МЕШАВА, м., МЕКШАВА, э. – мешнень Оцюнясна, ванысна, лездысна. Лувондовсь мазышинь тевонь содаень, ёнювонь, кудонь тевонь вятиень символкс, сяс аф стак рьвяяма-максома иласа кудавась няфневи М. лаца. Рьвянять сравниндасазь золотань паця мешень маткать мархта и сяс арьсесть, што ульсь тяса кодама-бди пяк кунаронь соткс мифологическяй вийхнень мархта. Повериять коряс, М. аф мярьги мешненди пупамс ломаттнень. Сон наказасыне ломаттнень шуроста и аньцек сятнень, конатнень кальдяв мяльсна, лама тисть аф цебярь. Фольклорса мешнень лаца няфневихть ногаецне, кудатне.

Эрзятнень арьсемаснон коряс, М. пяк кельголезе и лездоль теенза сембе эрзянь шкайхнень тядясна Анге Патяйсь (ванк: Анге Патяй). Сон кельголезе М. покодема шинц и шачфтома ширенц инкса. М. макссь вал Анге Патяйти эрь шиня шачфтомс шабат и сянкса сон пяк кармась кельгома М. Аньцек сонь штанц эзда, кода мярьгсь Анге Патяйсь, кармасть тиема штатолхт и аньцек сонь медьстонза кармасть пидема иланди пуре.

М., кода и Велявась (ванк: Велява) – ванфтсы велеть кальдявда, кяшсыне ломаттнень аф цебярь вийда. Арьсесть, што кда М. юмай, велесь юмай. Ульсь лама эсь прянь ванфтомат. Афольхть мярьге сувамс мешень азорть кудс прянь апак вельхтяк (мешне и М. юмайхть); афольхть мярьге максомс пандомда васенце кочкаф и таргаф медьста, конань таргалезь озондома шиня М. лемс. Марнек, М. – пяк сире пингонь символ – тя Мирсь-Масторсь, козяшись, шачфтысь. Мешне лувондовсть сотксокс менельть и Масторть ёткса.