ПАКСЯВА, м., ПАКСЯ СЯРКО, э., ПАКСЯ ПАТЯЙ, э. – (сярко – сярхка; патяй – ака) – паксять ваныец, лездыец. Эрзятнень мифологияса тяфтама усолоц и Норовавать (ванк: Норовава). Мифологияса П. няфнесазь вирень саразкс или авакс кувака шяярь мархта. П. культоц сотф печкомань илатнень мархта, конатнень тиелезь сёронь урядамда инголе и шумордамда меле. Койть коряс, П. лемс кадондсть паксяса апак нук сёра пакш, конанди мярьгольхть "паксянь сакал". Сёронь урядамда меле, штоба улель тага цебярь шачема паксяса (штоба ваномс Н. мяленц), сире капать вастс кадондсть П. аф лама од шужярь, мекольце рядса – розень прянят. Повериять коряс, П. аф мярьги каннемс паксяста кевнянят – сарасне лоткайхть алыямда; афольхть мярьге кандомс меки паксяста кши – сарасне юмайхть.

Мзярда "панжель" розсь пялеветь, П., кода арьсесть, юватькшни. Приметакшнезь: кда звукне марявихть вяшкомакс – цебярь сёронь шачеманди, авардезь – аф кармай шачи киза. Мокшэрзятнень арьсемаснон коряс, тя пингть аф эряви шумнамс – кяжияфтсак П. (сяда пара ащемс кудса, пякстамс вальмятнень, сяс мес П. кельгсы сетьмоть).

Лит.: Harva U. Die religiosen Vorstellungen der Mordwinen. Helsinki, 1952; УПТМН. Т. 7. ч. 3. Календарно-обрядовые песни и заговоры. Саранск, 1981.