Olle kassikõnõ, kassil olle kats kanakõist ja kikkakõnõ. Pand rehe ala orrõ pääle kanakõsõ ja kikkakõsõ, a esi läts üle üte pindre1 süvvä otsma, ütel: "Ar ti tulgu-i2 maalõ orrõ päält, repän arõ vii3."
"Tulõ-i4."
Tulle repän rehe ala uma suurõ hannaga, ütel: "Kuku kikas, kulla kikas, tulõ maalõ mässämä, sibistämmä-libistämmä."
"Sa arõ viide5?"
"Vii-i, mi siih sibistele-libistele, ni ma lää umma tiid, ti lääde orrõ pääle tagasi".
Tulle kikas maalõ, naksi saal mässämä, ni repän haard kikka kinni, ni nakas viimä. Kikkakõnõ nakas tänni6:
"Kassikõnõ, kaasakõnõ,
neljä jalga neidsõkõnõ,
minno viiäs üle Melste mäki,
viiäs leina rattil7!"
Kassikõnõ kuuld, juusk takah, and rebäsele kõrva pääle, võtt uma kikkakõsõ käest ni tõije kodo tagasi, pand orrõ pääle.
Tulle tõõnõ päiv, kassikõnõ ütel jal8 kikkalõ: "Ma lää arõ täämbä üle kuvvõ pindre süvvä otsma, ar sa tulgu-i maalõ, ma inäb kuulõ-i."
"Tulõ-i."
Läts kassikõnõ arõ, ni tulle repän jal rehe ala uma pikä hannaga, nakas jal kikast petmä9: "Kulla kikas, tsirgu kikas, tulõ maalõ mässämä, sibistämmä!"
"Lää-i, sa arõ viide."
"Vii-i. Tu olle suur suurepän10, ma olõ armas arorepän11, vii-i ma arõ."
Tulle kikas maalõ, naksi mässämä, ni haard jal kikka kinni, nakas minemä. Kikas nakas jal tänni:
"Kassikõnõ, kaasakõnõ,
neljä jalga neidsõkõnõ,
minno viiäs üle Melste mäki,
viiäs leina rattil!"
Kassikõnõ kuuld, läts takah minemä, saije järge, leije rebäsele kõrva pääle, võtt kikka käest, tõije kodo, pand orrõ pääle.
Tulle kolmas päiv, kassikõnõ läts üle ütsä12 pindre süvvä otsma, ütel jal kikkalõ: "Ar sa orrõ päält maalõ tulgu-i, repän arõ vii."
"Tulõ-i."
Läts kassikõnõ arõ, tulle repän rehe ala, nakas jal kikast petmä: "Kikkakõnõ, tulõ maalõ sibistämmä-libistämmä!"
"Lää-i, sa arõ viide."
"Vii-i. Tuu olle suur suurepän, ma olõ armas arorepän."
Tull kikas jal maaha, repän haard kinni, nakas minemä, kikkakõnõ säält tänni:
"Kassikõnõ, kaasakõnõ,
neljä jalga neidsõkõnõ,
minno viiäs üle Melste mäki,
viiäs leina rattil!"
Kassikõnõ kuulõ-õs, ni repän veije arki13 kikkakõsõ. Tulle kass kodo, kaes, olõki-i inäb kikast orrõ pääl. Saije kass kõrraga arvu, õt ommõ repän veenü kikka arõ.
Pand sis kass kotitävve tuhkõ rii pääle, pand puutõlva-ga14, läts rebäste poolõ suulõga15 minemä. Läts rebäste uusi16 mano, nakas tänni: "Rebäse, tulgõ suulõ võtma!"
"Hüä kül, meil jo kiiski ruug17, suulõ vaiagi ruvva sisse."
Tulle üts repän oosõst18 vällä, and kass tälle puutõlvaga otsa ni visas mäe alagi arõ. Nakas jal tänni: "Rebäse, tulgõ suulõ võtma!"
"Meil jo üts läts."
"Jummal tiid, kohe tuu läts!"
Tulle tõõnõ repän oosõst vällä, and kass tälle ka puutõlvaga otsa, visas arõ mäe alagi.
Tänitas õks kass: "Rebäse, tulgõ suulõ võtma!"
"Meil jo üts läts."
"Jummal tiid, kohe tuu läts."
Tulle kolmas repän oosõst vällä, and tälle ka puutõlvaga otsa ni visas mäe ala. Tänitas õks edesi: "Tulgõ, rebäse, suulõ võtma!"
Tulõ-õs inäb kedägi vällä. Läts kassikõnõ uustõ19, kuuld, ku kikkakõnõ kirg lavvakarbih20. Võtt kikka lavvakarbist arõ, võtt viil rebäste kraami, ni tulle uma kikkakõsõga kodo.
1 piiripeenra (?)
2 ärge tulge
3 viib ära
4 ei tule
5 sa viid ära
6 hakkas tänitama, kisama
7 leinavankril
8 jälle
9 meelitama
10 soorebane
11 arurebane
12 üheksa
13 viis ära
14 puukurika
15 soolaga
16 urgude
17 meil juba keeski toit
18 urust
19 urgu
20 laulis laualaekas
S 50913/18 (19) Setu, Vilo v., Kalde (Kaatshuva) k. - A. Põhi < Taarka Taro (1932). - AaTh 61 B (Kass, kukk ja rebane) - 22 t. Tuntud ainult Setus (20 t.) ja Vastseliinas (2 t.). Populaarne vene muinasjuttude repertuaaris.