ПАНЗЕЙ, ПАНЗИ, э. (канюк). Ломаттнень арьсемаснон коряс – Шкаень сюдоф нармонь. Легендаса азондови, што Мирть-Масторть тиемда меле Шкайсь мярьгсь эрь нармонти шувомс эстеенза штамс эши. Сембе тянь тиезь, аньцек П. тя пингть ашель. Мзярда сон лийкстась, сон тись ёжуста и мярьгсь варсити молемс эсь прянь штама рдазть эзда, штоба молемс Шкайти аф рдазуста. Сонць П. тя пингть вадендезе прянц рдазса и сась Шкайти варсида инголи. П. азозе Шкайти, што сон тяфта жа шувсь эши и няфтезе варсить эшиенц. Васькафтоманкса Шкайсь сюдозе П. и ашезь мярьге теенза симомс ведьта ляйхнень, эрьхкнень, эшитнень эзда. Ся пингста сявомок П. может симомс аньцек пизем ведьта и расада. Мзярда ламос аш пизем, раса П. ушеды аварьдема, анама Шкайть кядьста ведь.

Тя мифическяй легендать коряс эрямаса эвондасть валмуворкст. Сятнень колга, конат кельгсазь путомс эстеест лия ломаттнень тифснон, мокшетне корхтайхть: панзить кондякс вадендьсы прянц и мярьги: "эшить мон шувине".

Лит.: УПТМН, Т. 10. Легенды, предания, былички. Саранск, 1983.