НЕШКЕАВА, м., э. – нешкепереть, мешнень ванысна, лездысна. Мокшэрзятне арьсесть, што эрь нешкепереть ули сонцень Н., кона эряй инь оцю нешке кудняса. Эрзятнень мифологияснон коряс, мешнень, нешкепереть ваныкс, лездыкс лувондсазь и Нишкепазть. Медень таргамста эрь нешке куднять инголи эрзятне путольхть ёмла шаваня медень пуре мархта, тердемок Н. каваняма. Преданиять коряс, од цёрась, кона ашезь веронда, што ули Н., виенц мархта ёрась сявомс нешкста медь, но нешке кудняста тусь вер и нешкне ворьгодсть.

Н. лемс тиендсть оцю озондома ила. Иланди нешкста таргальхть медь, тиельхть медень пуре и лия ярхцамбяль, конатнень эзда аф ламошка ёрдальхть нешкепереть ортанц ваксс и тя пингть Н. эняльдсть, штоба сон лездоль касфтомс мешнень, тиемс лама медь. Нижегородскяй губернияса Городищенскяй уездса мокшетне ётафнесть ила Н. лемс Эльгонь шиня (2 августста). Тя илати тернелезь Н., вирень ваныхнень, лездыхнень (Шкайть лездыензон), сембонь, мезе ульсь вирьса. Тяда меле печкольхть акша маци, азольхть озондомань валхт, коса эняльдсть Н. касфтомс мешнень, ванфтомс синь ведунда, аф цебярь ломаньда, сельмода. Илань ярхцамда меле сембе тага ётафтсть озондома. Кудазоравась путолезе кяденц иланди пидеф кашати и эняльдсь Н. прянь ванфтома, мешень раштама. Ярхцамда меле семьяста сяда оцюсь пяярдель карьхкя поза маластонь шуди ведти, кода арьсесть, вирень ваныхненди: Вирявати, Мокорявати (мокорьхнень ваныснонди, лездыснонды).

Пензенскяй губернияса Наровчатовскяй уездса нешкеперень илась тиендеволь Покравда кафта недяляда инголе. Н. эняльдсть и сярядемста, кона ульсь саф нешкепереста, нешнень, медть, медень пуреть эзда. Сяс озондомать ётафтолезь нешкепереса. Лувондозь, што цебярь ломанть мешсь мзярдонга аф сусксы (аф мярьги Н.). Повериять коряс, аф эряви шятямс нешкеперень азорть кудонь кенкш порогонц лангс и сувамс сондеенза прянь, шамань апак вельхтяк – кулыхть мешне. Афольхть мярьге максомс медь пандомда озондома илань шиня – кармай улема кржа медьта, юмай нешкепересь.

Лит.: Harva U. Die religiosen Vorstellungen der Mordwinen. Helsinki, 1952; УПТМН. Т. 7. ч. 3. Календарно-обрядовые песни и заговоры. Саранск, 1981.