АНГОЛЬ, м., АНГЕЛ, э. – сась христианскяй верондамаста, мифологияста. А. – шкаень кучф, кона ванфтсы ломанть и тии теенза цебярь. Няфневи ёмла шабанякс акша щамса, паця мархта. Мокшэрзятнень эрямас А. образоц сувась христианствать примамда меле (XVII – XVIII в.). Кода арьсесть инголи, эрь ломанть ули эсь А., кона шары эсь лангозонза и ломанць эряй снярс, мзярс А. ащи сонь види лафтубрясонза.

А. энялькшнесть шумбрашинкса, цебяренкса, оцю тевонь кида инголе. Ломаттне пельсть юмафтомс А. и тя пелемась тись лама примета, суеверия и аф мярьгомат: афольхть мярьге сельгомс види лафтубрява – тоса ащи А.; сельгат вальмава – поват А. сельмос и сон туй эздот; кда ушу лоткат кить лангс – А. аф ётави мархтот кить туркс и туй эздот; сярят кить лангс – А. сельмос поват – каттанза А. Верондамать коряс, кудста лисемста най эряви тердемс мархтот А., штоба сон молель мархтот и ванфтолензе.

А. мифологиянь образоц сотовсь ломанть кержи и види ширенц мархта. Ломанть види ширец лувовсь эрямакс, цебярькс, а кержись – куломакс, аф цебярькс. Сяс арьсесть: види кядсь китни – козякодомати, сельмось – цебяренди, сельмокабась – васедемати; пилесь увнай – цебярь кулянди. Види шири ёнца ломанти афольхть мярьге удомс – А. аварьдема кармай, теенза аш коса удомс. Кода арьсесть ломаттне, види ширесь максы удалама, кержись – меколанкт. Стямс васта лангста, карьсемс пилькнень, сувамс куду эряви най види пильгса – кись кармай апак пякстак А. Сяс и шамать шталезь види кядьса – А. штатанза и тяка пингть бславатанза; шиньберьф ванфтсы ломанть эряфонц. Кда апак содак ломанць шталезе шаманц кержи кядьса, то арьсесть, што курок сай аф цебярь. Меккятть шталезь шамаснон ведуттне, содай ломаттне, конат тиихть кальдяв ломанти.