Ланга оршамот

Телень шкань ланга оршамотнестэ ульнесть понань суманть, ревень кедень шубат. Седе умок шкань суманесь стазель кавто ёнга видестэ. Мейле кармасть кандтлеме ало ёнов келейгавтозь суманть (Клебанд 1986: 42).

Комсеце пингенть ушодовкссо суманенть таркас кармасть кандтлеме поддёвка - ватань потмо марто стазь оршамопель. Поддёвкась стазель суманенть ладсо, ансяк лангаксокс ульнесь раужо кеме коцт.

Сеедьстэ сень коряс, кодамо коцтсто стазель лангаксось, лемдилизь оршамопеленть. Истя, поддёвкань кондямо, ватань потмо марто стазь оршамопелесь, нанка, саизе лемензэ лангакс коцтонть лемстэнзэ (рузокс нанка).

Пек эрявикстелень оршамопелекс ульнесь ревень кедь эйстэ стазь ланга оршамось, конанень эрзятне, мокшотне мерсть ор; ламотне саизь рузонь валонть шуба, кона-кона диалектнэсэ чуба.



Телень шкань оршамопельть: ор - шуба, ватань потмо марто нанка, келей каркс кушак, карсемат: понань тёплы - кемь. Мордовия, Зубово-Полянань район, Мокшонь Пимбур веле. Карм Ю. 1984. (Fk 2086: 107)


Сёксень-шкань оршамопель: ватань потмо марто стазь пальток. Мордовия, 3убово-Полянань район, Мокшонь Пимбур веле. Карм Ю. 1984. (Fk 2086:105)


Седе тов кармасть кандтлеме рамазь ланга оршамот. Лиясто максызь теемс ланга оршамонть стыцянень. Эсь кедьсэ теезь эрзянь, мокшонь ланга оршамотнень течень чистэ а кандтлить.



Мокшонь оршамопельть: лангакаямка - панар, жилетка, каркс (икеле пельде). Мордовия, Зубово-Полянань район, Мокшонь Пимбур веле. Карм Ю. 1984. (Fk 2086:14)


Мокшонь оршамопельть: лангакаямка - панар, жилетка, каркс (удало пельде). Мордовия, Зубово-Полянань район, Мокшонь Пимбур веле. Карм Ю. 1984. (Fk 2086:15)



Эрзянь, мокшонь аватне панарост лангс оршильть нурькине панар, кона стазель седе човине коцтсто. Цёратне панарост лангс оршильть жилетка.