ЯГА-БАБА, м., э. – сире содай баба, пяк содавикс образ, кона сидеста васьфневи эрзянь волшебнай ёфкснень эса, конатнень юрсна молихть мифологияти. Исследовательхне арьсихть, што, шять, Я.-Б. образоц ётась рузонь мифологияста.

Я.-Б. няфневи пяк аф цебярьста, оцю пейса и кувака кядьса; оцю потя мархта, стака якафса. Сонь самац марявсь кулдор-калдор, калц, м., э. вайгяльса, кона марявсь калада крандаз лаца, мзярда моли лоткнень-латкнень ланга. Я.-Б. алашац – сюмась, локшец – петькольсь, вожиятне – катонь сюлотне. Сонь улихть кемонь стиренза, конатнень макссесыне рьвакс аф сембе лацонь шачф цёратненди.

Эряй Я.-Б. ломаттнень эзда ичкозе вирть кучкаса пялес калада кудняса, кона ащи лафчеста, кода рузонь ёфксса, саразонь пильге лангса, но аф шаронды, кемоста пезф модати. Я.-Б. сидеста ащи озада куд инголе ужеса, ацам или пянакуд лангса; пряц ащи куд ингольдень ужеса, потянза лапотьфт олга лангс или "сонць кудшка, пряц калдазшка, фкя пильгоц пянакуд лангса, омбоцесь – пянакуд инголе". Васьфтемстонза сонь эряволь лемдемс бабанякс и мярьгомс: "Сюк" (сюконян) вал. Кда аф азат тяфтама вал – сязенттянза, нильхтянза. Кудозонза пови ломаттнень Я.-Б. кошардсыне тевонь тиема. Фкя ёфкснень эса Я.-Б. лисенди эсь эряма вастстонза пяк шуроста, мзярда аньцек пани жертванц мельге; омбонцнень – сашенды аньцек веть эсь куднязонза, а шобдава тага меки туй вири. Кудсонза мархтонза эряй ласкась. Шуфтсь, кона ащи Я.-Б. кудонц ваксса ащи перяфксокс ломанти, конань мельге панци Я.-Б. Шуфтсь пикссы ласькить, перясы сонь кинц.

Мзярда Я.-Б. ёфксса няфневи кяжи, ломанень сивикс, сон сидеста аф пяк шарьхкоди. Эсь прянц вастс стирьшабась путы Я.-Б. ваксс поювонь мокорьня и Я.-Б., сивомок сонь, арьси, што сивозе стирнять. Я.-Б. ёрай путомс стирнять и цёранять кайме лангс, тонгомс пянакуду, рястамс, сивомс. Шабатне пряснон вятьсазь сяда ёжуста: синь озафтсазь Я.-Б. сонцень пянакуду.

Понданц и сембе Я.-Б. вещанзон эса ули магическяй, эсь лацонь вий, кона ванфтови нльне снярда, мзярда сон кулы. Кепотьксонди, Я.-Б. ваец может ломаттнень шарфтомс (конат сонь варчсезь) казакс или боранкс; вещанза – казакс, траксокс, букакс и лия жуватакс. Меки арамс ломанькс можналь аньцек тиемок кой-кодама эсь лацонь мярьгомат (кепотьксонди, печкомок траксть, эрявихть ванфтомс сонь сюронзон).

Я.-Б. аф сембе пингть няфневи кода кальдяв образ и ломанень ярхцай. Сон лезды, цебярь советонь максы и ингольдень азы; лезды цёратненди, конатнень ульсь кальдяв тевсна и тядяфтома-аляфтома шабатненди. Сонь кядьстонза цёранясь сяви волшебнай сюре киренкс – кинь сюре, кона няфтелезе виде кить; цебяренкса пандоль цебярьса. Тяфтама сюжетса Я.-Б. няфневи аф кальдявкс. Пондоц Я.-Б. пакарю, эряй бабанясь вирень кудняса, корхтай паронь арьсезь.

Тяниень пингть Я.-Б. лемонц азондсазь снярда, мзярда ёрайхть кориндамс сире кяжи аватнень.

Лит.: Маскаев А.И. Мордовская народная сказка. Саранск, 1974.