ОЧИЖИ, м., ИНЕЧИ, э. (ине – оцю, тона) – инь оцю христианскяй ила, кона тяниге ётафневи эрь кизоня аф фкя шиня (нилеце апрельста сявомок – кафксоце майти). Тя илась тиендеволь кода эрь кизонь лятфтама Иисус Христосонь мучендаманц инкса и сотф сонь эрекламанц мархта. Мокшэрзятнень эрямаса О. ушедсь ётафнема шять XVIII векста сявомок (тиендемок и эсь сире пингонь иласнон).
Мифологиять коряс, О. аля лаца сай ломаттненди ластя акша алаша лангса. Тяниень пингть О. сотнесазь тундань паксянь тевонь тиематнень мархта. Тянь колга азондыхть сире пингонь озондоматне, озолматне, конатнень азолезь тя шиня (штоба сембось шачель, алятне видельхть, аватне нульхть, сокайхне улельхть шумбрат). Мекольце Оцю Постонь недялять (Очижида инголе) моральхть илань шнамат кудазоравати или од рьвяяйхненди, венцяйхненди.
О. аноклама ушедольхть недяляда инголе. Койть коряс, шталезь, урядалезь кудть, кудста сембонь муськолезь, уштольхть баня, кой-кона велетнень эса колмоксть: вержиста (марстонь баня), пяденцяста (кулоф атянь баня), ёткшиста (стирень баня). Шуваланять лувондозь чистаень шикс и тя шиня эшеляльхть ляйса, шудерьксса (кода арьсесть ломаттне, солаф эй ведсь лезды пчкафтомс ронгть лангста сярядематнень).
Стирень баняда меле пидельхть пачат, тиельхть пуре, архтольхть шурьхкя кедьса алхт, панжемок кенкшть, терделезь куду кулоф юронь ломаттнень. Шкай ужеса лавцять лангс ацальхть ацам, шра лангс путольхть пачат, пидеф тувонь пря. Илять шабатне ювадельхть: "Очижись сай фталга, сувай куцемалга, озай эзембряти, кундай тувонь пряти!" Эрь кудть, койть коряс, кудазорсь, сявомок кядензонза штатолня, кши, шкайня, ёталезе колмоксть (крьвястемада, аф цебярь вийда).
О. веня афольхть яка ульцява (повериять коряс, тя пингть якайхть аньцек кулоф ломаттне и Шяйтаттне); афольхть ана шумбраши шкайхнень эзда (тя ёткть еврейхне плманжа лангса озондыхть). Ванолезь: кда О. весь пяк сетьме, аф увайхть пинетне – цебярь кизось кармай улема; кона пяльде веть увазеви пинесь – ся шире кармайхть улема пожархне; пинетне увайхть пялеветь самс – васенце пяле кизоть улихть пожархт, пялеведа меле увайхть – омбоце кизоть пялеста. Кда О. веня ков валда – аф шачи кизоти; О. атяма торай – шачи кизоти, пизем – кальдяв (пяк пизему) кизоти. Повериять коряс, О. веня "корхтайхть" алашатне. О. веня якальхть гададондама калмалангс: кда маряльхть кодамовок шум – кизось ули пожару. О. веня няйф онть луволезь видекс (лисель кизоти).
О. васенце шиня кой-кона велетнень эса ётафнесть озондома ила кудса, коса ванфтолезь и крьвяснелезь илань юронь штатолть (ванк: Штатол). Штатолть ваксс путольхть "атянь шапка", конань мархта кочкальхть монетат, алхт. Васенда озондольхть О., сяльде – атятненди (азольхть сюкпря сянкса, мес сась О.; анальхть О. пяльде шачема, бславама), азолезь сембе аноклаф О. илати ярхцамбяльть (эрь илати пидельхть каша). Юронь кулоф ломаттненди эняльдсть ванфтомс эряй ломаттнень кальдявда, максомс цебярь сёронь шачема, жуватань раштама. Атянь штатолса шаролезь эрь кудть. Койть коряс, аф кунара лисьф рьвакс стирсь вельхтялезе штатолть акша руцяса. Шобдава О. ярхцальхть илань суронь пачада, пярякада, архтф алда. Архтф алхнень путнезь куд ужети шкайнятнень фталу (шумбрашинди), вальмялангс – юронь кулофненди. Койть коряс, якальхть кудга алонь кочкама (варьхмодема шовор – оцю цёратне, шобдава – шабатне).
Шинь мадомда инголе "прважалезь" кудста кулоф ломаттнень (велепети или тинкнень фталу); лихтелезь синь удома вастснон, вазьть, конань потмоса ульсть ярмакт, алхт, атянь штатол. Кулоф атятнень каванялезь тага весть мекольцеда, крксезь пеельса монетать (лувондозь, што тона шиса-эрямаса эряволь пандомс ки лангс удомать инкса, тона шити ётаманкса) и тяда меле эняльдсть теест тумс меки эсь вастозост. Кулоф атятнень мельге ляцендельхть ружьяста, штоба ароптомс кить шяйтаттнень эзда, сяс мес, кода арьсесть ломаттне, синь пелихть ружьянь шумда. Кеворяльхть калмотнень шири алхт (кулоф шабатненди, штоба синь колендельхть тона шиса).
Приметакшнезь, кда О. васенце шиня куду васенцекс суваль цёраня – кизось ули цебярь азорти, стирня – аф пяк. Стирнять озафтолезь алхнень лангс, штоба улельхть тя кизоня кудса нарвайхть. Куду васенце сувай анциняти максольхть пача и арьсесть, што сась славондама сонць Христозсь. Архтф О. алхнень, кода лувондозь, ули магическяй вийсна (ванк: Ал).
О. шиня ульсь пяк лама аф мярьгомада: афольхть мярьге тевонь тиемда (грех), ушедомс од тев, керомс, нарамс шяярьхнень; афольхть мярьге явсемс кулоф ломанть, конань калмалезь О. шиня, меколанкт, эряволь радавамс – кулоф ломанць пови райти. Афольхть мярьге аватненди якамс кяпе (кулоф атятне куду аф сувавихть), помондамс кулоф юронь ломаттнень калмалангса (кулоф атятне О. синць сайхть куду); О. сявомок Вознесенияти молемс вальмава мезевок аф ёряйхть – Шкайть токасак, наказатанза; штоба шачель сёрось, О. сявомок и видема пингти кудса афольхть крьвясне тол.
Очижинь шитнень сембе велетнень эса колендельхть архтф алса, нюряльхть нюрямса, якальхть радня ланга инжикс. Кардафлей эрзянь велеса О. омбоце шити мярьгольхть "кучемлянь якафтома чи" (кучемля ям – тувонь палонь лям). Ярхцамда инголе тиельхть озондома ила.
О. прважамати пидельхть ярхцамбяль, озондольхть, терделезь О. шра ваксс. О. прважалезь аф сембе велетнень эса фкакс. Кепотьксонди, Кардафлейса тиельхть тяфтама илань тев: эрь ярхцамбяльста сявольхть пакшкя, молельхть кенкш шири и эняльдезь О. лисемс кудста. О. прважалезь сембе велесь (лисельхть велепети). Кой-кона велетнень эса ёряльхть сонь мельганза алхт, ляцендельхть ружьяса, колендельхть, кштильхть, моральхть. О. илати пидеф тозеронь кшить, кона сембе Очижинь недялять ащесь шра лангса, андолезь алашатненди.
Лит.: Евсевьев М.Е. Избр. тр. в 5-ти т. Т. 5. Мордовская свадьба. Саранск, 1966.