лия плямань ломаттнень эзда (Вавилин, 1995: 148–166). Ошне, коса эрясть мокшэрзятне, кармасть эвондама XIII векть песта и XIV векть ушедомста Мокша ляйть маласа. Ламоц ошне эвондасть XVI–XVII векнень пингста кода эсь прянь араламат лия врьгяти плямань эзда и ванфтомс Русть моданц-масторонц лямбе ширде (ногайхнень, крымскяй татархнень, башкирхнень, казахнень врьгятемаснон эзда). Руссь путнезень тя ошнень засечнай васттненди. Тя оцю тевти синь тернелезь поволжскяй нароттнень, а стане жа мокшэрзятнень. Тяфта путовсть тяниень Республика Мордовияса Темников (1536), Краснослободск (1627), Саранск (1641), Инсар (1648) и ст. тов ошне.
Эряма вастонь путомста мокшэрзятнень ёткса сембода содафокс ульсь рузонь лаца кудонь путомась. Синь лангозост ваномок, пянакудть путолезь кодамовок ужети кенкшть ваксс. Шкай ужесь ульсь види шире кенкшть каршеса (диагональ шире пянакудть эзда). Мокшэрзятнень куд потмосна аф пяк явфневсть рузонь крестьянскяй куд потмоть эзда.
Христианствав ётамда инголе ульсь и полигиническяй рьвяяма (полигамиясь – мзярда лама сявондсть рьвада). Лама рьвя сявондсть аньцек оцюнятне, козяста эряйхне (мурзатне, княсьне). Мокшэрзятненди мярькфоль сявомс сняра рьвя, кие мзяра маштоль трямс. Крестьянскяй улешить коряс, кивок колма рьвада лама ашезь сявонде (Лепехин, 1771: 173). 17–18 в. мокшэрзятне сяда пяк кармасть сявондема фкя рьвя (моногамнай рьвяяма), но кой-коста сявондсть и кафта рьват (бигамия).
Кой-коста ульсь и тяфта: ёмла шабатнень (3–10 кизонь) рьвяяфтолезь 20–30-кизонь стирьхнень лангс (Евсевьев, 1966: 321). Тянь тиендезь сяс, мес эряволь семьяти покоди ломань.
Мокшэрзянь авань щапне-каряпне эсь лацоннет. Синь явовихть эрзяннекс и мокшеннекс, конатнень ёткса улихть лама (кеветиешка) эсь лацонь тиф щамда. Мокшэрзя аватнень пяк мазыста тифт 18 веконь щамсна (конатнень колга сёрмадсь П.С. Паллас) тушенды эсь юронзон мархта I ушедомок II тёжянь кизотненди. Илань (озксонь) авань щапне ульсть пяк стакат тиемс, ащесть лама наряжама пяльксста; ульсть эсь лацонь станонь драпированиянь приёпт (Балашов, 1995: 176). Иланди щамась-карямась кой-коста мольсь лама частт (ськамонза авась афоль щав-каряв).
Мокшавань панархне явфневсть эрзяннетнень эзда стама и сёрмадома ширде. Инь содавикс мокшэрзянь сёрмадомань тюсне равчсь сенема мархта и тобда якстерсь; тюжясь и сянгярясь путневоль тевс сянкса, штоба тиемс сяда валдста сёрмать. Сёрматнень тиелезь уштор лопа м., куень бря, м., саразонь пильгоки, м. лаца. Панарть сотнелезь кодаф понань карксса, м., э. или пулайса, э., конань сотолезь кафта пяльге фтала ширети. Пулайть коряс няевсь костонне ломанць, сонь козяшиц (Балашов, 1995: 183). Панарда башка мокшетне каннельхть акша, пильге пакарь полданяти молемс, понкст.
Кшнинь эпохаста мокшэрзятне каннесть прябоксост сиянь и бронзань покаряв наряжамат (кольцат), бронзань повфнемат (Tallgren, 1928: 7). Мяште лангонь наряжамакс ульсь "сюлгамсь", м., э., кона брошка-заколка лаца (покаряв). Эрзятнень сюлгамсна шашневоль салмокс мархта, мокшетнень – трапеция лаца пряжка, конань мархта килькшталезь панар кургть. Мяштть, кргать наряжалезь крганяса, м., цифксса, м., крганьпирьфса, м. (бисерста). Аватне каннесть кядьсост браслетт, суркст (медень, сиянь, золотань).
Эрзявань прянь щапне (панго, сорока, шлыган) тиендевсть кеме калгода основаста и синь формасна ульсь цилиндр, пяле цилиндр и конус лаца. Тя прянь щамть потмоц ульсь ленгянь или куйгоронь, касомть фтала ширец кувакаль (копорь пялети молемс). Мокшаватнень прянь щамсна – панга, златной – ульсть трапеция лаца и кафта-колма пяльксста. Каннесть тюрбан лаца повяскат, нардама лаца котфонь прянь щапт, руцят. Кой-кона васттнень эса рьвакс лисьф аватне шяярьснон поналезь и тиелезь сюра лаца (кодавкс, э.). Венцямда меле стирень пря щамсь полафтоволь аваннекс.
Мокшаватне путнельхть пилеснонды покаряв пилепрят, конатненди стальхть бисер. Эрзяватне каннельхть пилеснон лангса тиф мациень пухста покаряв шархт или пилькст подвеска мархта (сяда пяк – сиянь монета).
Сире пингть пильгонь щамакс ульсть карьхне. ХХ в. кармасть каннема кедень кямот, конатнень наряжалезь якстерь сафьянца. Тя пингс мокшаватне каннихть пильгесяярьхть (акша и равжа полоска или кодамовок колма или ниле угол сёрма лаца), конатнень кодасазь тяниге понань сюреста.
Тяниень пингс кой-кона Мордовиянь райоттнень эса мокшаватне нинге каннихть сире пингонь эрь шинь и илань щамат-карямат. Эрзяватне тяни наряжакшнихть аньцек кой-коста рьвяямань-максомань илас. Сире аватне ванфтсазь эсь щамснон куломань пингснонды.
Кой-кона мокшень и эрзянь авань сире пингонь щамань-карямань ширетне, наряжаматне путневихть тевс и полафневихть сяда тов мокшэрзянь щамонь тииень, сёрмадыень тевса.
Аф ваномок сянь лангс, што мокшень и эрзянь ярхцамбялень тиемста, ярхцамбяльса кой-кона велетнень эса улихть эсь ширесна, оцю аффкаксши синь ётксост аш. Сире пингонь мокшэрзянь ярхцамбяльсь ульсь сотф сянь мархта, мезе ульсь хозяйстваса (мезе тиельхть ломаттне): сокамать-видемать, жуватань, мешень кирдемать эзда. Пяк лездсь эрь кудса калонь кундамась, охотась, нормалень, пангонь, пяштень… кочкамась.
Нинге сире пингста мокшэрзятне содазь суроть, пинемть, люкшять, снавть, розть, тозерть, шиньжаромать, чечевицать. Аф фкя пингста мокшэрзянь ярхцамбяльти сувась капстась, куярсь, шурьхкясь, паксянь шурьхкясь, шапарякссь, ряпссь, якстеряпссь, тиклась, пурьхкясь. Тялонди анокламста ярхцамбяльть салыяфтолезь; лама симольхть шапама лофцта, ямти кайсельхть вайвелез, канцёр вай, эслек шапама лофца.
Пяк сире пингть лама ярхцальхть равжа кшида. Тя пингс кой-кона велетнень эса розь почфть шорясазь шапама лофцсса и путнесазь пидема пянакуду капста лопа лангс. Кшись тяниге занци оцю васта сембе илатнень эса (рьвяямань-венцямань, кулыень, шачиень), содамаса и ст. тов.
Сире пингонь мокшэрзянь ярхцамбялькс ульсь шонгарямсь, м., вецаямсь, э. (шонгарям, конань, пиделезь суроста, каямок аф лама модамарь). Сидеста пицекшнельхть пачат, м., пачалксеть, э., конатнень тиелезь суронь и тозеронь почфста и пиделезь (тяниге) пяк эчкста и тяниге ярхцайхть лофца, вайвелез, скал вай мархта.
Тялонди парьса салыяфнесть пангт, капстат, шапафтольхть марьхть. Тя пингти салыяфнихть и шятихть тувонь пал баня пянакуднять вельхксса.
Мокшэрзятнень ярхцамбяльснон ёткса ульсть тяфтама илань ярхцамбяльхть, конат сотфольхть сокамань-видемань пингть, юронь и велень религиознай илатнень ётафтомаснон мархта. Кепотьксонди, нумолонь пярякатне, м., прякатне, э.; суронь ямсь, м., ульсть аф аньцек илань ярхцамбялькс рьвяямаста-максомста, поминкаста, кстиндамста, озксста. Ульсь башка озкс, конань лемоцоль "Бабань каша", м., э. (сире аватнень кашасна).
Эрзянь рьвяяма-максома иласа рьвакс туй стирть тядянц-алянц кудса илада инголе шити мярьгольхть "кашадо ярцамо чи", э, конань эзда ушедоль илась.
Койхнень коряс, мзярда путолезь маткать од кудти, кудазорсь ёталезе срубть суронь каша мархта, кона символизировандась лама кизонь эряма.
Кой-кона почфонь ярхцамбяльхне састь мокшэрзятнень эряфс христианствав ётамда меле. Тяфта март ковста тиендсть шапаксонь "жаворонкат", вержиста (Великай Постонь нилеце недяляня) пицесть крёст, коза путнельхть монетат, крёскат, цятконят, сёра. 19-це векть омбоце пяльксста оцю васта мокшэрзятнень ярхцамбяльса занцесь модамарьсь (Балашов, 1995: 194). Снавста, розьста, пинемста пидельхть ксяль. Тя пингс оцю васта мокшэрзятнень ярхцамбяльса занци лофцсь, м., ловцось, э. (парной, шапама).
Пяк сире пингонь мокшэрзянь симомбялекс ульсь "пуресь", м., э., конань тиендезь медьста. Тяфта жа пуресь ульсь илань ётафтомань симомакс эрь озксста. Илань пуресь тиендевсь медьста, комляста, люкшаста и пидевсь пива лаца. Илань ярхцамбяльти сувсесь тяфтама симомбяльсь, кода позась, м., брагась, э. Тя пингс Мордовия Республикаса Ковылкинскяй районца Алькина велеса мокшетне ётафнихть озкс ила "Авань поза", конань сире пингть тиенделезь Очижинь шиста сявомок недяляда меле. Тяниге аф иретьфти симомакс лувондови квазсь. Эряви азомс, што мокшэрзятнень ашель авань и алянь башка ярхцамань койсна.
Археологическяй I – ушедомок II тёжянь кизотнень памятникне няфнесазь, кода лама векта инголе мокшэрзятнень плямаснон ёткса шачендсь виде шинь мирть няфтемань ширец, кона илядсь художественнай произведениятнень эса. Тиемок мазыста (наряжамок) покодемань предметтнень, кудонь кядьготнень, щапнень-каряматнень мокшэрзятне путнезь тевс культонь жувататнень, менелень тяшттнень. Виде шинь ингольдень образсь араль условнай стилизованнай формакс, кона сотфоль декоративнай пластикань законть мархта.
Мекольце колма векнень эса инь оцю васта мокшэрзятнень эрямаса занцесть тяфтама искусствань ширет, кода сёрмадомась, парьхциень нанкань стамась, наряжамань тиемась: ожнаста, рака кудняста, пуняста; крганянь кочкамась. Мокшэрзятне маштсть кодама (котфонь, коробонь, карень), сёрмань тиема. Сире пингста алятне тиендсть декоративнай резьбат шуфтонь кядьготненди, орнаментт кудбрятненди, рьвяямань-максомань илань сундукненди (парьхненди, вальмя прятненди, кодвасттненди, кштирдема лапати, шабань нюрямти и ст. тов).
Тя мокшэрзянь усолть (резьбаса шуфтть наряжамац), мирть-масторть няемац эсь покодемасонза няфтезе мокшэрзянь скульпторсь С.Д. Нефедов (С. Эрьзя, 1876–1959), кона тись пяк оцю тев миронь-масторонь ваянияса.
Шуфтть ланга покодемань ширесь тяниге эряй народть койса. Мордовия Республикаса Кочкуровскяй районца Подлеснай Тавла велеса ули художественнай школа, коса тиендихть шуфтть лангс кодама повсь сёрмат (резьба).
Мокшэрзятнень морама ширеснон, моротнень, инструменттнень колга сёрматф XVIII векть пялеста. Моронь творчествати ульсть характернайхть марстонь морама илась и ськамост морамась. Сембе моральхть аф илань ётафтомань (эпическяй, лирическяй, марстонь, рьвяямань-максомань) морот, ськамост – рьвяямань-максомань (кудавань морот), шабань нюрямонь (мадомань) морот.
Аф илань ётафтома моротне, конатне морсевольхть эрь пингть, мзярда повсь, тяниге морсевихть велеса (сяда лама – мокшетнень ёткса). Сире пингонь илань ётафтома моротнень эзда тяни морсевихть кой-кона рьвяямань-максомань паряфнематне, м., парявтнематне, э. (кориндаматне), иланнетне, явсематне кулыень колга или кой-коста лия явсематне (эсь прянь аф пара эрямать инкса и стак тов).
Кой-кона моротне и морамань вайгяльхне, конат инголи ульсть сотфт илань ётафтома шуфттнень, вирень, кудонь жувататнень мархта, тяни юмафтозь ингольдень сире пингонь сотксть и ванфтовсть синь аф илань ётафтома моротнень и мораматнень эса од ширеса (Бояркина, 1995: 438).
Морамань инструметтнень ёткста пяк содавиксокс ульсть нудей, э., нюди, м. (тростник) кафта лаца клорнет, кона тифоль кафта сотф шава фкя лацонь кувалмоса – 17–20 сантиметра – нюдинь почконяста. Сире пингть нюдиса морсесть эрь шинь, кштимань, ваныцянь, э. (кизонда жуватань ваномань) морот.
Букань, траксонь или тувонь (кой-коста илань печкомань жуватань) фамста тиендсть пяк содаф инструмент "фам", "уфам", м., "пувама", э. – кафта видонь волынкат, конат ульсть тифт аф фкя материалста (конань эзда синь тиендезь), трубкаста. Васенце волынкань видть (кожфонь пяшкодемать) тиендезь вазнянь кедьста, омбоцеть – букань, траксонь или тувонь фамста. Кафцьке видонь нюдихне сире пингста ульсть инь оцю морамань инструментокс, конань мархта морселезь илань вайгяльхнень и фкя ломанень мельге Роштувань кудонь, рьвяямань-максомань, сокаень-видиень озкснень моротнень морамаснон. Рьвяямань-максомань иласа нюдиень вайгяльсь ванфтолезень ломаттнень кальдявть эзда (сельмодемать). Лувондозь, што тя вайгяльсь тяфта жа маштоль ляпофтомс шкайхнень-ваныхнень седиснон. Сяс нюдиса сяда лама моральхть озкснень эса (Бояркина, 1995: 461–463).
Тяниень пингть мокшэрзятнень эрямаса васьфневи рузонь гармошкась, сяда сидеста – скрипкась, конань коряс кштихть, морамок сиде моронят мокшень, эрзянь, рузонь кяльса (рузонь кяльть мокшетне, эрзятне тяфта жа содасазь, кода и тядяннеть).
Мокшэрзятненди рузонь кяльсь – эсь ётковань (мокшетнень и эрзятнень) шарьхкодемань кяль, а тяфта жа лия ломаттнень, конат эряйхть Россияса, марса корхтамань кяль, культурань шарьхкодема. Но тя кафта кяльхнень эса, коса фкя ширесь сяда вии (рузоннесь), ули пелькс мокшень и эрзянь кяльхнень ванфтомаснонды, сяда тов виияфтомаснонды.
Мокшэрзятнень ёткса сяда кржа илядсь ломаньда, конат лувондсазь тядяннекс мокшеннеть и эрзяннеть. 1979 кизоня эряй ломаттнень тяштемста мокшэрзянь кяльхнень синць мокшэрзятне азозь тядяннекс 91%, а 1989 кизоня – 85,5%. Тяфта лиссь лама туфталонь инкса. Мордовия Республикаса и лия вастса, коса эряйхть мокшэрзятне, эсь тядянь кяльснон ашезь тонафне школада ингольдень тонафнема вастса, школатнень эса. Сизьгемонце кизотнень XX векста мокшэрзянь школатне ульсть ётафтфт рузонь кяльса тонафтомати. Тяниень пингть ошень школатнень эса аф тонафнесазь эсь тядянь кяльснон (мокшэрзянь кяльхнень тонафнесазь аньцек кода факультатив).
Мокшэрзянь шабатне, конат эряйхть Мордовиянь райоттнень эса, тяфта жа аф тонафнесазь эсь тядянь кяльснон.
Мордовиянь райоттнень эса, коса сяда марса эряйхть мокшень ломаттне, лисенди 21 райононь газета, но синь эздост фкявок аф лисенди мокшень кяльса.
1988 кизоня мокшень и эрзянь кяльхненди макссть государственнай статус, но синь аф путнесазь тевс республикань учреждениятнень эса, тевонь вятемаса, ошса ломанень инголе корхтамаса (пуромксса). Республикань радионь, телевидениянь эфиронь пингста корхтайхть мокшекс, эрзякс пяк кржа. Кода и лия Россиянь нароттне, мокшетне и эрзятне кармасть покодема эсь кялень ванфтомаснон, культураснон, историяснон, мифологияснон лангса. Эряви азомс, што тя пингти мифологиять ашезь ванонда, ашезь тонафне крхкаста.
Лит.: Балашов В.А., Лузгин А.С., Пpокина Т.П. Одежда // Мордва. Историко-культурные очерки. Саранск, 1955; Тяка жа авторхне. Пища и домашняя утварь. Азф раб. Бояркина Л.Б., Бояркин Н.И. Музыкальное искусство. Барбаро И. Путешествие в Тану. Барбаро и Контарини о России. Л.. 1971; Вавилин В.Ф. Поселение и жилища. // Мордва. Историко-культурные очерки. Саранск, 1995; Вихляев В.И. Расселение мордовских племен в I тыс.н.э. // Вопросы географии Мордовской АССР. М., 1974; Гурьянов С.К. Самосознание мордовского народа. Саранск, 1993; Евсевьев М.Е. Избранные труды. Т. 5. Саранск, 1966; Иожеф Р. История денег. Будапешт, 1968; Коковцев П.К. Еврейско-Хазарская переписка в Х в. Л., 1932; Лепехин И.И. Дневные записки путешествия по разным провинциям Российского государства в 1768–1769 гг. СПб., 1771; Марк К.Ю. Этническая антропология мордвы // Вопросы этнической истории мордовского народа. М., 1960; Мокшин Н.Ф. Этническая история мордвы. Саранск, 1977; Сон жа. Мордовский этнос. Саранск, 1989; Надькин Д.Т. Народоньконь вельмофтемань кизефксонза // Мокша, 1992, N 5–6; Петербургский И.М. Традиционные занятия и орудия сельскохозяйственного труда в прошлом и настоящем // Мордва. Историко-культурные очерки. Саранск, 1995; Путешествия в восточные страны Плано Карпини и Рубрука. М., 1911; Степанов П.Д. Древняя история мордвы-эрзи (Очерк. Первые письменные источники). Тр. МНИИЯЛИЭ. Вып. 34. Саранск, 1968; Сон жа. Древняя история мордвы-эрзи (очерк второй – археологические и этнографические данные). Тр. МНИИЯЛИЭ. Вып. 39. Саранск, 1970; Устно-поэтическое творчество мордовского народа. Т. 10. Легенды, предания, былички. Саранск, 1983; Феоктистов А.П. Очерки по истории формирования мордовских письменных литературных языков. М., 1976; Цыганкин Д.В. Уникальное достояние человечества // Мордовский народ: что нас волнует. Саранск, 1991; Harva U. Die religiosen Vorstellungen der Mordwinen. Helsinki, 1952; Эрзянь мастор. Саранск, 1994–1996 гг.
Васенце сёрматф материалхне мокшэрзятнень мифологияснон (сяда лама – религиознай воззренияснон) колга лиссть XIII векста. Синь эсост мокшэрзятнень сире религиякс азондсазь язычествать (Юлиан, П. Карпини, В. Рубрук). Кой-кона масторонь ланга якайхне (путешественникне) – миссионерхне тяфта жа няфнезь и идолопоклонничествать (XIV в. – И. Барбаро, XVI – Барберини, XVII – Ф. д'Авриль).
Сяда лама материал мокшэрзятнень религиянь ширеснон, мифологияснон колга сёрматф уезднай модань ункстайть К. Мильковичень записканзон эса, конань лемоц "Быт и верования мордвы в конце XVIII столетия" (1905). Тя тевса васенцеда корхтави мокшэрзятнень инь содавикс шкайснон-ваныснон колга (но аф марнек видеста азфт синь кой-кона лемсна); кода ётафнесть илань жуватань, саразонь, мациень печкомат и озкст тя шкайхнень лемс; лемдевихть ся васттне, коса ётафнезь озкснень (кереметть тожа), конат эсь функцияснон коряс явовихть оцюкс и ёмлакс; озксонь вятихнень колга; азондсыне калмамань илатнень, кода арьсесть мокшэрзятне тона шить колга.
Лама материалхт сире пингонь озондоматнень, озкснень, религиозно-магическяй тефнень, эсь прянь ванфтоматнень, калмамань, поминдамань, рьвяямань-максомань илатнень колга тяштьф М. Поповонь (1834), К. Фуксонь (1839), А. Леопольдовонь (1844), А. Примеровонь (1870), А. Мартыновонь (1865), А. Терновскяень (1867), Н. Орловонь (1876), А. Юртовонь (1877) работасост.
Саратовскяй губернияса А. Леопольдов сёрмадсь материалхт эряй ломаттнень соткснон тона шинь эряйхнень мархта (максольхть поминдамань ярхцамбяль кулыхненди калмалангса шувф варянява, прважальхть сюкпря теест, крксельхть монета). Лия источникнень эса няфтьф аф васетькшневи озкссь, конань сёрмадозе А. Леопольдов. Тя озкссь ётафтоволь август ковста и мярьгольхть теенза "керемедь" – ламбамонь ила (шять, "кере" – "керомс", м.; "таргамс медь" валхнень эзда) – медть лемс ила. Шять, перяф нешкепереть коряс кармасть сяда тов лемдема озондома, озксонь ётафтома васттнень.
Эсь лацонь материал культовой мифнень колга сёрматф Н.П. Орловонь "Мордва-мокша" статьясонза. К. Митропольскяень "Мордва" (1876) работасонза няфневи Тамбовскяй губерниянь ломаттнень мифологическяй арьсемасна (шити, ковти, зарятненди озондомась); аф цебярь вийти верондамась, конатнень эзда ламоцне шавовихть, кода арьсесть ломаттне, ёндолть эзда и тя вийхне пяк ванцазь видешить (православнай религиять меколангонь ширенц коряс). Инь оцю кяжи вийсь – равжа куйсь, конань кургста лиси тол.
Мокшэрзятнень мифологияснон (космогоническяй мифнень) тонафнемаснонды лама тись П.И. Мельников-Печерский ("Религиозные верования, домашний быт и обычаи мордвы Нижегородского уезда. 1887. Очерки мордвы. 1909"). Исследовательсь варжазе тиемс христианствань примамда ингольдень системать, кона тиевсь, полафневсь, кассь и вииясь лама вект. Сон меколанкт корхтась сянь колга, што мокшэрзятне ашесть озонда идолхненди, арьсесь, што мокшэрзятнень и руснень христианствада ингольдень верондамасна и иласна пяк малат.
Кой-кона исследовательхнень (И. Смирновонь, У. Харвань, М. Евсевьевонь) арьсемаснон коряс, П.И. Мельниковонь мокшэрзянь мифологиянь системац и Анге Патяй-Шкайавась, кона сёрматфоль Нижегородскяй губернияса, аф виде. Эряви азомс, материалхне корхтайхть меколанкт. Кепотьксонди, Шкайавать-Анге Патяйть тяниге мяляфтсазь аф аньцек эрзятне, но и Республика Мордовиянь Ковылкинскяй райононь мокшетне кода шачиень-касыень, шачфты авань, шабань ваны, лезды.
Мифологиять колга литератураста шарфты мяль В. Майновонь (1889) книгац "Les restes de la mythologie Mordvine". Авторсь кочказень инголи лисьф сембе покодемань тефнень, коса няфтьфт мифологиянь материалхт, сёрмадозень эсь сельмоса няйф мокшэрзятнень религиозно-магическяй иласнон и верондамаснон, конатнень пяк оцю вастсна наукаса, кепотьксонди, сравниндама ширде; азозе мокшэрзянь сире пингонь верондамать люпштаманц рузонь мифологиять лангс.
Шарфтыхть мяль материалхне верондаматнень, илатнень (рьвяямань-максомань, куломань, шачемань) колга, конат сёрматфт статьянь сборникса "Живописный альбом: народы России" (1880). Апак содак (ашезе тяште лемонц) авторсь сёрмады народть кафта религиянзон (сире пингонь и христианствать) колга, конат шарфтольхть мяль кафта сяськиень ушедомать лангс: цебярть и кальдявть. Сяс шкайхнень явозь кафта пяли. Тяка жа работаса лия апак содак авторсь тяштсь сянь колга, кода мокшэрзятне шарьхкоделезь "шить юмаманц" (шинь затмениять), кона ульсь кальдяв духть тевокс; прай тяшттнень, магиянь ширетнень сярядемань пчкафтомаса, мормацяматнень, повериятнень, илатнень колга.
Ётамок азондомать эзда теориять шири (анализти), кода марнек шумордаф тев, христианствав ётамда ингольдень мокшэрзятнень верондомаснон колга сёрматф И.Н. Смирновонь "Мордва" очерксонза (1895). Сон нолдазень тевс мокшэрзятнень ширде эсь кочкаф материалонзон и няфтезе, што духне – ломаттнень ванысна явовихть кафта группава: кудонь, конат малат кулофнень ваймоснон мархта и сят, конат няфтьсазь мастор лангонь ширеть. Исследовательсь няфнезе лама юронь эсь ширетнень, коса сяда васьфневсть мокшетнень – ава, атя, азорава; эрзятнень – паз (шкай) валсна; макссь характеристика озксонь илатненди, синь инь оцю ширеснон колга.
Очерконь сёрмадысь пяк крхкаста ванозень мокшэрзятнень эсь ширеснон верондомаса, кода синь кассть сяда тов; няфнесыне, кода Миронь-Масторонь шарьхкодемать эзда синь ётасть шкайхнень и мифологиянь обраснень шири. Сире пингонь озкснень эса И.Н. Смирнов яви ниле пакшт: 1) озондомань; 2) шкайхнень и ломаттнень ёткса сотыхне; 3) фкя кочкаф васта, коса озондольхть шкайхненди; 4) ётафтома ила. Сон сёрмады крхкаста эрь озксть колга и азондсыне синь эсь ширеснон; няфнесы марстонь сяда тов мокшэрзятнень и черемиснень верондомань арьсемаснон. И.Н. Смирновонь коряс, мокшэрзятнень верондомаснон лангс люпштасть ирано-скифскяй шабратне, мезсь няеви, кепотьксонди, валхнень эса "азоро", э., азор, м. (хозяин), конат састь зендскяй ahura и персидскяй aura (оцюня) валхнень эзда.
Пяк оцю тев тись финонь ученайсь Х. Паасонен, кона кочкась лама мифологиянь материал мокшэрзянь азондыхнень эзда, якамок мокшэрзянь велева (1890–1899; 1898–1901). Ламоц тя кочкаф азондоматне (материалхне) ульсть печатлафт оцю книгань серияса "Mordwinischе Volksdichtung", коса няфтьфт фольклоронь жанратне: морот, ёфкст, мормацямат, явсемат и ст. тов. Мифологиянь моротнень эса няфтьфт Вярде шкайхнень-ваныхнень образсна, синь тевсна. Статьясонза "Mythologisches, etymologischеs" (1914) Паасонен макссь анализ шкайхнень лемснонды, коста синь лиссть.
М.Т. Маркеловонь статьянзон эса, конат печатлафт "Религиозные верования народов СССР" сборникса (1931), корхтави аф аньцек мокшэрзятнень мормацямаснон колга, но и лия финно-угрань нароттнень колдубамаснон, калмамань, помондамань иласнон, атятнень культснон колга.
Сире пингонь илатне, озксне, иланди жуватань печкоматне, конат ётафневсть 1910 к. Пензенскяй губернияса, Наровчатовскяй, Городищенскяй, Краснослободскяй, Инсарскяй уездтнень эса, сёрматфт М.Е. Евсевьевонь работасонза "Братчины и другие религиозные обряды мордвы Пензенской губернии" (1914). Сон жа сёрмадозе васенцеда пяк крхкаста мокшэрзянь рьвяямань-максомань илатнень (1893), конань лама ширенза сотфт мифнень мархта.
Фольклорть мархта мифть сотксоц няфневи А.И. Маскаевонь исследованиясонза "Мордовская народная сказка" (1947). Ванфтомок структурнай фольклористикать, авторсь, кода и В.Я. Пропп, ёфксонь эсь ширеснон путнесыне карань-каршек мифическяйхнень мархта. Мифологиянь юр ули азондомаса жуватать-тотемть и мокшэрзянь авать рьвяямаснон колга, конатнень эзда шачендсть пялес ломатть и пялес офтт вирень жуватань вийса и прянь вятемаса. Волшебно-фантастическяй ёфксть А.И. Маскаев няфтьсы чудеснай персонажса, корхтай и якай предметтнень мархта, мифологическяй обраснень и кодама повсь магическяй лацонь тевса (кепотьксонди, ёрдаф брусста лиси панда; валонь азомда, кодамога тевонь тиемда меле путовихть или каладыхть ошне).
А.И. Маскаев яви инь содавикс сюжетт Вирявать, шабатнень колга, конат повихть мифическяй Яга-Бабань, м., э. кядьс и ванфтсазь эсь пряснон сонь эздонза аньцек эсь ёнюшиснон кувалма; азонды чудеснайста шачф аф пели цёратнень колга, конат сяськсть куйть мархта и ст. тов. Кода арьси исследовательсь, волшебнай ёфкснень песна павазуфт, геройть покотьфтсазь стане, кода покотьфтелезь инициациянь или рьвяямань-максомань сире пингонь илатнень эса, конат няфневихть мифса.
Пяк оцю васта мифологиять тонафнемаса, ваномаса А.И. Маскаевонь лия монографиянц эса "Мордовская народная эпическая песня" (1964), коса няфневи тя покодемать эсь ширец – пяк сире пингонь эрямась, кона ванфтовсь кода система мифологиянь арьсемать Мирть-Масторть и сонь лангсонза эряйхнень колга. Сяда цебярьста максови анализ моротненди, конат пяк малат (кой-кона мотифнень коряс) фантастическяй ёфксненди, сире пингонь мифологиянь азондоматненди: ломаттнень васедемасна мифическяй обраснень (чудовищать мархта сяськомась), тотепнень (охотникть, калонь кундайть, алашать) мархта.
Мифологиянь ширетне няфневихть моротнень эса, коса корхтави куломать мархта сяськомать колга (марстонь финонь сюжет), аф сембе лацонь шачф шабатнень колга; кода менельстонь цёрась (рьвяяйсь) саласы масторонь эряй стирть; морай шуфтть колга, кона кассь шавф ломанть калмалангозонза; рьвяямань-максомань илатнень колга. А.И. Маскаев арьсесь, што моротнень эса, коса корхтави куломать каршес сяськомать колга, няфтьфт ингольдень эрямань-ащемань содаматне, мзярда нинге пяк казямста афолезь путне карань каршек тяфтама ширетнень, кода семьясь и юрсь, ашесть путне оцю аф шарьхкодема кулоф атятнень и мифологиянь обраснень ёткова.
Васенце аськолкссь мокшэрзянь мифологиять сяда крхкаста ваноманцты ульсь тиф финонь учёнайть У. Харвань книгаса "Die religiosen Vorstellungen der Mordvinen" (1952), кона печатлафоль немецонь кяльса. Кочкамок марнек сембе печатлаф XIX – ушедомок XX веконь лисьф литературать, коза сувасть и мокшэрзянь эсь кядьса сёрматфт азондыхнень эзда материалхне, учёнайсь няфтезе шкаень виде тевть, синь фкя-фкянь мархта ладямань шиснон, азозе эсь мяленц мокшэрзянь мифологиять колга. Ваномок Х. Паасоненонь арьсеманзон, сон азозе, што мифологиянь Миронь-Масторонь тиемань мяльсь мокшэрзятнень ёткса ашель, и сяс тяфтама сюжетонь мархта мифне аф кунардонь (лиякс азомс, што тя мифне шачсть аф сире пингть). Эсь ширень шаромать мокшэрзятнень мифологияса сон лувондозе шкайхнень кафта ширдень пяльснон: алянь и авань. Башка васта мокшэрзянь мифологияса Х. Паасонен кадонды масторонь шкайхненди-лездыхненди. У. Харвань арьсеманц коряс, синь арасть сяда оцюкс – менелень шкайхнень лаца, мезсь няфнесы синь сяда мельдень шачемаснонды. Оцю мяль азф работаса шарфневи калмамань илатнень азондомаснонды, помондама шитненди, озксненди.
Кой-кодама од азондомат шкайхнень-лездыхнень колга кочкась этнографсь Н.Ф. Мокшин велень эряй ломаттнень эзда. Синь печатлафт работасонза "Религиозные верования мордвы" (1968). Сёрмадысь пяшкодезень од азондомаса пяк крхка и оцю У. Харвань, М.Е. Евсевьевонь покодемаснон мифологияса. Жанрань илань поэзияса мифологиянь мотифнень вешемаснонды сёрматф К.Т. Самородовонь монографияц "Мордовская обрядовая поэзия" (1980). Тяса няфневихть ломаттнень пяк сире пингонь арьсемасна Мирть-Масторть колга, синь мяльсна тиемс лангсонза кодамовок магическяй тев; верондамасна лама мифологиянь шкайхненди. Няфтезе, што мокшэрзянь илань поэзиясь (сяда пяк моротне) илядсть ингольденнекс аф лама христианствань шире мархта; марнек фкя лацоннекс христианствань илатне языческяйхнень мархта ашесть ара. Лиссь эсь лацонь мокшэрзянь кафта пяли верондама. К.Т. Самородовонь тонафнеманц коряс, церькавонь христианскяй илатнень и озкснень эзда ульсть сявфт аньцек синь лемсна и синь люпштамаснон вельде ульсть полафтфт сире пингонь сокамань-видемань илатнень ётафтомасна.
Мокшэрзятнень мифологияснон тонафнемаса, кеподемаса оцю васта занцихть мокшэрзянь фольклоронь материалхне, конат печатлафт оцю серияса. Сон лемтьф "Устно-поэтическое творчество мордовского народа" (лиссь 11 том, 17 книга). Тяса максфт и вановихть пцтай сембе фольклоронь жанратне (легендатне, преданиятне, моротне, мормацяматне, ёфксне, явсематне и ст. тов), конатнень юрсна сотфт мокшэрзятнень мифологияснон мархта.
Лит.: Барбаро И. Путешествие в Тану Иосафата Барбаро. Сер. Библиотека иностранных писателей о России. Отд. 1. Т. 1. СПб., 1836; Евсевьев М.Е. Братчины и другие религиозные обряды мордвы Пензенской губернии. Петроград, 1914; Сонь жа. Мордовская свадьба // Живая старина. Кн. 2., вып. 2, отд. 2. СПб., 1892; кн. 3, вып. 2, отд. 2. СПб., 1893; Живописный альбом: Народы России. СПб., 1880; Карпини И. де П. История монгалов. СПб., 1911; Леопольдов А.Ф. Моляны и поминки у мордвов Саратовской губернии // Прибавления к Саратовским губернским ведомостям. 1844. N 25; Мартынов А. Мордва в Нижегородском уезде // Нижегород. губерн. вед. 1865. N 24; Маскаев А.И. Мордовская народная сказка. Саранск, 1947; Сонь жа. Мордовская народная эпическая песня. Саранск, 1964; Мельников П.И. (Андрей Печерский). Религиозные верования, домашний быт и обычаи мордвы Нижегородского уезда // Нижегород. губерн. вед. 1887. N 7; Сонь жа. Очерки мордвы // Полн. Собр. соч. Т. 7; М.; СПб., 1909. Милькович К. Быт и верования мордвы в конце XVIII столетия // Тамбов. епарх. вед., Часть неофиц. 1905. N 18; Митропольский К. Мордва // Тамбов. епарх. вед. 1876. N 12–13; Мокшин Н.Ф. Религиозные верования мордвы. Саранск, 1968; Народы России. СПб., 1878; Орлов Н.П. Мордва-мокша // Пенз. губерн. вед. 1876. N 107–108; Попов М. Селиксинские мордвы. // СПб. вед. 1834. N 30; Примеров А. Религиозные обряды и суеверные обычаи мордвы Краснослободского уезда // Пенз. епарх. вед. 1870. N 16; Самородов К.Т. Мордовская обрядовая поэзия. Саранск, 1980; Сказания иностранцев о России в XVI и XVII веках. СПб., 1843; Смирнов И.Н. Мордва. Казань, 1895; Терновский А. Свадьбы – самохотки и моляны в мордовском селе Катьмис Городищенского уезда Пензенской губернии // Пенз. губерн. вед. 1867. N 36; Устно-поэтическое творчество мордовского народа. Т. 1. кн. 1. 1963; Т. 1. кн. 2 1977; Т. 2. 1965; Т. 3. ч. 1. 1966; Т. 3. ч. 2. 1967; Т. 4. кн. 1. 1967; Т. 4. кн. 2. 1969; Т. 6. ч. 1. 1972; Т. 6. ч. 2. 1975; Т. 7. ч. 1. 1972; Т. 7. ч. 2. 1979; Т. 7. ч. 3. 1981; Т. 8. 1978; Т. 9. 1982; Т. 10. 1983; Т. 11. 1987; Фукс К. Поездка из Казани к мордве Казанской губернии в 1839 году // Журн. МВД. Ч. XXXIV. 1839; Юртов А. Погребальные обряды и поверья крещённой мордвы Уфимской губернии // Изв. по Казан. епарх., 1877. N 8; Harva U. Die religiosen Vorstellungen der Mordwinen. Helsinki, 1952; Mainof W. Les restes de la mythologie Mordvine // Journal de la Societe Finno-Ougrienne. Helsingissä, 1889; Mordwinische Volksdichtung. Helsinki. Bd. I. 1938; Bd. II. 1939; Bd. III. 1941; Bd. IV. 1947; Bd. V. 1977; Bd. VI. 1977; Bd. VII. 1980; Bd. VIII. 1981; Paasonen H. Mythologisches, etymologisches // Memoir de la Societe Finno-Ougrienne XXXV. No 11. Helsinki, 1914.
Сире пингонь мифологиянь арьсематне Мирть-Масторть колга, коса ломаттне няфнесазь эсь мяльснон сонь шачеманц колга, лувондови инь оцюкс мифологияса. Сон кода кеме васта, конань лангса тиевихть верондомань ширетне, шарьхкодематне Масторть ингольдень и тяниень пингонц колга, кода сон шачсь-кассь и кодама васта эсонза занцесь ломанць.
Масторть мифологиянь шачемац няфневи аф аньцек космогоническяй мифнень эса, но и лама иласа (рьвяямань-максомань, калмамань, шачемань), озкснень, иланди жуватань, саразонь, мациень печкоматнень, повериятнень, содаматнень, кяльть (объекттнень и масторонь явлениятнень, фразеоло-гизматнень и ст. тов) эса (Напольских, 1991: 16).
Мокшетнень и эрзятнень мифологияснон юрсна тушендыхть финно-угорскяй нароттнень марстонь эпохаснонды (шять, II–III тёж. минь эрадонк инголи). Фольклоронь и этнографиянь материалхне, конатнень коряс ванови мифологиясь, аф фкат. Кой-конатне ёмлат, аф сембот, иляста азондоматне ащихть меколанкт, мезсь эряви шарьхкодемс синь сире пингснон мархта, юмафтомаснон, кафта мокшэрзянь этническяй группатнень шачемаснон, лия народонь мифологиянь люпштамать мархта: иранонь, тюркань, славянонь, балтиянь, мекольце пингть – исламонь, христианствань (Петрухин, Хелимский, 1994: 563).
Христианствать примама пингста ингольдень сире пингонь верондамась, кона эрясь лама пинге, кармась полафтома сяс, мес мокшэрзятнень мифологиянь иласнон лангс пяк люпштасть кафта верондамань ширетне – православиясь и сире пингонь верондамась.
Мокшэрзятнень арьсемасна Мирть-Масторть колга пяк малат ламоц индоевропань и сибирень ломаттнень мархта. Апак ватт марстонь мифологиянь азондоматнень лангс, марнек фкя шире мокшетнень и эрзятнень мифологияса аш (Маскаев, 1964: 131), мезсь няеви синь покодемань и эрямань-ащемань эсь ширеснон мархта, кафта кяльса (мокшень и эрзянь).
Эсь ширень мифологиянь шарьхкодемат сёрматфт мордватнень этнографическяй группаснон (шокшетнень, терюхаттнень, каратайхнень) ёткса, конат явовихть фкя-фкянь эзда кялень, илань, щамонь и лама лия эсь ширеса. Кепотьксонди, сире пингонь мифнень эса эрзятнень Вярдень шкайсна (демиургсна) – Чипазсь, мокшетнень – Шкайсь, Шкабавазсь; эрзятнень тя вастса (демиургть) кармась улема Чипазть цёрац – Нишкепазсь (кона ломаттненди мярьгсь покодема). Мифологиянь моротнень эса Нишкепазсь ащи озада тумоть лангса и явонды ломаттненди паваз, эряма. Терюхаттнень ульсь Шкайавасна (сембе шкайхнень тядясна) – Анге Патяйсь, конань И.Н. Смирнов азозе аф видекс и сявфокс классическяй греконь мифологияста (Смирнов, 1895: 268). Кода азоськ, мокшетнень ёткса Анге Патяйсь аф кунара сёрматф азондыхнень эзда Мордовия Республикаса Ковылкинскяй районца.
Мирть-Масторть шачеманц колга (космогоническяй) мифта аф лама, шять, сяс, мес мяльсь Мирть-Масторть тиеманц колга (Harva, 1952: 144) ульсь аф пяк оцю (Мирсь тиезе эсь прянц сонць). Эрзянь мифологиянь моротнень эса, кода арьси К. Митропольский (Митропольский, 1876: 18), васенцесь, мезсь кандсь Миронь шачемать, ульсь Иневедсь, м., Покш ведсь, э, конань ланга уйсть колма калхт. Мирть шачемац, мокшэрзятнень мяльснон коряс сотф Масторть (Модать, м., э.) мархта. Христианствань верондамать люпштаманц эзда мокшэрзятнень лангс кармась эвондама арьсемась Миронь-Масторонь тиить колга. Мокшэрзятнень азондомасна Миронь-Масторонь шачемать колга шарфтфт Шкайть эзда (апокрифическяйхть). Тя азондоматнень коряс, Мирть-Масторть тиеманц эса ульсь покодикс аф аньцек Шкайсь, м., Чипазсь, э., но и кяжи вийсь – Шяйтанць, м., Идемевсь, э.
Инь сире пингонь азондомась Мирть-Масторть тиеманц колга, путомок карань-каршек лия волжско-финскяйхнень мархта, и конат апак сотт ломанень – христианствань и богомильскяй шарьхкодематнень мархта (Напольских, 1991: 141), – мифсь, коса корхтави сянь колга, кода демиургсь яксяргонь образса чёпафнесь мода пакшканкса Ине ведть алу (сельгомок тя моданять, сон тиезе Масторть-Модать). Шяйтанць, тяфта жа тиемок сембе демиургть тевонзон, тисыне панттнень (УПТМН, 1983: 188).
Лия мокшень мифнень эса ули народно-христианскяй люпштама (мода пакшть кяшемац). Кепотьксонди, Вярде Шкайсь, уендемок венчса, мярьги Шяйтанти гоголень образса чёпафтомс шуваронкса Ине ведть потмаксс. Но сонь аш мялец тиемс Вярде Шкайть мярьгоманц (колмоксть азомс Шкайть лемонц) и сяс кандозе шуварть аньцек колмоце чёпафтомда меле. Масторть тиемац моли сяськомок Шяйтанть мархта: Шяйтанць таргай Ине ведть потмаксста "тиемань" пакш, конань Чипазсь начфтсы кургсонза, сельгсы и тяфта шачи Масторть виде лангоц. Сяда меле Чипазсь полафтсы Шяйтанть тифонц – сембе аф видеть (лоткнень-латкнень, панттнень) цебярь шири.
Эрзянь мифонь вариантса Чипазсь, уемок Ине ведьга, сельгстонза и эрьхтемок байдеконц мархта кевть, тисы Шяйтантть, конань тяда меле кошардсы чёпафтомс шуварть инкса. Шуварсь, конань ёрдазе Чипазсь, кармай касома и арай Масторкс (Мельников, 1981: 45–47).
Лия мифса (ашезь сёрмада кинь – мокшень или эрзянь) Шкайсь кошардсы аф цебярь вийть, кона уендсь ведьга яксярга – ныроконь образса, таргамс ведть потмаксста мода (Митропольский, 1876: 19). Тя мифне, а стане жа легендатне, моротне, коса демиургсь кошардсы Шяйтанть, кона уенди нармонень образса васенце Ине ведть ланга, таргамс потмаксста мода, пяк малат финно-угорскяй мотифненди Мирть-Масторть тиеманц колга.
Ведьга уенди нармонть покодема ширец мокшэрзятнень ёткса, кода и финно-угратнень, ульсь пяк сире пингть, мезть тяфта жа няфнесазь археологическяй материалхне (бронзовай повфнематне – "яксяркне", яксяргонь пильгелапкань повфнематне, кудонь яксяргонь лаца яндаватне и ст. тов.).
Сяда кржа сюжетта Масторть тиеманц колга Ине Нармунть, м., (Ине Нармонть, э.) вельде. Сон алыяй Ине ал, м., э. (Оцю ал, м.) и тянь эзда тиеви Мирсь-Масторсь: покаряв Масторсь – тюжять эзда, ал кедьста – менелень и модалдонь калгодсь. Мирть тиеманц колга мифнень эса васьфневи эрямань шуфтть образоц, конань ала (сяда тов – лангсонза) Масторть тиемда меле уды кафксть (эрь пингть 30 киза) эрзянь демиургсь Чипазсь. Мзярда сон уды, шуфтсь кеподи вяри, сёлгомок Шить эсь тарандонзон мархта, таргамок юронзон мархта модалдонь летькть; ведсь пяшкодьсыне лоткнень, конатнень тиезень такор модать лангс Шяйтанць. Ся вастса, коса удось Чипазсь, илядсь крхка васта, кона пингта меле арась Сура ляйть ведьрашкокс (Mainof, 1889: 109–110).
Мокшэрзятнень мифологияса Мирсь, кода и лия финно-угорскяй нароттнень, явови колма оцю пяльксова: вярдень – менельсь, м., э.; кучкань – модась, м., э., конань перьфке Ине ведь; алдонь – модалсь, якшама, шобда мирсь. Тя сембе колма мирхнень сотсыне Келусь.
Кой-кона эряма васттнень эса эрзятне арьсесть, што сембось Мирса тиф нешке лаца ниле рядса: вярдень, алдонь и кафта кучкань (фкять эса – ломаттне, омбоцеть – кодама повсь эряйхть). Эрь нешкть ванцы Шкайсь, кона, кода "нешконь ваны" (оцюня), царствовай нешкса. Менелень Оцюнясь (нешконь ванысь тожа) – Инешкипазсь (Нишкепазсь) тисыне тяшттнень, конат, кода арьсихть эрзятне, павазу ломанень ваймот и ня ваймотне эряйхть пиндолды кудса (куттне валдоптфт шинь сюрелдаса). Ломаттне няйсазь тя Шкайть ломань лаца, кона тиенди нешкт, раштафты мешт, конатнень перьфке шарондыхть мешне – ваймотне. Шкайть эряма вастокс лувондозь Карьхкя Прять (Большая Медведица) или Веста созвездиять (шять, Весы – Т.Д.) (Mainof, 1889: 109).
Кода арьсесть мокшэрзятне Мирть колга, васенда сембе, мезсь ульсь Масторть лангса, ведьса, кожфса кассь Масторть мархта. Кода лувондовсь, Масторсь васенда ульсь пяк ёмланя (Harva, 1952: 140). Фкя мифнень коряс, Масторсь аф ламода карьхкя пря лаца, конань пенза мяньфт или геометрическяй фигурань формаса; лия арьсематнень эса – покаряв, конань перьфке Миронь ведь (Ине ведь, м., э.), или ниле песа-ужеса. Эрь ужеса ащихть сиянь столбат. Мокшэрзятнень арьсемаснон коряс, эрь ужеса сёлкфт боцькат, конань потмоса ащихть Вармавать – вармать ваныенц цёранза. Кона боцькясь панжеволь, ся пяльде уфаль вармась (Harva, 1952: 141).
Эрзянь мифологическяй моротнень эса Масторть кирдьсы акша калсь (белугась) или колма калхне: севрюгась, наругалсь, акша калсь, конатнень ванцыне Рававась (Волга ляйть ваныец, лездыец). Калхне ащихть морять и Равать ёткса и ванцазь Масторонь эряйхнень (Евсевьев, 1963: 209–210). Тя калхне уихть колма ушетксненди, колма латкненди, штоба путомс копорьснон Масторть алу: оцю калсь – шинь стяма ширети, кучкастось – шить пяленцты (обедшкати, шять Мастор кучкати), ёмлась – шинь мадома ширети (УПТМН, 1963: 26).
Волшебнай азоматнень, мормацяматнень эса няфневи, што Масторть кирдьсазь ведень и модань шавоть ёткса колма китт (Harva, 1952: 130–140). Уемок аф фкя шири, синь тисазь и ванфтсазь цебярть, Мирть-Масторть покоенц (равновесиянц). Тя масторонь "кирдихнень" эзда, кда синь пяк вишкста уихть, тиендевихть потопт, Модань-Масторонь шерьхкомат. Сяда мельдень мифнень эса сембе тя аф цебярень тиематне, кода арьсесть мокшэрзятне, лисендихть сяс, мес Шкайсь наказасыне ломаттнень грехснон инкса, мес синь аф ванфтсазь озкснень-илатнень, конатнень тиезь нинге атятне.
Мифнень коряс, акша заповеднай калть ванфтсы Ведявась, мезсь максы туфтал няемс тя калть образса тотем, ломаттненди кардаф кундамс кал (Маскаев, 1964: 237).
Ниле Мастор ужетнень колга арьсемась сотф, шять, ниле светть пяльксонзон мархта: шинь мадомать, шинь стямать, лямбе ширеть, якшама ширеть. Но няфтьф сон аф пяк шарьхкодевиста. Тя кись макссевсь Шить коряс: инголе – "шинь стяма ширесь", м., чи лисема ён, э., фтала – шинь мадома ширесь, м., чинь мадома ён, э. Шкайхнень няфтемасна тяфта жа сотфт шинь стяма ширеть мархта, коста, кода арьсесть мокшэрзятне, синь сашендсть.
Инь оцю виде ширекс Масторть лангса лувондовсь шинь стяма пяльсь. Тоса стяшенды Шись, шачи шинь валдсь, ся пяле эряйхть Шкайсь, Нишкепазсь. Сяс мокшэрзятне озондсть плманжа лангса, ваномок шинь стяма шири. Сире пингть тя пяли тиендезь кудонь кенкшнень.
Рьвяямань-максомань илань ётафтомань моротнень эса Масторть тожа ниле уженза, кучкасонза – сиянь стулхт (менелень шкайхнень символсна) и тюжя шрат (шачемань символ). Ниле уголсь (квадратсь), кода мифоэпическяй символ, няфневи кудонь путомань илатнень эса: тиендевсь квадрат, кучказонза путнесть шра, лангозонза кши-сал и тяда меле озафнесть од шуфтоня (койть коряс – тумоня, кона няфнезе шачемать и сяда тов – эрямать). Кудбрясь символизировандазе менельть, срубсь – модать, седялсь – модалдонь мирть.
Масторть тиемда меле Шкайсь тисы менельть. Тяшттне тифт кевнятнень эзда, конатнень сон кочказень Масторть лангста (Шить, Ковть колга мифт апак сёрматт). Васенда менелень вастсь няевсь кода миронь пакш, васта менелень валдтненди. Мокшэрзятнень арьсемаснон коряс, шить лангса эрясть Шкайсь и Чипазсь. Кой-кона повериятнень эса мокшень Шкайть эряма вастокс азови Ковсь (шять, сяда мекольдень пингть, сяс мес корхтави аф аньцек Шкайть, но и христианскяй мифологическяй Иван Предтечань образонц колга). Менельсь лувондовсь Масторть лангса вельхтердакс (сводкс), Миронь кучкакс (сяс Полярнай тяштти мярьгольхть "менель петьколь"). Мокшетне нинге содазь "менелень тёкшть", "менель ёжеть" (инь оцю васта, менель кучка).
Кода арьсесть, ши валдсь Масторть лангс мольсь менель вельхтердань варянява. Мормацяматнень, моротнень, калмамань илатнень эса менелень вельхтердась няфневи золотойкс, сияннекс, кой-коста хрустальнайкс, конат максыхть валда и лямбе.
Мокшэрзятнень арьсемаснон коряс, ломанть ваймоц куломда меле туй лиезь валда менельти Нишкепазти, коса сон путы теенза васта, а ронгоц иляды Шяйтанти. Сяда мельдень арьсематнень коряс, менельса эряйхть аф эсь пингстост кулофнень (шабатнень, праведникнень) ваймосна.
Мифологияса менелень мирсь ащи лама ярусста, конань эзда фкясь кшнинь, омбоцесь – кевонь. Мзярда эрзянь Пургинепазсь (Атямшкайсь) арни толонь тюсонь алашатнень лангса, конат кильтьфт колесницас, шарыснон и пильгснон алда лиихть цяткт (Юртов, 1883: 129). Кда ломаттне афолезь вана аф мярьгоматнень (запреттнень), Пургинепазсь кой-коста наказалезень синь, шавомок кевонь налса, конатненди мярьгольхть "пурьгине кев", э., "атям кев", м.
Мокшетнень арьсемаснон коряс, инголи менельсь ащесь пяк маласа Масторти, коволхне токальхть кудонь трубатненди, сяс эрзянь авась шаштозе сонь коцькаргаса, мокшеннесь – пачкалгса; лия мифнень эса менельть можналь токамс кядьса (Harva, 1952: 140). Терюхаттнень мифснон коряс, сембе шкайхнень тядясна Анге Патяйсь менельста кайсель Масторть лангс эряма, кона молель раса, пизем, лов, зарница вельде (Мельников, 1981: 81).
Шить, Ковть шачемасна апак содакт, но, кода арьсесть мокшэрзятне, синь эвондасть менельть тиеманц меле. Ковда, Шида башка мокшэрзятне содазь Каргонь Кить (Млечный Путь), Курсякст (курся, э. – коромысла) – Весы созвездиять; Озяксть, э. (Плеядать). Синь лемсна няфнезь мокшэрзятнень сире коень поэтическяй мирть шарьхкодеманц. Миронь-Масторонь вийхнень персонификацияснон пингста вярдень мирсь кармась вярдень шкайхнень эряма вастокс (Шкайть, Чипазть, э., Нишкепазть, э., Пурьгинепазть, э.).
Шити, Ковти, тяшттненди тиендсть илань-озксонь жуватань печкомат, магическяй тефт, ванолезь аф мярьгоматнень. Шить культоц няеви лама илатнень эса: рьвяямань-максомань, озкснень; эрямань предметтнень, наряжаматнень эса.
Фольклорса Шись, Ковсь вановихть кода ломатть. Лувондовсь, што "Шись – стирь, Ковсь – цёра". Шити макссихть эпитетт "мазы", "лямбе".
Васенце ломанць тиеви Масторть, менельть, няеви Мирть-Масторть тиемда меле. Мокшень и эрзянь антропогоническяй мифне (ломанть шачеманц колга) аф фкат. Мокшень Шкайсь "тисы" васенце ломанть колмогемонь кизонь мокорьста (эсь виенц, ваноманц, ёраманц вельде). Эрзятнень мифологияса Чипазсь тисы ломанть сёвоньцта (Мельников, 1981: 53), модаста (Митро-польский, 1876: 19). Нижегородскяй и Симбирскяй губерниянь терюхаттнень мифснон эса ломанть кармась тиема Шяйтанць сёвоньцта, шуварста, модаста, конат сявфт Масторть сизьгемонь сисем (аф фкя) вастстонза, а педа пес "тиезе", уфамок сондеенза эряма, Чипазсь (Мельников, 1981: 54).
Мокшетнень мифологияса Шкайсь васенда тиезень ломаттнень пяк оцюста, максомок теест 99 аршинонь сере, а эряма – 700–800 киза, но синь юмафтозень потопсь. Сят, конат илядсть, пингонь ётазь арасть сяда ёмлакс.
Эрзянь мифологическяй моротнень эса Масторть тиемда меле васенда шачи Шись, сяльде – Ковсь, колмоцекс – васенце ломанць и эрзянь народсь (Э., м., 1928: 3), кона, эрямок 70 киза, кармась эряма сизьгемонь сисем велева и пяшкодезе Масторть (Harva, 1952: 137–138). Лия материалхнень (азондоматнень) коряс, колма Ине Нармунень, э., (Ине Нармонень м.,) алста шачихть васенце колма народонь ломаттне: эрзятне, русне, чувашне.
Койхнень, порядкатнень тисыне эрзятнень Вярдень Шкайсна Нишкепазсь Пурьгинепазть, Никулапазть (христианскяй святойть) мархта (М.V., 1977: 2). Ине Нармунць, э., (нармонць м.,) няфневи кода эрямань коень ушеды. Сонь колганза улихть морот-мифт (М.н.п., 1957: 60), коса няфневи, што сон ащи пизосонза Ине чувто, э., (шуфта) – тума, келу м., лангса или паксяса (УПТМН, 1981: 104), коса сон колма алста нарвай колма нармотть: цёфксть, жаворонкать, кукуть, конатненди максы покодема васта: жаворонкати – сокамань-видемань хозяйствать (тяфта жа сон ёмла и од шабань пингонь символ); кукути – вирень хозяйствать (теенза макссь нинге ризфонь символ), цёфксти – кудонь (и од пингонь символ).
Теогоническяй (шкайхнень колга) мифне ванфтовсть аф лац и аф сембе шкайхнень колга. Кода арьсесть мокшэрзятне, Мастор лангонь и тяфта жа Вярдень шкайхне шачихть или лисихть алста: эрзянь шкайхнень тядясна Анге Патяйсь шачсь (лиссь) алста, конань тапазе (апак няйхть) Чипазсь. Преданиять коряс, колма акатне-шкайхне: шачемань – Норовавась, э., вармань – Вармавась, м., э., вирень – Вирявась, м., э., шачсть колма алста, конатнень алыязень Ине нармунць, э., (Нармонць м.,) оцю келу лангса пизосонза (Harva, 1952: 141). Эрзянь Нишкепазсь шачи Чипазть эзда; Масторонь Кирдить, м., э. тиезе Шкайсь; Вармапазсь, э. – Вирявать цёрац; модалдонь шкайсь Масторпазсь, э. шачсь Чипазть и Норовавать (урожаень шачемань Шкайавать) эзда; Пурьгинепазть (Атямшкайть) шачфтозе Анге Патяйть стирец Нишкенде тейтерсь. Шкайсь (демиургсь) шачфтсы эсь прянц. Сонь тевонза и тиеманза апак перякт пингса и Мирса-Масторса.
Мокшэрзянь мифологияса сяда лама шкайавада, кона няфнесы мифологиять эсь ширенц. Масторонь ваныкс ульсь Масторавась, м., э., а сонь лездыец – Модавась, м., э. Масторть лангса эрясть шкайаватне-лездыхне: модань сокай-видиень, жуватань, Масторонь, покодемань, Миронь (ведень, вирень, толонь, вармань и стак тов). Синь, кода арьсесть мокшэрзятне, улихть мирдьсна и шабасна (Смирнов, 1895: 209–210), но ськамост вийсна аш (аньцек лездыхть рьваснонды, тисазь арьсемаснон и мезе ёрайхть рьвасна).
Патриархальнай теогониясь кармась няевома, шять, сяда меле и мокшэрзятнень крестиндамда инголе (XII–XIII вв.) нинге ашезь кенере арамс виде системакс и шашфтомс матриархальнай "Олимпть". А.И. Маскаевонь коряс, мзярда ульсь матриархатсь и матриархальнай идеологиясь, то, шять, ашельхть мокшэрзянь мифологияса Оцюнят – алянь Шкайхть, конат афольхть зависенда ава шкайхнень эзда. Шкайаватненди синь арсесть аньцек мирдекс (Маскаев, 1964: 144).
Аф ваномок сянь лангс, што тяниень пингть валхне "Шкай", м., "Паз", э., – ётафневихть кода христианскяй "Бог" (Шкай), кода аля Шкай, мокшэрзятне синь ванондсазь аф авань и аф алянь Шкайкс. Кода алянь и авань Шкай ванондови Керень-Шочконьпазсь, э., (кудонь путомань Шкайсь м., – лездысь). Но мокшэрзянь кяльхнень эса алянь-авань шире валхнень эса "Паз", э., "Шкай", м., аф няфневи, сяс мес аш родонь грамматическяй категория.
Пяк содайкс (виикс, аф сембе лацокс) шкайхнень тисыне содамошисна. Синь маштольхть арамс антропоморфнай (ломанень), зооморфнай (вирень жуватань, сидеста нармонень), растительнай (Мастор лангса шачиень), гибриднай (пялес вирень жуватань, пялес ломанень) образса; кой-конат эздост шачфтыхть кода ломатть (Смирнов, 1895: 203–204), рьвяяйхть масторонь аватнень лангс. Улихть морот-преданият Пурьгинепазть и Масторонь стирть Литовать (Литувать, Сыржать и ст. тов.) рьвяямаснон-венцямаснон колга (Йаков, 1848: 59–60). Тя тевть тисы сонць Пурьгинепазсь, но улихть преданият, коса стирсь сонць эняльди сявомс сонь менельти. Шять, Пурьгинепазсь – пяк сире пингонь марстонь финскяй Шкай (Kuusi, 1963: 144).
Мокшэрзятнень арьсемаснон коряс, Мирса-Масторса азорондайхть Вярдень и алдонь шкайхне, конат олицетворяндасазь Шить, Лямботь, Толть и лама лия арьсематнень (понятиятнень). Эрь Шкайсь Мирса-Масторса ваны, лезды максф (кода азоронди) Шкайть эзда вастти. Кепотьксонди, Вирявати (кона ванцы сембе вирть) сюконяльхть и кулхцондолезь сембе, мезе ули вирьса; Ведявати (ведень ваныти) – ведсь и сембе, мезе ули эсонза и ст. тов. Эрь Шкайть лангса азорондась сяда оцю Шкай. Кепотьксонди, тумотне "кулхцондолезь" тумонь Шкайть – Тумопазть, э., Тумошкайть, м., кона сюконяль Вирявати, а Вирявась – Шкайти, м., э. (демиургти).
Мокшэрзятнень сире пингонь шарьхкодемаснон коряс, шкайхне – васенце юронь ваныхне, тона шинь азорхт, конат малат ломаттненди. Тяфтама шкайда ульсь лама, но васенце вастса ащесть шкайхне, конат ванозь, лездсть эряма вастти – кудти, м., э., или юрти (Смирнов, 1895: 200): Кудавась, м., э., (кудонь ванысь), Юртавась, э., Юрхтавась, м., (юронь ванысь), Пянакудавась, м., Каштомсь, э., (пянакудонь ванысь), Кардазавась, м., Карда Сяркось, э., (кардазонь ванысь), Банявась, м., э., (банянь ванысь) и стак тов.
Ломаттне ванолезь мяльснон и лия Миронь-Масторонь ваныхнень-шкайхнень: ведть, вирть, толть и ст. тов.
Мокшэрзянь мифологияса политеизмаста (лама шкайхнень эзда) ульсь мяль тиемс фкя шкай, кепотьксонди Нишкепазть, э., (Чипазть цёранц), Шкайть, м. Но сон педа пес аф шумордави тюрематнень, шабрань народонь сяськоматнень мархта. Лама лия эрзянь эряма васттнень эса Оцю Шкайкс лувондови то Чипазсь, то сонь цёрац – Нишкепазсь; мокшетнень – Шкайсь.
Мирть-Масторть и васенце ломанть тиемда меле ломаттне раштасть. Эрзянь Чипазсь явозень синь лама народкс, конатненди макссь кяль, верондама. Лувондовсь, што Масторса 77 вера и сняра жа кяль (Мельников, 1981: 56). Чипазсь максы ломаттненди Оцюнят, судьят, штоба няфтемс ломаттненди эряма виде кить.
Шяйтанць, м., меколанкт, максы тюриень, аф цебярь вий ломаттненди. Сон канды Масторти комля, тонафнесыне ломаттнень тиемс эздонза пуре. Ломаттне ушедыхть симома, фкя-фкянь лангс кяжияма, эсь ётковаст сяськома. Шяйтанць кошардсыне ломаттнень шавомс Нишкепазть, кона, кода Иисус Христос, арай эреклафокс и кеподи (туй) менельти (Мельников, 1981: 55–56). Тяфта няфтеви ломанть кальдяв тиемац, грехти прамац, кона мала христианскяй верондамати (Спасительть куломанц мархта). Штоба ломаттнень наказамс (мезе синь тисть), Мирсь-Масторсь панфты кяж: Шись кармась валдоптома сисемксть сяда кржаста, тялось – сисемксть сяда якшафтсь, модать лангса эрявсь сяда лама покодемс, Мастор лангса шачись-касысь кальдявгодсь.
Ломаттнень и шкайхнень ёткова сотксокс лувондовсть "локсейть", э., (локстихне м.,). Шять, тянь мархта сотф мокшэрзянь илась "жаворонкат" (мзярда васьфтелезь Масланцяста нармоттнень и моральхть морамань инструментса локстиень вайгяльхть) (Бояркин, 1986: 43–44).
Штоба шарфтомс шкайхнень мяльснон цебярькс и синь арьсельхть пара ломаттненди, ломаттне тиендельхть лемозост озксонь жуватань печкомат. Кда тянь юксталезь тиемс, кона лувондовсь эрявиксокс, шкайхне кучельхть ломаттненди зиятт. Сяс и шачсть, шять, лама сотф верондаматнень мархта илат, озондомат (озкст), мормацямат (орожеямот, э., воражиямат, м.). Пингонь молезь валомне кармасть кочксема эсь ёткстост ломатть, конат налхксть жрецонь роль. Синдеест мярьгольхть велетнень эса аф фкакс ("возатя", м., "озатя", э., покшатя, э. и стак тов). Тяфта лиссть "содыцят"; э., "содай ломатть", м., (знахарьхть, колдутт), конат, кода арьсесть, маштольхть содамс мезе арьсихть шкайхне, мезе синь ёрайхть, шарфтомс мяльснон цебяренди, ётафтомс кяжснон (Самородов, 1980: 33).
Васенда озондоматне и мормацяматне ульсть пяк сотфт фкя-фкянь мархта, сяс мес синь ульсь фкя кисна: тиемс магическяй илат (вал мархта), конат ляпоптолезь шкайхнень, штоба синь максольхть козяши (сёронь шачема, жуватань раштама) и шумбраши. Магическяй илань тефне ушедсть явома снярда, мзярда мокшэрзятне кармасть явома шкайхнень цебярькс и кяжикс (Самородов, 1980: 34). Цебярь (лезды) шкайхнень ляпоптолезь мяльснон озондомаса, иланди-озксонди печкома жуватаса (штоба арьсельхть ломаттненди пара); кяжи духненди – мормацямаса, штоба синь лездольхть ломаттненди (кяжи духокс мокшэрзятне лувондозь сятнень, конатнень тиезень Шяйтанць).
Ингольдень озондоматне (озксне), коса печкольхть жувата, ётафневсть эсь пингстост и тиелезь кодамога Шкаень лемс (ванк: Озкс).
Мифологическяй моротнень, преданиятнень, быличкатнень эса, коса корхтави ошень, меленцянь, церькавонь путомать колга (Маскаев, 1964: 83–84), няеви, што пяк сире пингста ульсть аф символическяй, а видексонь иланди ломанень печкомат. Сят, кит тиелезь илать, кона сотфоль кодамовок строямань мархта, керолезь пакшень-пакш нилева жертвань вещатнень, жувататнень и путолезь синь стройкать ниле ужева. Синь мярьгомаснон вельде церькавонь склепти сёлголезь (калмалезь) кочкаф сембе велень пуромксса стирть, конань, кода арьсесть, сяволезе жертванди Модавась (Евсевьев, 1961: 90–93). Иланди кочкаф кулома стирть мокшэрзятне луволезь велеряйхнень ёткса цебярькс.
Кода арьсесть мокшэрзятне, Масторалсь – кулыхнень эряма вастсна; сяда тов арьсесть, што тоса грешникнень ваймоснон вастсна. Васенда тона шить азондолезь аф пяк шарьхкодевиста. Мокшэрзятне ашезь явфне адть и райть (тя верондамась сась сяда меле, мзярда примазь христианствать). Верондасть фкя тона шити, коса эряйхть кулоф атятне и кона ульсь менельса, Масторть ала и коса-бди тоса, ичкозе (ашель фкя васта). Масторть ала оцюнясь – Масторпазсь, э., Масторатясь, м. Сон кулыхнень ванысна, теенза энялькшнесть пачфтемс тона шити ярхцамбяль юронь и содаф ломаттненди.
Мокшэрзятне арьсесть, што кой-кона шкайхне пяк малат кулофненди (предкатненди), конат фкя-фкянь мархта корхнихть, васетькшнихть. Кулофнень и ломаттнень ёткса сотксокс тяфта жа лувондозь Вармавать.
Тона шиса (Масторть ала), кода и тя шиса, касыхть вирьхне, шудихть ляйхне, улихть велет; тоса ули "эри ведь" ("живой" ведь). Модалдонь мирсь няфтьф моротнень и ёфкснень эса, коса корхтави аф эсь шачфты тядять и аф родной стирть (падчерицать) колга. Стирсь пови кулофнень царствас, коса сон сяви "эри ведь" (Маскаев, 1964: 60–61).
Мокшэрзятнень верондамаснон коряс, тона шиса кулофнень тяфтама жа эрямасна, кодама и тя шиса. Сяс калмамста калмоти мархтост путольхть покодемань инструметт, кудонь кядьгот, яндават, наряжамат и ст. тов.
Мокшэрзятнень мифологияса оцю мяль шарфневоль юрста кулофнень (предкатнень) культснонды. Кода ни корхтавсь, предкатне – васенце юронь ваныхне. Верондасть, што синь лездыхть эряй ломаттненди, ванфтсазь эсь юрснон аф цебярьда (Маскаев, 1947: 53). Мзярда ушедсь срадома патриархальнай юронь вийсь, кармась ванфтомонза предкатнень культснон семьясь. Фкя элементокс тя представлениятнень колга, кона тисы культть, лувондовсь верондамась кулофть ваймонцты, тона шинь эрямати, арьсемати семьянь покровительть колга. Тяфтома афоль уле ба арьсема атятнень и синь вийснон (цебярь и наказай) колга.
Пяк цебярьста няфтьф предкатнень культсна рьвяямань-максомань и сяда пяк калмамань иласа. Но кулофненди тя пингс ули кафта ширдень ванома: фкя ширде – пелема и куроконе эздост явомс (тянь инкса тиендсть кодама повсь магическяй ванфтомань тефт (ванк: Ловажа); омбоце ширде – кодама повсь мялень ванфтома). Синь лемозост тиендсть башка семьянь или юронь помондама шит (калмалангонь шит, м., калмолангонь чит, э.), конат занцесть религиозно-мифологическяй арьсематнень эса оцю васта.
Кулофнень лемсна лятфневольхть озксста, теест эняльдсть юронь (семьянь) и велень озкснень эса, тернезь Очижида инголи куду и Очижинь мекольце шиня прважалезь меки эсь вастозост; калмамда инголе кудса тиендсть лама эсь прянь ванфтомат, конат сотфольхть кулофнень мархта (афольхть мярьге якамс кяпе, нюряфтомс шабань нюрямть). Мокшэрзятнень верованияснон коряс, эряй ломаттненди лездольхть тяфта жа аф эсь куломасост кулофне – эсь прянь пондайхне, ведти ваяйхне и ст. тов. Кепотьксонди, штоба "анамс" пизем (мзярда коське пинге), кой-кона сярядематнень пчкафтомста.
Апак "корхтак" (апак анак совет) кулофнень мархта (рьвяяма-максома иласа, мимаса-рамамаса и ст. тов.) инголи мокшэрзятне мезевок ашесть ушеткшне. Ломаттнень арьсемаснон коряс, цебярьда башка, кулоф предкатне, кяжиямок мезевок лангс, маштсть кучемс сярядемат, аф шачи киза, кальдяв и ст. тов. Верондасть, кда синь ванфтомс мяльснон, почфамс – кармайхть арама цебярькс. Сяс теест тяфта жа тиендельхть иланди печкома (алаша, уча, вазня) васенда калмалангса, пингонь ётазь – кудть пирьфса.
Мокшэрзянь мифнень коряс, Мирса улихть кафта ширет: цебярть и кальдявть сяськомасна. Тянь эзда ушеды Мирть-Масторть (Шкай, м., Чипаз, э., и Идемевсь, э., Шяйтанць, м.,) и тяфта жа васенце ломанть тиемасна. Эрямась, кона максф Вярдень Шкайть эзда, путови каршек куломати, конань символкс няфневи коське атя или баба.
Рьвяямань-максомань и калмамань илатнень эса няфтьф каршесь: чётсь – аф чётсь; эрямаса кемоста верондасть цебярь и аф цебярь шитненди, пинкненди, павазу – аф павазу числатненди (сяда пяк магическяй тефнень и воражияматнень эса).
Мифологияса башка ванцазь тяфтама шарьхкодематнень, кода "види" и "кержи" ширетнень. Види ширесь сотневоль эрямать мархта, кержись – куломать; види кись лувондовсь павазукс, ломанень кикс, кержись, меколанкт, аф ломанень, кяжи виень кикс. Рьвяямань-максомань явсематнень эса рьвакс срхкай стирсь эняльди Кардо сяркти, э. (Калдазавати, м.) сянь инкса, штоба сон путолезень цебярь ломаттнень види кядь шири, кяжи – кержи шири. Повериять коряс, види лафтубряса ащи ангелсь, кержи – Шяйтанць; кержи ширде няемс Ковть – аф цебяренди, види –цебяренди и ст. тов. Тя карань-каршек ащемась няфтьф рьвяямань-максомань илатнень эса (сире пингста венцяма иласта авась ащесь алять кержи ширесонза – УПТМН, 1972: 268).
Види ширесь мифологияса сотф алянь ушедомать мархта, кержись – авань. Эряви азомс авать пяк оцю вастоц магияса, колдубама тевса; пантеонца тяфта жа лама авань шкайда. Тя кафта ширесь няфтьф и повериятнень, содаматнень (цебяренди – аф цебяренди, паронди – ризфонди и ст. тов.) эса. Кафта ширьхне: толсь – ведсь няфтьфт сяськомань мотифса – Толавать и Ведявать ёткса (Harva, 1952: 184); фкя ширде – Менельсь, омбоце – Масторсь и Масторть алоц (тостонь эрямась) сотфт менелень шкайхнень мархта; ломанть – Масторти, Масторть алонцты.
Кой-кона ингольдень сире пингонь ширетне, арьсематне тя пингс ванфтовсть кой-кодама культтнень эса: ведть, толть, шуфтть. Ведть мархта сотфт аф цебярьда штамань илатне. Кепотьксонди, Кльхчяняста, чистай шуваланяста (Очижида инголе) (ванк: Очижи) эшелямась; ведьса валондомась Купальняста. Койть коряс, тя пингс Кльхчяняста сявондихть "святой" ведь, конань ванфнесазь сай илати (Кльхчяняти); валондсазь ведьса ся калмотнень, кона ломаттне кулость аф эсь куломасост, штоба "анамс" пизем и ст. тов.
Улихть нинге лисьмапрянь, эшиень культт (кой-кона эшитнень эса ведсь лувондови пчкафтыкс, шумбрашинди лездыкс). Рьвяямань-максомань иласта омбоце шиня мокшетне и эрзятне вятнесазь од рьвянять лисьмапряти или эшити.
Толть культонц мархта сотфт илань толмархне, конатнень крьвяснелезь аф аньцек Роштуваста, сире Од кизоста, но и кой-кодама озондома иласа, озксса. Пяк сире илакс лувондови "од толонь" крьвястемась, кона (толсь) ванфтоволь эрь кудса сай кизоти молемс; "живой" толть путолезь тевс прянь ванфтомста, кой-кона сярядематнень пчкафтомаста (ломаттнень, жувататнень ванфтомста) (ванк: Тол).
Мокшэрзятне озонкшнесть илань ётафтома шуфттненди (пяшети, тумоти, келути). Ломаттнень арьсемаснон коряс синь маштольхть ётафтомс шкайхнень кяжснон, ульсь эсост мифическяй ванфтомань, шачемань, раштамань вий. Кой-кона шуфттне символизировандасть рьвяямань-максомань и эрямань илатнень (умарина, э., марлю, м.; килей, э., келу, м.; тума, м., тумо, э.).
Фольклорса (ёфкснень, моротнень эса) ванфтовсть обрасне, коса няфневихть сире пингонь тотемизмась (куйхне – кудонь), сокамань-видемань ваныхть (лездыхть); калхне, конат кирдьсазь эсь лангсост Масторть; офтсь, кода тотем, конань эзда шачсь мокшэрзянь плямась (прародитель).
Илань тефнень эса (рьвяямань-максомань, Роштувань) тяфта жа оцю васта занцесь офтсь, сонь илань кштимац. Моротнень эса, коса корхтави ломаттнень и офттнень рьвяямаснон колга, азови офтонь эряма вастсь – масторсь, коза офтсь сявсы салаф стирть рьвакс. Пяк содаф ёфкссь цебярь офтть колга, кона канды авати казне пчкафтоманкса (М.н.с., 1985: 24). Моротнень-мифнень эса (охотникть и яксяргть колга) няфтьф, кодамот ломаттнень соткссна (арьсемасна) эсь юронь кулоф ломаттнень мархта.
Яксяргсь няфневи кода юронь тотем, коста ульсь охотниксь. Сяс сон няфневи кода ломань, кода нармонь, конань афольхть мярьге шавомонза охотаса и кда кие сонь шавсы (кие аф ванцы тя аф мярьгомать) – тии оцю кальдяв (Маскаев, 1964: 227). Яксяргть образса, кона ащи алонзон лангса, няевихть сире пингонь уральскяй мифологиянь ширетне. Сокамань-видемань пингста юронь сотксне шуфттнень, нармоттнень, жувататнень, калхнень ломаттнень мархта арайхть аф кемот и сяда лама мяль кармасть шарфтома кшить, сёроть лангс.
Тя пингс ванфтовсть кой-кона семьянь (юронь) культтне, кепотьксонди, од юрти-семьяти сувафтомась (мокшетнень – од рьвяняти од лемонь максомась мирденц кудса) и юронь тяштьксне (кудонь васенце шочкса, калмалангонь крёзса).
Мокшэрзятнень мифологическяй арьсемасна пяк лац няфтьфт верондамань-магиянь, календарнай и аф календарнай илатнень, озкснень эса. Примамок христианствань верать, мокшэрзятне кармасть ётафнема илат, ваномок мяльснон кода христианскяй святойхнень, стане и эсь шкайснон и, шять, XVIII–XIX вв. пингста арасть эсь лацонь кафта верат, конат аф ламода кармасть полафтома сяда тов. Кепотьксонди, христианскяй Богородицать образса мокшэрзятне кармасть лувондома эсь шкайснон – ведень и шабань шачи ваныснон, оцюняснон – Ведявать, м., э.; Илья Пророкть образса – Атямшкайть, м., Пурьгинепазть, э. (Самородов, 1981: 50) и ст. тов.
Инь оцю озксне, илатне ульсть сотфт сокамань-видемань пинкнень мархта – паксянь ушедомань тефнень, тунда стадав жуватань васенцеда панемста, сёронь урядамать ушедомста, шумордамста и ст. тов. Синь цикласна ушедоль тялонь инь ёмла шиста (22 декабрьста) и Од кизоста.
Марнек народнай календарьсь ульсь полатф (петьф) христианскяй церковнайти. Христианскяй святойхнень ёткста пяк ванолезь мяльснон сятнень, конат ванфтолезь, лездольхть сокамати-видемати, жуватань раштамати. Кепотьксонди, Николай Чудотворецсь (Микула, э., Никола, м.) – сокаень-видиень ваны, лезды; Василий Великий (Таусяй м., Тувоньпаз, э.) – тувонь ваны, Оцюня; святой Василий – сембе жувататнень Оцюнясна; святойхне Флор и Лавр – алашань ваныхне-лездыхне и ст. тов. Сокаень-видиень лездыхнень эзда пяк ванолезь мяльснон Масторонь, шачиень-раштаень ваныхнень и васендакиге – Норовавать (сёронь шачи-касы ваныть, Оцюнять), Паксявать, м. – паксянь ваныть, Сёравать, м. – сёронь Оцюнять и тяфта жа кулоф атятнень. Илатнень эса пяк лама эняльдсть сянь колга, штоба шачель козя розь, сёра и улель марнек цебярь шачема, жуватань раштама, шумбраши, козяши и ст. тов. Эсь формаснон коряс синь няфтихть лама искусствань видонь синкретизма: морот, конатнень морасазь илань ётафтомаста; содамат, налхкомат.
Христианскяй илатнень эзда тя пингс ётафнесазь Очижить, м., Инечить, э., Тройцять, м., Тровицять, э., Купальнять, м., Валнома чить, э., Николать, э., Миколать, м.
Сире пингонь верондамась лама илатнень эса няфтсь Миронь-Масторонь явлениянь цикличность: Мирть шачемац (тундань илатне, конат сотфт видемань-анокламань и сёронь видемать мархта), панжемац (перень, паксянь шачемань учема), мадомац (сёксень-тялонь илатне).
Тяда башка, ётафнесть случайнай илат (коське пингста, паломста и ст. тов.). Нумань илатнень эса кадолезь мекольдень пулфть Паксявати, а кулоф ломанти – аф лама апак нук сёра (помондама пакш) (ванк: Поминкат).
Койть коряс, нумда меле мокшетне паксяв кадольхть сёронь апак нук пакш, конанди мярьгольхть и "паксянь сакал", м., "паксянь казанди", м., ярхцамс. Сёронь урядамста мекольце рядса кадольхть и сотольхть крёзкс 10 сёра прят, штоба Шкайавась – паксять Оцюняц – Паксявась ванолезе паксять. Тя илатнень эса пяк лац няеви кшить культоц.
Эряви азомс кшить илань магическяй ширенц колга и лия календарнай, юронь озкснень илатнень эса. Илань копшатне, пярякатне (эрзятнень), пачатне (мокшетнень) тя пингс лувондовихть эрявиксокс рьвяямань-максомань, помондамань илань пяльксокс. Озксонь, илань магическяй пяльксокс лувондо-вихть наряжаматне, толмархне. Сяда лама ила ётафнесть Роштуваста, Очижиста, Купальняста. Христианствать примамда инголе пингти сувсихть илатне, содаматне, конат сотфт васенце шинь магиять мархта, сяда сидеста – Од кизоть, Очижить (ванк: Очижи). Кой-кона илатнень эса сире пингонь верондамань ширетне илядсть лама эсь прянь ванфтомаса, конатне тиендевсть сянь инкса, штоба ванфтомс пря сярядемада, сельмода, ведунда.
Тяфтамот мокшэрзятнень пяк сире пингонь арьсемасна (нюрьхкяняста) Мирть-Масторть колга, сонь инь оцю эсь ширенза Мирть шарьхкодемаса и верондамаса.
Лит: Бояркин Н.И. Мордовская инструментальная сигнальная музыка // Музыка в обрядах и трудовой деятельности финно-угров. Таллин, 1986; Евсевьев М.Е. Избр. Тр. Т. 1–2. Народные песни мордвы. Саранск, 1961, 1963; Йаков. О мордвах, находящихся в Нижегородском уезде Нижегородской губернии. СПб., 1848; Маскаев А.И. Мордовская народная эпическая песня. Саранск, 1964; Сонь жа. Мордовская народная сказка. Саранск, 1947; Мельников П.И. Очерки мордвы. Саранск, 1981; Митропольский К. Мордва. Религиозные воззрения, их нравы и обычаи // Тамбов. епарх. вед., 1876; Мордовские народные песни (М.н.п.). М., 1957; Мордовские народные сказки (М.н.с.). Саранск, 1985; Напольских В.В. Народы уральской языковой семьи. М., 1991; Петрухин В.Я., Хелимский Е.А. Финно-угорская мифология // Мифы народов мира. Энцикл. Т. 2. М., 1994; Самородов К.Т. Мордовская обрядовая поэзия. Саранск, 1980; Смирнов И.Н. Мордва. Казань, 1895; Устно-поэтическое творчество мордовского народа (УПТМН). Т. 1. Эпические и лиро-эпические песни. Саранск, 1963; Т. 7. ч. 1. Эрзянские причитания-плачи. Саранск, 1972; Т. 7. ч. 3. Календарно-обрядовые песни и заговоры. Саранск, 1981; Т. 10. Легенды, предания, былички. Саранск, 1983; Эрзянь морот. Саранск, 1928; Юртов А. Образцы мордовской народной словесности. Вып. 2. Казань, 1883; Harva U. Die religiosen Vorstellungen der Mordwinen. Helsinki, 1952; Kuusi M. Suomen kirjallisuus I. Kirjoittamaton kirjallisuus, Helsinki, 1963; Mainof W. Les restes de la mythologie Mordvine // Journal de la Societe Finno-Ougrienne. Helsingissä, 1889; Mordwinische Volksdichtung. B. 5. Helsinki, 1977.